ⵜⴰⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ: ⵜⵉⵔⵎⵉⵜ ⴷ ⵓⵙⴰⴽⴰ

ⵜⴰⵡⴰⵔⴳⵉⵜ ⵏⵏⴰ ⴼ ⵉⵎⵎⴰⵖ ⵢⴰⵏ ⵓⴼⴳⴰⵏ ⴰⵔ ⵜⴻⵜⵜⴳⴳⴰ ⵖⴰⵙ ⵜⴰⵡⴰⵔⴳⵉⵜ, ⵎⴰⵛⴰ ⵜⴰⵡⴰⵔⴳⵉⵜ ⵏⵏⴰ ⴼ ⵜⵎⵎⴰⵖ ⵜⵔⴰⴱⴱⵓⵜ, ⵏⵜⵜⴰⵜ ⴰⴷ ⵉⵜⵜⴳⴳⴰⵏ ⵜⵉⵍⵍⴰⵡⵜ.

ⵜⴳⴰ ⵜⵉⵔⵎⵉⵜ ⵏ ⵜⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⵙⴳ ⵜⵉⵔⵎⵉⵜⵉⵏ ⵜⵉⵎⵙⵎⵓⵏⵉⵏ ⴷ ⵜⵏⵙⴽⵍⴰⵏⵉⵏ ⴷ ⵜⵙⵏⵎⴰⵍⴰⵏⵉⵏ ⵏⵏⴰ ⵢⵓⴽⵍⴰⵍⵏ ⵜⴰⵡⵉⵜ ⴷ ⵜⵣⵔⴰⵡⵉⵏ ⵙ ⵉⵙⵔⴰⴳⵏ ⴰⴷ ⴷ ⵉⴷⴷⴰⵏ:

ⴳ ⵓⵎⵣⵡⴰⵔⵓ, ⵍⵍⵉⵖ ⵜⴳⴰ ⵢⴰⵜ ⵙⴳ ⵜⵎⵙⵎⵓⵏⵉⵏ ⵉⴷⵔⵓⵙⵏ ⵉⵜⵜⵓⵥⵍⴰⵢⵏ ⵙ ⵢⵉⴳⵔ ⵏ ⵓⵙⵏⴼⵍⵓⵍ ⴷ ⵜⵉⵔⵔⴰ ⵙ ⵜⵎⴰⵣⵉⵖⵜ ⴷ ⵓⴼⵙⵔ ⵏ ⵓⴷⵍⵉⵙ ⴰⵎⴰⵣⵉⵖ.

ⴳ ⵡⵉⵙ ⵙⵉⵏ, ⴰⵙⴱⴷⴷⵉ ⵏⵏⵙ ⵙⴳ ⴷⴰⵔ ⵢⴰⵜ ⵜⴷⵖⵔⵜ ⵏ ⵉⵎⵙⵡⵉⵏⴳⵉⵎⵏ ⴷ ⵉⵎⵙⵏⴼⵍⵓⵍⵏ ⴷ ⵉⵎⴷⵍⴰⵙⵏ ⵉⵎⴰⵣⵉⵖⵏ ⵏⵏⴰ ⴷ ⴷⴰⵔ ⵢⴰⵜ ⵜⵉⵔⵎⵉⵜ ⵉⵖⵣⵣⵉⴼⵏ ⵜⴰⵣⴳⵔⴰⵔⵜ ⴳ ⵢⵉⴳⵔ ⵏ ⵜⵖⵏⵙⴰ ⴼ ⵜⵎⴰⵣⵉⵖⵜ ⵙ ⵓⵎⴰⵜⴰ, ⵏⵉⵖ ⴳ ⵢⵉⴳⵔ ⵏ ⵜⵉⵔⵔⴰ ⴷ ⵓⵙⵏⴼⵍⵓⵍ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.

