ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵏⵏⵓⵕⵥⵎ ⵓⵏⴽⵛⴰⵎ ⵜⴰⵏⴼⵓⵍⵜ ⵏⵏⵙ ⵜⴰⵔⵣⵣⵓⵜ ⵙ ⵓⵙⴽⵜⵉ ⵙ ⵓⵎⵏⴰⴹ ⵏ ⵜⵉⵔⵎⵉⵜ ⵏ ⵓⵡⴰⵏⴽ ⴰⵎⵖⵔⴰⴱⵉ ⴰⴷ ⵜⵙⴽⵔ ⴰⵎⵙⴼⵔⵓ ⴷ ⵢⵉⵙⴳⵔ ⴰⵎⴰⵣⵉⵖ, ⵉⵏⵏⴰ ⵎⴰⵙ ⵜⴳⴰ ⵜⵉⵣⵡⵉⵔⵉ ⵏ ⵜⴰⵡⵉⵜ ⵏ ⵜⵉⴷⵜ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵛⴽⴰ ⴷ ⴹⴰⵕⵜ ⵏ ⵢⵉⵏⴰⵡ ⵏ ⵓⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ 17 ⴽⵟⵓⴱⵕ 2002 ⴳ ⵓⵊⴷⵉⵔ, ⵏⵜⵜⴰ ⴰⴷ ⵉⵙⴱⴷⴷⵏ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ. ⴰⵙⵉⴷⴼ ⴰⴷ ⵉⵎⵓⵏ ⴷⵉⴷⵙ ⵢⴰⵏ ⵓⵎⵎⵏⵢⴰⴳⴰⵔ ⴰⵡⵙⵙⴰⵏ ⵅⴼ ⵜⴷⵖⵔⵉⵜ ⵏ ⵓⵡⴰⵏⴽ ⴳ ⵓⵎⴰⵙⴰⵍ ⴷ ⵓⵙⴰⵡⵔ ⴰⴷ ⴰⵎⵇⵇⵔⴰⵏ. ⵍⵍⵉⵖ ⵏⵥⵕⴰ ⵉⵙ ⵓⵔ ⵜⵍⵍⴰ ⵢⴰⵜ ⵜⴰⵡⵉⵜ ⵉⴼⴰⵡⵏ ⴷ ⵜⵉⵔⵉⵜ ⵜⴰⵙⵔⵜⴰⵏⵜ ⵏ ⵜⵉⴷⵜ ⵏⵏⴰ ⵔⴰⴷ ⵉⵙⵣⵎⵔ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⴷ ⵜⵓⵔⴰⵔ ⵜⴰⵎⵍⴰⵍⵜ ⵏⵏⵙ ⵉⵙⵎⴷⵏ ⴳ ⵜⴷⵔⴰⵡⵜ ⵏ ⵓⴱⵓⵖⵍⵓ ⴳ ⵓⵏⴰⴳⵔⴰⵡ ⴰⵙⴳⵎⴰⵏ ⴰⵏⴰⵎⵓⵔ.
ⴰⵔ ⵉⵜⵜⴰⵔⵎ ⵓⵏⴽⵛⴰⵎ ⵙⴳ ⵜⵏⴼⵓⵍⵜ ⵏⵏⵙ ⴰⴷ ⵉⵙⴽⴽⵉ ⵜⵉⴼⴰⵡⵜ ⵙ ⵎⴰⵙ ⵏⵥⴹⴰⵕ ⴰⴷ ⵏⵉⵡⴹ ⵜⴰⵣⵔⴼⵜ ⵜⴰⵙⵏⵉⵍⵙⴰⵏⵜ ⴷ ⵜⴷⵍⵙⴰⵏⵜ ⵏⴳⵔ ⵜⵓⵜⵍⴰⵢⵉⵏ ⵉⵍⵍⴰⵏ ⴳ ⵓⵎⵓⵖⵍⵉ ⴰⵎⵖⵔⴰⴱⵉ, ⴷ ⵓⵙⵙⴽⵎⴹ ⵏ ⵡⴰⵏⴰⵡ ⵏ ⵜⵣⴷⵢⴰⵜ ⵜⴰⵙⵏⵉⵍⵙⴰⵏⵜ ⵏⵏⴰ ⵉⵣⴷⵉⵏ ⵏⴳⵔ ⵙⵏⴰⵜ ⵜⵓⵜⵍⴰⵢⵉⵏ ⵜⵉⵎⴰⴷⴷⵓⴷⵉⵏ ⵏ ⵜⵎⴰⵣⵉⵔⵜ.