ⴳ ⵡⵉⵙ ⴽⵕⴰⴹ, ⴰⵡⵜⵜⴰⵙ ⵏⵏⵙ ⴰⴷ ⵜⵙⵎⵓⵏ ⵜⵓⴳⵜⵜ ⵏ ⵉⵎⴰⵔⴰⵜⵏ ⴷ ⵉⵎⵙⵏⴼⵍⵓⵍⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵔⵇⴱ ⵏⵏⵙⵏ ⴷ ⵓⵙⵏⵎⵉⵍⵉ ⵏ ⵉⵏⵎⵓⵇⵇⴰⵔⵏ ⵏⴳⵔⴰⵜⵙⵏ ⴷ ⵏⴳⵔ ⵉⵎⵖⵔⵉⵜⵏ ⴷ ⵜⵡⵉⵙⵉ ⴳ ⵓⵙⵎⵓⵜⵜⴳ ⵏⵏⵙ ⵉ ⵡⵓⵍⵓⵢ ⵙ ⵓⵙⵡⵉⵔ ⵏⵏⵙⵏ ⴳ ⵢⵉⴳⵔ ⴰⵙⵏⴼⵍⵓⵍⴰⵏ ⴷ ⵓⵙⵏⵉⵍⵙⴰⵏ ⴳ ⵢⴰⵏ ⵓⵎⵏⴰⴹ ⵉⵜⵜⵡⴰⵢⵙⵙⴰⵏⵏ ⵙ ⵉⵎⵓⵜⵜⵉⵢⵏ ⵉⴷⵓⵙⵏ ⵏ ⵜⵎⴰⵣⵉⵖⵜ ⵙⴳ ⵓⵎⵉⵡⴰⵏ ⵙ ⵓⵎⵉⵔⴰⵢ, ⵓⵢⴰ ⴰⴽⴽⵯ ⴳ ⵓⵙⴰⵜⵉ ⵏ ⵓⵎⵏⵣⴰⵢ ⴰⵏⴼⴰⴳ ⵉⵡⴰⵜⵙⵏ ⴰⴷ ⵉⵜⵜⵓⵙⴽⴰⵔ ⴳ ⵢⴰⵜ ⵜⴳⵔⵓⵎⵎⴰ ⵏ ⵉⵎⴰⵔⴰⵜⵏ ⴷ ⵉⵎⵙⵏⴼⵍⵓⵍⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵢⴰⵜ « ⵜⵡⵊⴰ ⵜⴰⵎⵥⵢⴰⵏⵜ ».

ⴳ ⵡⵉⵙ ⴽⵕⴰⴹ, ⵜⴰⵡⵓⵔⵉ ⵜⴰⵎⴰⵏⴰⵡⵜ ⵏⵏⴰ ⵜⵍⴽⵎ ⵜⵣⵍⵖⴰ ⴳ ⵢⵉⴳⵔ ⵏ ⵜⵉⵔⵔⴰ ⵙ ⵜⵎⴰⵣⵉⵖⵜ ⴳ ⵜⵉⵣⵉ ⵏⵏⴰ ⴷ ⵉⴹⴼⵕⵏ ⴰⵙⴱⴷⴷⵉ ⵏⵏⵙ ⴳ 10 ⵢⵓⵍⵢⵓⵣ 2009, ⵓⵢⴰ ⴰⵔ ⵜ ⵎⵎⴰⵍⵏ ⵜⵓⴳⵜⵜ ⵏ ⵜⵙⵏⵜⴰⵢ ⵜⵉⵏⴰⵡⴰⵏⵉⵏ ⵏⵏⴰ ⵜⵙⵙⴳⵎⴰ ⵉ ⵚⴰⵃⴰ ⵏ ⵓⴷⵍⵉⵙ ⴷ ⵉⴼⴼⵖⵏ ⵙ ⵜⵎⴰⵣⵉⵖⵜ.

ⵜⵖⴰⵎⴰ ⵜⵡⴰⵔⴳⵉⵜ ⵏ ⵓⵙⴱⴷⴷⵉ ⵏ ⵢⴰⵏ ⵓⵙⴰⵜⵉ ⵓⵖⵔⵉⵎ ⵏⵏⴰ ⵜⵜ ⵢⵉⵡⵉⵏ ⵙ ⵜⵓⵥⵍⴰⵢⵜ ⴳ ⵉⵙⴽⴽⵉⵏⵏ ⵏ ⵓⴷⵍⵉⵙ ⴰⵎⴰⵣⵉⵖ ⴷ ⵙ ⵜⵎⵙⵓⵜⴰⵍ ⵏ ⵉⴷ ⴱⴰⴱ ⵏⵏⵙ, ⵜⵙⵙⵓⵜⵍ ⵉ ⵜⵓⴳⵜⵜ ⵣⵖ ⵜⵙⵙⵏⵜⴰ ⵜⵖⵏⵙⴰ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ, ⵜⵏⴼⵍ ⵜⵡⴰⵔⴳⵉⵜ ⴰⴷ ⵙ ⵓⵙⵏⵜⵍ ⵏ ⵓⵎⵔⴰⵔⴰ ⵏ ⵡⴰⵡⴰⵍ ⴰⴳⴷⵓⴷⴰⵏ ⴰⵎⴰⵜⴰⵢ ⵜⵉⵣⵉ ⵏⵏⴰ ⵉⵜⵜⵓⵙⵏⵎⴰⵍⴰ ⵛⴰ ⵏ ⵓⵏⵎⵓⵇⵇⴰⵔ ⵉⵙⴰⵡⴰⵍⵏ ⵅⴼ ⵜⵎⴰⵣⵉⵖⵜ ⴳ ⵢⴰⵜ ⵜⵙⴳⴰ ⴳ ⵜⵙⴳⴳⵉⵡⵉⵏ ⵏⵏⵙ, ⵓⴳⴳⴰⵔ ⵏ ⵎⴰⵢⴰ ⴷ, ⵜⴰⵡⴰⵔⴳⵉⵜ ⵍⵍⵉ ⵉⵙ ⵜⴳⴰ ⵢⴰⵏ ⵓⵙⵖⵍⴼ ⴷ ⵢⴰⵏ ⵓⵜⵜⵔ ⵙ ⵜⵣⵣⵉⴳⵣⵜ ⵏⵏⴰ ⵜⵉⵡⴹ ⵜⵉⵔⵔⴰ ⵙ ⵜⵎⴰⵣⵉⵖⵜ ⵙⴳ ⵜⴳⵉⵔⴰ ⵏ ⵜⵚⴹⵉⵎⵔⴰⵡⵉⵏ ⵙ ⵓⵙⴳⵓⴷⵉ ⵏ ⵜⴼⵉⴼⵖⵉⵏ ⴷ ⵜⴰⵜⵜⵓⵢⵜ ⵏ ⵉⵎⴹⴰⵏⵏ ⵏ ⵡⵉⴷ ⵜⵜ ⵢⵉⵡⵉⵏ ⴳ ⵜⵉⵔⵔⴰ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ. ⵜⵉⵏⴷⵉ ⵏ ⵜⵡⴰⵔⴳⵉⵜ ⴰⴷ ⵏⵏⴰ ⵉⵙⵙⵏⵜⵉⵏ ⵉⵎⵉⴽⴽ ⵙ ⵉⵎⵉⴽⴽ ⵣⵖ ⵓⵎⴷⴰⵏ ⴰⴼⴰⴷ ⴰⴷ ⵢⴰⵎⵥ ⴰⴼⵔⵉⵙ ⴰⴳⵔⴰⵡⴰⵏ ⵜⴼⴰⵡ ⵓⵍⴰ ⵍⵍⵉⵖ ⵜⴳⴰ ⵜⵖⵓⵔⵉ ⵙ ⵜⵉⵔⵔⴰ ⵙ ⵜⵎⴰⵣⵉⵖⵜ ⵉⴳⴳⵉ ⵖⵏⵙⴰⵏ ⵓⵔ ⵜⴷⵔⵓⵙ ⵜⵉⵏⴷⵉ ⵏⵏⵙ ⵅⴼ ⵉⵙⵓⵜⴰⵔ ⴷ ⵡⴰⵏⵏⴰⵍⵏ ⵏ ⵜⵖⵏⵙⴰ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ.