ⴳ ⵓⴳⵊⴷⵉ ⴰⵎⵣⵡⴰⵔⵓ, ⵉⵙⴰⵡⵍ ⵓⵙⵍⵎⴰⴷ ⴰⵏⴽⵛⴰⵎ «ⵜⴰⵙⵔⵜⵉⵜ ⵜⴰⵙⵏⵉⵍⵙⴰⵏⵜ ⴷ ⵓⵣⵔⴼ ⴰⵙⵏⵉⵍⵙⴰⵏ» ⴰⵙⵏⵎⵍ ⵏ ⵓⵔⵎⵎⵓⵙ ⵏ ⵜⵙⵔⵜⵉⵜ ⵜⴰⵙⵏⵉⵍⵙⴰⵏⵜ, ⵉⵙⴳⵣⵍ ⵎⴰⵙ ⴷ «ⴰⵙⵡⵓⴷⴷⵓ ⵉⴷⵓⵙⵏ ⵉ ⵜⵙⵔⵜⵉⵜ ⵜⴰⵙⵏⵉⵍⵙⴰⵏⵜ ⵉⴱⴷⴷ ⵅⴼ ⵓⴼⵔⴰⵏ ⵏ ⵉⵙⵔⴰⵙ ⴷ ⵜⵏⵉⵍⴰⵡⵜ ⵏ ⵉⵙⵜⴰⵢⵏ ⴷ ⵡⴰⴼⴰⵡ ⵏ ⵜⴰⵏⵏⴰⵢⵉⵏ ⴳ ⵓⵙⴰⵜⵉ ⴰⵙⵓⵜⵍⴰⵏ ⴷ ⵓⵎⵔⵙⴰⵍ». ⴳ ⵓⵙⴰⵜⵉ ⴰⴷ ⵉⵙⵎⵎⴳⵏⵜ ⴰⵙⵏⵎⵍ ⵏ ⴰⴽⵙⵉⵍ ⵀⵓⵏⵉⵜ ⵏ ⵓⵣⵔⴼ ⴰⵙⵏⵉⵍⵙⴰⵏ ⵎⴰⵙ ⵉⴳⴰ «ⵢⴰⵜ ⵜⵡⵉⵍⴰ ⴳ ⵜⵉⵡⴰⵍ ⵏ ⵜⵓⵙⵏⵜ ⵏⴳⵔ ⵉⵢⵉⵎⴰⵏⵏ, ⵙⵡⴰ ⴳ ⵓⵙⵡⵉⵔ ⵓⵍⴳⵉⵏ ⵏⵉⵖ ⴰⵙⵡⵉⵔ ⴰⵏⴰⵎⵓⵏ, ⵜⵓⵙⵏⵜ ⵜⵓⵍⴳⵉⵏⵜ ⵏⵜⵜⴰⵜ ⴰⴷ ⵔⴰⴷ ⵉⴳ ⵜⴰⵏⴼⵔⵓⵜ ⵏ ⵜⵍⴻⵍⵍⵉ ⵏ ⵉⵡⴷⴰⵏ ⴷ ⵜⵙⵉⵎⴰⵏⵜ ⵏⵏⵙⵏ ⵜⴰⵢⵉⵎⴰⵏⵜ, ⴰⵔ ⴰⵖ ⵜⵙⵡⵉⵔⵔⴰⵢ ⵙ ⵉⵣⵔⴼⴰⵏ ⵓⴼⵔⵉⴷⵏ.» …