ⵜⵉⵣⵉ ⵍⵍⵉⵖ ⵉⴽⵛⵎ ⵢⵓⵍⵢⵓⵣ 2009, ⵓⵔ ⵜⵖⴰⵎⴰ ⵜⵡⵏⴳⵉⵎⵜ ⴰⴷ ⵎⵓⵏⵏ ⵉⵎⵙⵏⴼⵍⵓⵍⵏ ⵙ ⵜⵎⴰⵣⵉⵖⵜ ⴷ ⵜⴰⵡⵉⵜ ⴳ ⵉⵙⴽⴽⵉⵏⵏ ⴷ ⵜⵎⵙⵓⵜⴰⵍ ⵏ ⵓⵙⵏⴼⵍⵓⵍ ⴰⵎⴰⵣⵉⵖ ⵖⴰⵙ ⵜⴰⵡⴰⵔⴳⵉⵜ ⵜⴰⵎⴷⴰⵏⵜ ⵏⵉⵖ ⵜⴰⴳⵔⴰⵡⴰⵏⵜ, ⵉⵙ ⵜⴳⴰ ⵜⵉⴷⵜ ⵜⴰⵏⵉⵍⴰⵡⵜ ⵍⵍⵉⵖ ⵉⵙⴷⵍ ⵓⴳⴰⴷⵉⵔ ⵜⵉⵍⴰⵍ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵙⴱⴷⴷⵉ ⵏ ⵜⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ.

ⵙⴳ ⵜⵡⵓⵔⵉ ⵉⴳⴰⵏ ⵡⴰⵥ ⵉⴳⴰⵏ ⵜⴰⵎⴰⵏⴰⵡⵜ ⴷⴰ ⵜⵙⴽⵔ ⵜⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⵣⵖ ⵓⵙⴱⴷⴷⵉ ⵏⵏⵙ ⴰⵔ ⴰⵙⵙ ⴰⴷ, ⵜⵙⵙⵉⵙⴼⵉⵡ ⵉⵙ ⵜⴳⴰ ⵢⴰⵏ ⵓⵏⴳⵎⴰⵎ ⵙⴳ ⵉⵏⴳⵎⴰⵎⵏ ⵏ ⵡⴰⵎⵓⵏ ⵓⵖⵔⵉⵎ ⴰⵎⴰⵣⵉⵖ, ⵜⵙⵙⵉⵙⴼⵉⵡ ⵓⵍⴰ ⵉⵙ ⴷⴰⵔⵙ ⵢⴰⵏ ⵓⴼⵔⴰⴽ ⴰⵜⵔⴰⵔ ⵙ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ, ⵜⵙⵡⵓⵔⵉ ⵅⴼ ⵜⴰⵡⵉⵜ ⵙ ⵢⵉⵙⴳⵔ ⴰⴷⵍⵙⴰⵏ ⴰⵎⴰⵣⵉⵖ ⴳ ⵓⴼⵔⴷⵉⵙ ⵏⵏⵙ ⴰⵙⵏⴼⵍⵓⵍⴰⵏ ⴰⵡⵏⴳⵉⵎ ⴰⵙⵏⵉⵍⵙⴰⵏ … ⵙⵖ ⵓⵙⴱⴷⴷⵉ ⵏⵏⵙ, ⵜⵙⵔⵙ ⵜⵣⵍⵖⴰ ⵏ ⵜⵉⵔⵔⴰ ⴰⵎ ⴰⵡⵜⵜⴰⵙ ⴰⵎⵇⵇⵔⴰⵏ, ⴰⴷ ⵜⵙⵏⴰⵔⴰ ⴰⴷⵍⵉⵙ ⴰⵎⴰⵣⵓⵖ, ⵜⵙⴳⵓⴷⵉ ⵉ ⵓⵡⵜⵜⴰⵙ ⴰⴷ ⵜⴰⴷⵖⵔⵜ ⵏ ⵉⵎⵙⵏⴼⵍⵓⵍⵏ ⴷ ⵉⵎⴰⵔⴰⵜⵏ ⴷ ⵉⵎⵙⵡⵉⵏⴳⵉⵎⵏ ⴷ ⵉⵎⵔⵣⵓⵜⵏ, ⵜⵙⵔⵙ ⵉⵖⴰⵡⴰⵙⵏ (ⴰⵀⵉⵍⵏ) ⵏ ⵜⵡⵓⵔⵉ ⵉⵎⵢⴰⵏⴰⵡⵏ, ⵎⴽⵍⵍⵉ ⵜⵙⴽⵔ ⵜⵉⵎⴷⵔⴰⵡⵉⵏ ⵜⵉⵎⴰⵏⴰⵡⵉⵏ ⴰⴽⴷ ⵜⵓⴳⵜⵜ ⵏ ⵉⵏⴳⵎⴰⵎⵏ ⴷ ⵜⵎⵔⵙⴰⵍ (ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵜⴰⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴳ ⵜⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⴳ ⵓⴳⴰⴷⵉⵔ, ⴷ ⵜⵎⴰⵡⴰⵙⵜ ⵏ ⵜⴷⵍⵙⴰ…) ⵜⵙⴽⵔ ⵜⵉⵙⵏⵜⴰⵢⵉⵏ ⵉⵜⵜⵢⴰⵡⵥⵍⴰⵢⵏ ⴷ ⵏⵏⴰ ⵊⵊⵓ ⵓⵔ ⵉⵜⵜⵡⴰⵢⵥⵕⴰⵏ ⵉⵍⵉⵏⵜ ⴷⵔⴰⵙ ⵢⴰⵏ ⵓⴷⵔⵉⵙ ⵉⴼⴰⵡⵏ ⴳ ⵓⵙⵙⵉⵖⵎⵔ ⵙ ⵡⴰⴷⴷⴰⴷ ⵏ ⵓⴷⵍⵉⵙ ⴰⵎⵉⵔⴰⵢ ⵙ ⵜⵎⴰⵣⵉⵖⵜ.

ⴳ ⵢⵉⴳⵔ ⴰⵎⵥⵏⵥⵕ, ⵜⵙⵏⵜⴰ ⵜⵣⵍⵖⴰ ⵏ ⵜⵉⵔⵔⴰ ⵜⵙⴽⵔ ⴰⵙⴷⴷⵉ ⵏ ⵉⵏⵎⵓⵇⵇⴰⵔⵏ ⵉⵏⵏⵓⵕⵥⵎⵏ ⴷ ⵜⵉⵏⴰⵡⵉⵏ ⵜⵉⵎⵥⵍⴰⵢ ⴷ ⵜⴼⵓⴳⵍⵉⵡⵉⵏ ⵉⵜⵜⵡⴰⵢⵥⵍⴰⵢⵏ ⵙ ⵓⵙⵎⵏⵉⴷ ⴷ ⵓⵙⴳⵎⴹ ⵏ ⵜⴼⵉⴼⵖⵉⵏ ⴷ ⵉⴷⵍⵉⵙⵏ ⵉⵎⴰⵢⵏⵓⵜⵏ ⴳ ⵢⵉⴳⵔ ⵏ ⵜⵔⵉⵡⴰⵏⵜ ⵏⵉⵖ ⵜⴰⵎⴷⵢⴰⵣⵜ, ⵙ ⵎⴽⴰⴷ ⵙⵎⴽⵍⵏⵜ ⵜⵉⵍⴰⵍ ⴰⴷ ⵜⵓⴳⵜⵜ ⵏ ⵉⵙⴳⵓⵎⵏ ⵏⵏⴰ ⵖⵓⵔ ⵜⴰⵣⴷⴰⵢⵜ ⵉⴷⵓⵙⵏ ⵙ ⵜⵎⵙⴰⵔⵉⵏ ⵏ ⵜⵉⵔⵔⴰ ⵙ ⵜⵎⴰⵣⵉⵖⵜ ⵣⵓⵏ ⴷ: ⵎⴰⵏ ⵜⴰⵢⴰⴼⵓⵜ, ⵜⵓⵜⵍⴰⵢⵜ ⵏ ⵜⵉⵔⵔⴰ ⵙ ⵜⵎⴰⵣⵉⵖⵜ, ⵜⵉⵔⵎⵉⵜ ⵜⴰⵎⴷⵢⴰⵣⵜ ⵜⴰⵜⵔⴰⵔⵜ ⵙ ⵜⵎⴰⵣⵉⵖⵜ, ⵜⵉⵔⵎⵉⵜ ⵏ ⵜⵓⵍⵍⵓⵙⵜ ⵙ ⵜⵎⴰⵣⵉⵖⵜ, ⵜⵉⵔⵎⵉⵜ ⵏ ⵡⵓⵏⴳⴰⵍ ⵙ ⵜⵎⴰⵣⵉⵖⵜ, ⵜⴰⵙⴽⵍⴰ ⵏ ⵡⴰⵣⵣⴰⵏ ⵜⴰⵎⴰⵣⵉⵖⵜ, ⵜⴰⵙⴽⵍⴰ ⵜⴰⵡⵜⵎⴰⵏⵜ ⵙ ⵜⵎⴰⵣⵉⵖⵜ…