ⴷ ⵉⵖ ⵜⵜ ⵉⵏⵏ ⵉⴽⴽⴰ ⵓⵡⴰⵏⴽ ⴰⵎⵖⵔⴰⴱⵉ ⵢⵓⵔⵎ ⴰⴷ ⵉⵎⵙⴰⵙⵜⴰⵍ ⵏⴳⵔ ⵙⵏⴰⵜ ⵜⵓⵜⵍⴰⵢⵉⵏ ⴳ ⵓⵎⵓⵖⵍⵉ ⴰⵏⵍⵙⴰⵏ, ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⵍⵍⵉⵖ ⵜⵏⵜ ⵉⵙⵡⵉⵔⵔⵉ ⴳⴰⵏⵜ ⵜⵓⵜⵍⴰⵢⵉⵏ ⵜⵉⵎⴰⴷⴷⵓⴷⵉⵏ ⵎⴰⵛⴰ ⵙ ⵢⴰⵏ ⵓⵏⵎⴰⵍⴰ ⴰⴹⵕⵚⴰⵏ ⴳ ⵓⵎⴰⴳⵔⴰⴷ ⵡⵉⵙⵙ ⵙⵎⵎⵓⵙ ⵙⴳ ⵓⴷⵓⵙⵜⵓⵔ ⵏ 2011, ⵢⵓⵔⵎ ⵓⵏⴽⵛⴰⵎ ⴰⴷ ⵉⵙⴰⵇⵙⴰ ⵜⴰⵙⵔⵜⵉⵜ ⵜⴰⵙⵏⵉⵍⵙⴰⵏⵜ ⵙⴳ ⵓⵙⴰⴳⴳⵯ ⵢⵓⵙⵎⵏ ⵅⴼ ⵡⴰⴷⴷⴰⴷ ⵏ ⴽⵓ ⵜⵓⵜⵍⴰⵢⵜ ⴰⴳⵯⵏⵙ ⵏ ⵓⴳⴰⴷⴰⵣ ⴰⵙⵏⵉⵍⵙⴰⵏ ⴳ ⵍⵎⵖⵔⵉⴱ, ⵍⵍⵉⵖ ⵉⵏⵏⴰ ⵎⴰⵙ ⴷ ⵜⵓⵜⵍⴰⵢⵜ ⵜⴰⵄⵕⴰⴱⵜ ⵜⴻⵜⵜⵓⵎⵔⵔⴰⵜ ⴳ ⵓⵙⵡⵉⵔ ⵏ ⵓⵙⴰⵢⵔⴰⵔ ⴷ ⵓⵙⵓⴽ ⴰⵎⴰⵜⴰⵢ. ⵎⵇⵇⴰⵔ ⴰⴷⴷⴰⴷ ⵏⵏⵙ ⵓⵙⵍⵉⴳ ⵉⴼⵓⵍⴽⵉⵏ ⴷ ⵓⴽⵙⴰⵢ ⵏ ⵢⴰⵏ ⵓⴱⴰⴷⴷⴰⵔ ⵓⵙⵍⵉⴳ ⵏⵏⴰ ⵔⴰⴷ ⵜⵜ ⵉⴼⵔⴳ, ⵙⵓⵍ ⵜⴰⵎⵙⴽⵉⵔⵜ ⵏⵏⵙ ⵜⴰⵏⵉⵍⴰⵡⵜ ⵜⵙⴼⵓⴳⴳⴰ ⵡⴰⵔ ⵜⴰⵣⵎⵔⵜ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴳ ⵓⵎⵣⵉⵣⵡⵔ ⵏ ⵜⵓⵜⵍⴰⵢⵜ ⵜⴰⴼⵕⴰⵏⵚⵉⵚⵜ ⵙⵍⴰⵡⵏ ⴰⴽⴽⵯ ⴳ ⵜⵎⵙⵙⵓⴳⵓⵔⵜ ⴷ ⵜⴷⵎⵙⴰ.
ⵙ ⵎⴰⴷ ⵉⵥⵍⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵎⵇⵇⴰⵔ ⵜⴳⴰ ⵜⵓⵜⵍⴰⵢⵜ ⵏ ⵓⵏⵢⴰⵍⴽⴰⵎ ⴰⴽⵓⵢⴰⵙ ⵏ ⵢⴰⵏ ⵓⴳⴷⵓⴷ ⵉⴳⴳⵓⵜ ⵏ ⵉⵎⵣⴷⴰⵖⵏ ⵏ ⵍⵎⵖⵔⵉⴱ, ⴷ ⵎⵇⵇⴰⵔ ⴼⵍⵍⴰⵙ ⵉⵣⵔⵉ ⵓⴳⴳⴰⵔ ⵏ ⵎⵔⴰⵡ ⵉⵙⴳⴳⵯⴰⵙⵏ ⵅⴼ ⵜⵎⴰⴷⴷⵓⴷⵜ ⵏⵏⵙ, ⵜⴷⴷⵔ ⵓⴽⴰⵏ ⵙⵓⵍ ⵢⴰⵏ ⵡⴰⴷⴷⴰⴷ ⵓⵔ ⵉⵙⵙⵓⵙⵎⵏ ⴳ ⵓⵎⴰⵍⵓ ⵏ ⵓⵎⵣⵉⵣⵡⵔ ⵓⵏⴳⵉⴷ ⵙⴳ ⴷⴰⵔ ⴷⴷⴰⵔⵉⵊⴰ ⵜⴰⵎⵖⵔⴰⴱⵉⵜ ⴳ ⵢⴰⵜ ⵜⵙⴳⴰ, ⴷ ⵜⵎⴰⵥⴹⴰⵢⵜ ⴳ ⵓⵙⵎⵀⵍ ⵏ ⵉⵙⴱⴷⴰⴷⵏ ⵓⵍⴳⵉⵏⵏ ⵉⵥⵍⵉⵏ ⵙ ⵓⵙⵎⵀⵍⵏ ⵓⴷⵔⵉⵣ ⴰⵎⴰⴷⴷⵓⴷ ⴳ ⵜⵙⴳⴰ ⵜⵉⵙⵙ ⵙⵏⴰⵜ.
ⴰⴳⵊⴷⵉ ⵡⵉⵙⵙ ⵙⵉⵏ, ⵉⵜⵜⵓⵥⵍⴰⵢ ⵉ ⵓⴹⴼⵓⵕ ⵏ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵓⵏⴰⴳⵔⴰⵡ ⴰⵙⴳⵎⴰⵏ ⵣⵖ ⵜⴼⵔⴽⵜ ⵏ ⵓⵙⵉⴷⴼ ⴰⵙⴳⴳⵯⴰⵙ ⵏ 2003, ⵙ ⵜⴼⵔⴽⵜ ⵍⵍⵉⵖ ⴷ ⵜⵓⴳⴳⵯⴰ ⵜⵥⵍⴰⵢⵜ ⴳ ⵜⵎⴰⵣⵉⵖⵜ, ⵙ ⵜⴼⵔⴽⵜ ⵏ ⴹⴰⵕⵜ ⵏ ⵡⵓⴼⵓⵖ ⵏ ⵓⵙⵍⴳⵏ ⵏ ⵓⵙⵏⵎⴰⵍⴰ.
ⴹⴰⵕⵜ ⵏⵏⵙ ⵉⵎⵎⴰⵜⵜⵉ ⵓⵏⴽⵛⴰⵎ ⴰⴷ ⵉⴱⴷⵔ ⵜⵉⵎⵉⵜⴰⵔ ⵏ ⵜⵣⵔⴼⵜ ⵜⴰⵙⵏⵉⵍⵙⴰⵏⵜ ⴳ ⵢⵉⴳⵔ ⵏ ⵓⵙⵍⵎⴷ, ⵍⵍⵉⵖ ⵉⵙⴽⵔ ⵢⴰⵏⵓⵎⵣⴰⵣⴰⵍ ⵏⴳⵔ ⵜⵙⴽⵯⴼⵍⵜ ⵏ ⵜⵉⵍⵉⵜ ⵏ ⴽⵕⴰⴹⵜ ⵜⵓⵜⵍⴰⵢⵉⵏ (ⵜⴰⵎⴰⵣⵉⵖⵜ, ⵜⴰⵄⵕⴰⴱⵜ ⴷ ⵜⴼⵕⴰⵏⵚⵉⵚⵜ) ⴳ ⵓⵙⵍⵎⴷ ⴰⵏⵎⵍⴰⵏ ⴷ ⵓⵙⵍⵎⴷ ⴰⵎⴰⵜⴰⵢ.