ⵙ ⵓⵙⵉⵙⵏ ⵙ ⵉⵣⵡⵍⵏ ⵉⵙⴽⵍⴰⵏⵏ ⵉⵎⴰⵢⵏⵓⵜⵏ ⵙ ⵡⴰⵏⴰⵡⵏ ⵏⵏⵙⵏ, ⵜⵙⵡⵓⵔⵉ ⵜⵣⵍⵖⴰ ⵏ ⵜⵉⵔⵔⴰ ⵅⴼ ⵓⵙⵖⵉⵡⵙ ⵏ ⵉⵏⵎⵓⵇⵇⴰⵔⵏ ⵉⵜⵜⵢⴰⵡⵕⵥⴰⵎⵏ ⵏⴳⵔ ⵉⵎⴰⵔⴰⵜⵏ ⴷ ⵉⵎⵙⵏⴼⵍⵓⵍⵏ ⴳ ⵢⴰⵜ ⵜⵙⴳⵏⴰ, ⴷ ⵏⴳⵔ ⵉⵎⵖⵔⵉⵜⵏ ⴳ ⵜⵙⴳⴰ ⵢⴰⴹⵏ. ⴳ ⵓⵙⴰⵜⵉ ⴰⴷ ⵏⵉⵜ, ⵜⵙⵏⵎⴰⵍⴰ ⵜⵓⴳⵜⵜ ⵏ ⵉⵙⴼⵙⴰⵔ ⴷ ⵜⵉⵡⵙ ⴳ ⵜⵓⴳⵜⵜ ⵏ ⵉⵖⴳⵯⵎⵎⵉⵜⵏ ⵉⴷⵖⴰⵔⴰⵏⵏ ⴷ ⵉⵏⵎⵏⴰⴹⵏ ⴷ ⵉⵏⴰⵎⵓⵔⵏ ⵉ ⵚⴰⵃⴰ ⵏ ⵓⵙⵉⵙⵏ ⵙ ⵓⵎⴰⵢⵏⵓ ⵏ ⵓⴷⵍⵉⵙ ⴰⵎⴰⵣⵉⵖ.

ⴰⵛⴽⵓ ⵜⴼⵍⵙ ⵜⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⵎⴰⵙ ⴷ ⵜⴰⵡⵉⵜ ⵅⴼ ⵜⵉⵔⵔⴰ ⵙ ⵜⵎⴰⵣⵉⵖⵜ ⵓⵔ ⵉⴳⵉ ⴰⵙⴽⴽⵉⵏ ⵙⵉⵙ ⵉⵥⵍⵉⵏ ⵖⴰⵔ ⵏⵜⵜⴰⵜ, ⵉⵙ ⴷ ⵉⵇⵇⴰⵏ ⴰⴷ ⵉⴳ ⴰⵙⴽⴽⵉⵏ ⴰⴳⵔⴰⵡⴰⵏ ⵉⴽⵛⵎ ⵙⴳ ⵉⵙⵎⴽⴰⵍ ⵏ ⵉⵎⴰⵣⵣⴰⵍⵏ ⴰⴽⴽⵯ ⵖ ⵍⵍⴰⵏⵜ ⵜⵎⵔⵙⴰⵍ ⵜⵉⵎⴰⴷⴷⵓⴷⵉⵏ, ⵎⴽⴽⵍⵉ ⵙ ⵜⴼⵍⵙ ⵓⵍⴰ ⵙ ⵜⵡⵓⵔⵉ ⵜⴰⵏⵊⵎⵓⵜ ⴷ ⵜⴳⵔⴰⵡⴰⵏⵜ ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⴰⴷⵍⵙⴰⵏ… ⵜⵙⵙⵏⵜⴰ ⵙ ⵓⵙⵎⵓⵙⵙⵓ ⵏ ⵜⵓⴳⵜⵜ ⵏ ⵜⵉⵍⴰⵍ ⵜⵉⴱⵕⴰⵏⵉⵢⵉⵏ ⵏⵏⴰ ⵉⵙⵎⴽⵍⵏ ⵉⵙⵏⵜⴰⵍ ⴰⵎ: ⵜⵉⵔⵔⴰ ⵜⴰⵙⴽⵍⴰⵏⵜ, ⴰⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵉⵎⴰⵙⴰⵢⵏ ⵉⴱⵉⴷⴰⴳⵓⵊⵉⵢⵏ, ⵜⴰⵙⴽⵍⴰ ⵜⴰⵎⴰⵣⵉⵖⵜ, ⵜⵉⵔⵔⴰ ⵜⴰⵙⴽⵍⴰⵏⵜ ⵜⴰⵎⴰⵣⵉⵖⵜ ⴷ ⵓⵙⵎⵙⴰⵙⴰ ⴰⵙⵏⵉⵍⵙⴰⵏ, ⵜⴰⵡⵍⴰⴼⵜ ⵜⴰⵎⴷⵢⴰⵣⴰⵏⵜ ⴳ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ, ⵜⴰⵙⴽⵍⴰ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ, ⴰⵙⴰⵙⵓ (ⵜⴰⴱⵕⵏⵉⴹⵜ) ⴰⵙⴽⵍⴰⵏ ⵙ ⵜⵎⴰⵣⵉⵖⵜ.