ⵉⴱⴷⴷ ⴳ ⵓⵙⴰⵔ ⵉⵍⵍⴰⵏ ⴳ ⵉⵙⵍⵎⴰⴷⵏ ⵉⵎⵥⵍⴰⵢⵏ ⵏ ⵜⵎⴰⵣⵉⵖⵜ, ⴷ ⵡⵓⵟⵟⵓⵏ ⵏ ⵉⵙⴳⴳⵯⴰⵙⵏ ⵏⵏⴰ ⵙ ⵉⵙⵖⴰⵡⵙⴰ ⵓⵙⵎⴰⵜⴰ ⴳ ⴽⵓ ⴰⵙⴰⴽⴰ ⴰⵏⵎⵍⴰⵏ, ⵙ ⵜⵎⵔⵏⵉⵡⵜ ⵏ ⵡⴰⴽⵓⴷ ⴰⵏⵎⵍⵓⵙⵙⴰⵏ ⵉⵜⵜⵓⵥⵍⴰⵢⵏ ⵉ ⴽⵓ ⵜⵓⵜⵍⴰⵢⵜ, ⵍⵍⵉⵖ ⵉⴳⴰ ⵢⴰⵏ ⴳ ⵉⵏⵎⵎⴰⵍⵏ ⵉⴷⵙⵍⴰⵏⵏ ⵏⵏⴰ ⵔⴰⴷ ⴰⵖ ⵢⴰⵊⵊ ⴰⴷ ⵏⴱⴷⴷ ⵅⴼ ⵓⵍⴽⴰⵎ ⵏ ⵜⵣⵔⴼⵜ ⵜⴰⵙⵏⵉⵍⵙⴰⵏⵜ ⵏⴳⵔ ⵜⵓⵜⵍⴰⵢⵉⵏ ⵉⵚⴽⴰⵏ ⵉ ⵓⴳⵊⴷⵉ ⵏ ⵜⵓⵜⵍⴰⵢⵉⵏ ⴳ ⵓⵙⴰⴽⴰ ⴰⵎⵏⵣⵓ, ⵉⵣⴳⵣⵍ ⴳ ⵓⵎⴳⴳⴰⵔⵓ ⵙ ⵓⵎⵣⴰⵔⴰⵢ ⵎⵇⵇⵓⵔⵏ ⵏⴳⵔ ⵜⵓⵜⵍⴰⵢⵉⵏ ⵙ ⴽⵕⴰⴹⵜ ⴳ ⵜⵙⴳⴰ ⵏ ⵜⵙⵓⴳⴰⵔ ⵜⵉⵎⵙⵡⵓⵜⵜⴰ ⴳ ⵜⴼⵉⵔⴰ ⵏ ⴽⵓ ⴰⵙⵡⵉⵔ ⴰⵏⵎⵍⴰⵏ, ⴰⵢⵍⵍⵉ ⵉⵎⵎⴰⵍⵏ ⵢⴰⵏ ⵡⴰⵏⴰⵡ ⵏ ⵡⴰⵔ ⵉⴽⵙⵉⵍ ⴳ ⵓⵙⵡⵓⵜⵜⵓ ⵏ ⵜⵙⵓⴳⴰⵔ ⵜⵉⵎⵢⴰⵡⴰⴹⵉⵏ ⵙⵡⴰ ⴳ ⵓⴳⵣⵣⵓⵎ ⵏⵏⵙ ⴰⵎⵉⵡⴰⵏ ⵏⵉⵖ ⴰⵎⵉⵔⴰⵢ.