ⵓⵔ ⵖⴰⵎⴰⵏⵜ ⵜⵉⵍⴰⵍ ⴰⴷ ⵅⴼ ⵢⵉⴳⵔ ⴰⴽⴰⵍⴰⵏ ⵏⵏⴰ ⵖ ⵉⵜⵜⵓⵙⴽⴰⵔ ⵓⵙⴱⴷⴷⵉ ⵏ ⵜⵣⵍⵖⴰ, ⵉⵙ ⴰⴽⴽⵯ ⵜⵙⵙⵓⵜⵍ ⵉ ⵜⵓⴳⵜⵜ ⵏ ⵜⵖⵔⵎⵉⵏ ⴷ ⵜⵙⴳⴳⵉⵡⵉⵏ ⵜⵉⵎⵖⵔⴰⴱⵉⵢⵉⵏ ⵖ ⵜⵍⵍⵣ ⵜⵣⵏⵉⵜ, ⵜⴰⵔⵓⴷⴰⵏⵜ, ⵕⵕⴱⴰⵟ, ⴱⵉⴳⵯⵔⴰ, ⴱⵍⴼⴰⵄ, ⵡⴰⵔⵣⴰⵣⴰⵜ … ⵜⴻⵜⵜⵓⵙⴽⴰⵔⵏⵜ ⵙ ⵓⵣⴷⴰⵢ ⴰⴽⴷ ⵜⵓⴳⵜⵜ ⵏ ⵉⵎⴰⵣⵣⴰⵍⵏ ⵓⵖⵔⵉⵎⵏ ⵏⵉⵖ ⵉⵎⴰⴷⴷⵓⴷⵏ ⵖ ⵜⵍⵍⴰ ⵜⴽⴰⴷⵉⵎⵉⵜ ⵏ ⵙⵓⵙ ⵎⴰⵙⵙⵜ ⵉ ⵓⵙⴳⵎⵉ ⴷ ⵓⵙⵎⵓⵜⵜⴳ, ⵜⴰⵎⵀⵍⴰ ⵜⴰⵏⵎⵏⴰⴹⵜ ⵏ ⵜⴷⵍⵙⴰ ⴳ ⵓⴳⴰⴷⵉⵔ, ⵜⴰⴳⵔⴰⵡⵜ ⵜⴰⵖⵔⵎⴰⵏⵜ ⵏ ⵓⴳⴰⴷⵉⵔ, ⵜⴰⵎⵙⵎⵓⵏⵜ ⵏ ⵢⵉⵍⵉⵖ, ⵜⴰⵎⵙⵎⵓⵏⵜ ⵜⴰⵎⴰⵢⵏⵓⵜ, ⵜⴰⴽⴰⴷⵉⵎⵉⵜ ⵜⴰⵏⵎⴱⴰⴹⵜ ⵉ ⵓⵙⴳⵎⵉ ⴷ ⵓⵙⵎⵓⵜⵜⴳ ⵙⵓⵙ ⵎⴰⵙⵙⵜ, ⴰⵙⵉⵏⴰⵏ ⵏ ⵓⵙⵎⴷⵉ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⴳ ⵜⵔⵓⴷⴰⵏⵜ, ⵜⴰⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴳ ⵓⴳⴰⴷⵉⵔ, ⴰⵙⴳⵔⴰⵡ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵜⵖⵉⵡⴰⵏⵜ ⵏ ⵜⵙⴽⵍⴰ ⴳ ⵓⴳⴰⴷⵉⵔ, ⵜⴰⵎⵙⵎⵓⵏⵜ ⵉⵏⵓⵔⴰⵣ, ⵜⴰⵙⵖⵓⵏⵜ ⵜⴰⵙⴽⵍⴰⵏⵜ ⴳ ⵍⵎⵖⵔⵉⴱ, ⵜⴰⵎⵙⵎⵓⵏⵜ ⵜⵉⴼⴰⵡⵜ, ⵜⴰⴳⵔⴰⵡⵜ ⵏ ⴱⵍⴼⴰⵄ…

ⵉ ⵓⵏⵣⴰⵍ ⴷ ⵓⵙⵔⵇⴱ ⵏ ⵉⵎⴰⵔⴰⵜⵏ ⴳ ⵢⵉⴳⵔ ⵏ ⵜⵉⵔⵔⴰ ⵙ ⵜⵎⴰⵣⵉⵖⵜ ⵙⵍⴰⵡⴰⵏ ⴰⴽⴽⵯ ⵜⴰⴳⵔⵓⵎⵎⴰ ⵏ ⵉⵄⵔⵔⵉⵎⵏ ⵉⵎⵙⵏⴼⵍⴰⵍ, ⵜⵕⵥⵎ ⵜⵉⵔⵔⴰ ⵜⴰⵙⵎⵖⵓⵔⵜ ⵏⵏⵙ ⵜⴰⵡⵜⵎⴰⵏⵜ ⴳ ⵢⵉⴳⵔ ⵏ ⵓⵙⵏⴼⵍⵓⵍ ⵙ ⵜⵎⴰⵣⵉⵖⵜ, ⵜⵙⵙⵓⵜⵍ ⵉ ⵢⵉⴳⵔⴰⵏ ⵉⵙⵏⴼⵍⵓⵍⵏ ⴷ ⵉⴷⴷⴰⵏ: ⵜⴰⵎⴷⵢⴰⵣⵜ, ⵓⵏⴳⴰⵍ, ⵜⵓⵍⵍⵉⵙⵜ, ⴰⵎⵣⴳⵓⵏ, ⵜⴰⵙⴽⵍⴰ ⵏ ⵡⴰⵣⵣⴰⵏ, ⴰⵎⵃⵉⵣⵡⴰⵔ ⴰⵙⴽⵍⴰⵏ ⵉⵙⵙⵏⵜⵉ ⵣⵖ 2010 ⵉⵍⴽⵎ ⴰⵔ ⵖⵉⵍⴰ ⴷ ⵜⴰⵙⵓⵜⵍⵜ ⵏⵏⵙ ⵜⵉⵙ ⴽⴽⵓⵥⵜ, ⴰⵔ ⵉⵜⵜⵓⵙⴽⴰⵔ ⵓⵙⵉⴳⴳⵣ ⴷ ⵓⴼⵙⵔ ⵏ ⵜⵡⵓⵔⵉⵡⵉⵏ ⴰⴽⴽⵯ ⵜⵉⵙⴽⵍⴰⵏⵉⵏ ⵉⵏⵏⵔⴰⵏ, ⵙ ⵓⵢⴰ ⵜⵉⵡⵙ ⵜⵣⵍⵖⴰ ⴳ ⵓⵙⵉⵔⵉⵡ (ⴰⵙⴱⵓⵖⵍⵓ) ⵏ ⵡⴰⵢⴷⴰ ⵏ ⵜⵥⵕⵉⴳⵉⵏ ⵜⵉⵎⵙⵏⴼⵍⵓⵍⵉⵏ ⴷ ⵉⴼⴼⵖⵏ ⵙ ⵜⵎⴰⵣⵉⵖⵜ. ⵙ ⵜⵎⵔⵏⵓⵜ ⵏ ⵜⵡⵓⵔⵉ ⵏⵏⵙ ⵅⴼ ⵓⴼⵙⵔ ⵏ ⵜⵥⵕⵉⴳⵉⵏ ⴷ ⵉⴷⵍⵉⵙⵏ ⵏ ⵜⵓⴳⵜⵜ ⵏ ⵉⵎⵙⵏⴼⵍⵓⵍⵏ ⵉⵡⴰⵍⴰⵏ ⵉ ⵜⵣⵖⵍⴰ ⵙⵍⴰⵡⵏ ⴰⴽⴽⵯ ⴳⵉⵙⵏ ⵉⵄⵔⵔⵉⵎⵏ, ⵜⵙⵙⴷⵓⵙ ⵜⵎⴷⵔⴰⵡⵜ ⵜⴰⵎⴰⵏⴰⵡⵜ ⵏⵏⴰ ⵉⵣⴷⵉⵏ ⵜⴰⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⴰⴽⴷ ⵜⵎⴰⵡⴰⵙⵜ ⵏ ⵜⴷⵍⵙⴰ ⵜⴰⵙⴳⴰ ⴰⴷ.