ⴹⴰⵕⵜ ⵏ ⵓⵢⴰ, ⵉⵎⵎⴰⵜⵜⵉ ⵓⵏⴽⵛⴰⵎ ⴰⴷ ⵉⵎⵔⴰⵔⴰ ⴰⵡⴰⵍ ⵅⴼ ⵡⴰⴷⴷⴰⴷ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵡⴰⵎⵎⴰⵙⵏ ⵉⵏⵎⵏⴰⴹⵏ ⵏ ⵜⴰⵣⵣⵓⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴷ ⵓⵍⴰ ⴰⵙⵍⵎⴷ ⴰⵙⴷⴰⵡⴰⵏ, ⴷ ⵎⴰⴷ ⵉⵥⵕⵕⴰ ⴳ ⵉⴱⴱⴰⵢⴹⴰⵕⵏ ⴳ ⵉⵍⵍⴰ : ⵡⴰⵔ ⴰⵙⵎⴰⵜⴰ ⵏ ⵜⵣⵓⵏⵉ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵡⴰⵎⵎⴰⵙⵏ ⵉⵏⵎⵏⴰⴹⵏ ⵏ ⵜⴰⵣⵣⵓⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴷ ⵓⵙⵉⴷⴼ ⵏ ⵜⴳⵣⵣⵓⵎⵜ ⵉⵥⵍⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⴰⴽⴰ ⵏ ⵜⵎⵙⵙⵓⴳⵓⵔⵜ ⵜⴰⵙⴳⵎⴰⵏⵜ…
ⴳ ⵜⵙⴷⴰⵡⵉⵢⵉⵏ ⵏⵜⵜⵏⵜⵉ, ⵉⵖⴰⵎⴰ ⵡⵓⵟⵟⵓⵏ ⵏ ⵜⵖⵉⵡⴰⵏⵉⵏ ⵏⵏⴰ ⴳ ⵜⵍⵍⴰ ⵜⵣⵓⵏⵉ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵛⵃⴰ ⴱⴰⵀⵔⴰ ⵉⵖ ⵏⵓⵙⵉ ⵓⵟⵟⵓⵏ ⵏ ⵜⵖⵉⵡⴰⵏⵉⵏ ⵏ ⵜⵙⴽⵍⴰ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⴳ ⵍⵎⵖⵔⵉⴱ, ⵏⵏⴰ ⴳ ⵍⵍⴰⵏⵜ ⵜⵣⵓⵏⴰ ⵏ ⵜⵓⵜⵍⴰⵢⵉⵏ. ⴳ ⵓⵙⴰⵍⴰ ⵏ ⵎⴰⴷ ⵢⴰⵥⵏ ⵏ 16 ⵏ ⵜⵖⵉⵡⴰⵏⵜ ⵏ ⵜⵙⴽⵍⴰ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ, ⴷⴰ ⵏⵜⵜⴰⴼⴰ ⵖⴰⵙ 5 ⵜⵖⵉⵡⴰⵏⵉⵏ ⴰⴳ ⵜⵍⵍⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵙ ⵢⴰⵜ ⵜⴳⵎⵉⴹⵉ ⵏ 31% ⵉ ⵓⵙⴰⴽⴰ ⵏ ⵜⵓⵔⴰⴳⵜ ⵜⴰⴷⵙⵍⴰⵏⵜ, ⴰⵙⴰⴽⴰ ⵏ ⵓⵎⴰⵚⵟⵕ ⵏⵜⵜⴰ ⵉⵍⵍⴰ ⵖⴰⵙ ⴳ 3 ⵜⵖⵉⵡⴰⵏⵉⵏ ⵙ ⵢⴰⵜ ⵜⴳⵎⵉⴹⵉ ⵏ 18% ⵎⴰⵛⴰ ⴰⵙⵏⵉⵖⵙ ⴰⵏⵔⵙⴰⵍ ⵉⵍⵍⴰ ⴳ ⵜⵏⴰⴱⴱⴰⵢⵜ ⵏ ⵜⴳⵣⵣⵓⵎⵜ ⵏ ⵜⵎⵢⵉⵡⵏⵜ ⵉⵥⵍⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵓⵥⵍⴰⵢⵉⵏ ⴰⴽⴽⵯ ⵢⴰⴹⵏ, ⴷ ⵜⵖⵉⵡⴰⵏⵉⵏ ⴰⵎ ⵜⵓⵜⵍⴰⵢⵜ ⵜⴰⴼⵕⴰⵏⵚⵉⵚⵜ ⴷ ⵜⵏⴳⵍⵉⵣⵜ ⵏⵏⴰ ⵉⵜⵜⴰⴼⵉⵏ ⴰⴷⵖⴰⵔ ⵏⵏⵙⵏⵜ ⴷ ⵜⵣⵓⵏⴰ ⴰⴽⴽⵯ ⴳ ⵜⵡⵉⵍⴰ ⵏ ⵜⵎⵢⵉⵡⵏⵜ ⵏ ⵜⵓⵜⵍⴰⵢⵜ ⴷ ⵓⵏⵢⴰⵍⴽⴰⵎ.
ⴰⵙⵓⵖⵍ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ
ⴰⴹⵕⵉⵙ ⵙ ⵜⵄⵕⴰⴱⵜ: ⵕⴰⵛⵉⴷ ⵓⴱⵊⵊⴰ