ⵉ ⵓⵙⴷⵓⵙ ⵏ ⵓⵏⵢⴰⵍⴽⴰⵎ ⴰⴽⴷ ⵉⵎⴰⵔⴰⵜⵏ ⵏⵏⴰ ⴰⵙ ⵉⵡⴰⵍⴰⵏ, ⵜⵎⵢⴰⵔ ⵜⵣⵍⵖⴰ ⵣⵖ ⵓⵙⴱⴷⴷⵉ ⵏⵏⵙ ⴰⴷ ⵜⵙⵏⵎⵉⵍⵉ ⵉⵎⵥⵕⵉⵜⵏ ⵉⵏⵢⴰⵍⴽⴰⵎⵏ ⴷ ⵉⵎⴰⵔⴰⵜⵏ ⵉⵎⵍⵜⴰⵖ , ⴰⵔ ⵉⵜⵜⵓⵙⴽⴰⵔ ⵢⴰⵏ ⵓⵏⵎⵓⵇⵇⴰⵔ ⴰⵏⴰⵎⵓⵔ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⵏⵏⴰ ⵢⵓⵎⴰⵏ ⴰⵙⵉⵙⵏ ⴷ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵜⵎⴰⵢⵏⵓⵜⵉⵏ ⵏ ⵜⵣⵍⵖⴰ, ⴷ ⵜⵉⵍⴰⵍ ⵜⵉⴷⵍⵙⴰⵏⵉⵏ ⵜⵉⵎⵥⵏⵥⴰⵕ ⵍⵍⵉ ⵔⴰⴷ ⴷ ⵉⴽⴽ ⴷⴰⵜ.

*ⵙ ⵓⴼⵔⴰⴽ ⵏⵏⵙ ⵉⴷⵓⵙⵏ ⵙ ⵜⵉⵏⴷⵉ ⵏ ⵓⵙⵎⵓⵜⵜⴳ ⵏ ⵉⵎⵙⵏⴼⵍⵓⵍⵏ ⴳ ⵢⵉⴳⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ (ⵜⴰⵊⵕⵕⵓⵎⵜ, ⴰⵙⴼⵜⵉ, ⴰⵎⵙⴰⵡⴰⴹ, ⴰⵙⵏⵎⴰⵔⵔⴰ, ⴰⵙⵎⵙⴰⵙⴰ ⴰⵙⵏⵉⵍⵙⴰⵏ …) ⵙ ⵜⵎⵔⵏⵓⵜ ⵏ ⵜⵉⵏⴷⵉ ⵏ ⵓⵙⵎⵓⵜⵜⴳ ⵏ ⵉⵎⵙⵏⴼⵍⵓⵍⵏ ⵉⵄⵔⵔⵉⵎⵏ ⴳ ⵎⴰⴷ ⵉⵥⵍⵉⵏ ⵙ ⵜⴱⵔⵉⴷⵉⵏ (ⵜⵉⵜⵉⴽⵏⵉⵢⵉⵏ) ⵏ ⵜⵉⵔⵔⴰ ⵜⴰⵎⵙⵏⴼⵍⵓⵍⵜ ⵙⵍⴰⵡⴰⵏ ⴰⴽⴽⵯ ⵜⵉⵔⵔⴰ ⵏ ⵓⵎⴰⴳⵔⴰⴷ ⴰⵏⵖⵎⴰⵙ ⵙ ⵜⵎⴰⵣⵉⵖⵜ, ⴷ ⵓⵍⴰ ⵜⵉⵔⵔⴰ ⵏ ⵜⵓⵍⵍⵉⵙⵜ ⴳⵣⵣⵓⵍⵏ, ⵢⵉⵍⵉ ⵓⵙⵎⵓⵏ ⵏ ⵜⵢⴰⴼⵓⵜⵉⵏ (ⵉⴼⴰⵔⵙⵏ) ⵖⵓⴷⴰⵏⵉⵏ ⴳ ⵜⵙⵓⵜⴰⵍ ⵏ ⵓⵙⵎⵓⵜⵜⴳ, ⴼⴼⵖⵏⵜ ⴷ ⴳ ⵜⵥⵕⵉⴳⵉⵏ ⵉⵥⵍⵉⵏ ⵙ ⵓⴼⵔⵉⵙ ⴰⴳⵔⴰⵡⴰⵏ ⵉⵙⴱⵓⵖⵍⵓ ⵜⴰⴽⴰⴼⵓⵜ ⵜⴰⵎⴰⵣⵉⵖⵜ.

ⴰⵢⵢⵓⵣ ⵉ ⵉⵙⵔⴷⴰⵙⵏ ⵏⵜⵍⵏⵉⵏ ⴳ ⵜⵣⵍⵖⴰ ⵏ ⵜⵉⵔⵔⴰ, ⴷ ⵉ ⵜⵎⴰⵔⴰⵜⵉⵏ ⴷ ⵉⵎⴰⵔⴰⵜⵏ ⵅⴼ ⴽⵓ ⵜⴰⴳⵓⵔⵉ ⵏⵏⴰ ⵉⵣⵎⵎⴻⵎ ⵓⵖⴰⵏⵉⴱ ⵏⵏⵙⵏ.