ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵔⴰⴷ ⵜⵣⵣⵔⵉ ⵜⴱⴰⴷⵓⵜ ⵏ ⵜⵎⴰⵣⵉⵖⵜ ⴰⵙⴰⵔ ⵏ ⵎⴽⵓⵙⴰ ⵍⵍⵉⵖ ⵜⴷⵔⵉ ⵜⵉⴽⵍⵍⵉⵜ ⵜⴰⵎⵣⵡⴰⵔⵓⵜ ⵜⵏⴰⵥⵓⵕⵜ ⵜⴰⵎⵖⵔⵉⴱⵉⵜ ⵎⴰⵙⵙⴰ ⵍⴰⵟⵉⴼⴰ ⴰⵃⵕⴰⵔ, ⴰⵙⴰⵔⵓ ⴰⴷ ⵉⵜⵜⵓⵙⴽⴰⵔ ⴰⵙ ⵓⵙⵓⵍⴼ ⵜⵉⴳⴰⵔⵉⵡⵉⵏ ⴰⴳ ⵉⴳ ⵙⴳ ⵜⵉⵡⵡⵓⵔⵉⵡⵉⵏ ⵜⵉⵏⴰⵥⵓⵕⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵜⵙⴽⵔ ⵜⵏⴰⵥⵓⵕⵜ ⵍⴰⵟⵉⴼⴰ ⴰⵃⵕⴰⵕ ⵜⵉⵍⴰⵍⵜ ⵏⵏⵙ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⴰⵏ ⵓⵙⵓⵏ ⵉⵥⵉⵍⵏ ⵉⵍⵍⴰⵏ ⴳ ⵡⴰⵟⵍⴰⵚ, ⴰⴷⵖⴰⵔ ⴰⴷ ⴳ ⵉⴷⴷⵔ ⵡⴰⵡⵙⵙⴰⵔ ⵍⵃⴰⵊⵊ ⵄⴰⴱⴷⵍⵇⴰⴷⵔ ⵉⴳⴰⵏ ⴰⵏⴱⵖⵓⵔ ⵏⵜⵜⴰⵏ ⴷ ⵜⵎⵖⴰⵔⵜ ⵏⵏⵙ ⵄⵉⵛⴰ. ⵜⴰⵎⵖⴰⵔⵜ ⴰⴷ ⵍⵍⵉ ⵉⵜⴰⵀⵍ ⴷⴼⴼⵉⵔ ⵎⴰⴷ ⵜⵎⵎⵓⵜ ⵜⵎⵖⴰⵔⵜ ⵏⵏⵙ ⵜⴰⵎⵣⵡⴰⵔⵓⵜ ⵍⵍⵉ ⴰⵙ ⴷ ⵉⴼⵍⵏ ⵉⵡⵉⵙ ⵍⵃⵙⵏ ⴷ ⵉⵍⵍⵉ ⵃⴰⵍⵉⵎⴰ. ⵜⵉⵍⵉ ⵜⵎⵖⴰⵔⵜ ⵄⵉⵛⴰ ⴼ ⵓⵙⴳⵎⵉ ⴷ ⵜⵏⴽⵔⴰ ⵏ ⵙⵉⵏ ⵡⴰⵔⵔⴰⵡⵏ ⴰⵍⵍⵉⴳ ⴳⴰⵏ ⵉⵄⵔⵔⵉⵎⵏ.
ⴰⵔ ⵜⵙⴰⵡⴰⵍ ⵜⴰⵍⵍⴰⵙⵜ ⵏ ⵓⵙⴰⵔⵓ ⴰⴷ ⴼ ⵎⴰⵎⵏⴽ ⵙ ⵉⵜⴰⵀⵍ ⵓⵄⵔⵔⵉⵎ ⵔⵇⵉⵢⴰ ⵙⴳ ⵜⵉⵖⵔⵎⵜ ⵉⵍⵍⴰⵏ ⵜⴰⵎⴰ ⵏ ⵓⵙⵓⵏ, ⵖⵎⴽ ⵍⵍⵉ ⵜⴰⵀⵍ ⵃⴰⵍⵉⵎⴰ ⵉⵡⵉⵙ ⵏ ⵄⵎⵎⵉⵙ ⵉⴳⴰⵏ ⵉⴳⵉⴳⵉⵍ ⵍⵍⵉⵖ ⵉⵎⵎⵉⵜ ⴱⴰⴱⴰⵙ ⴷ ⵉⵙⵔⴷⴰⵙ ⵏ ⵓⵙⴷⵓⵔⵔⵉ, ⵢⴰⵡⵉ ⵜ ⵄⵎⵎⵉⵙ ⵄⴱⴷⵍⵇⴰⴷⵔ ⵉⵎⵍ ⴰⵙ ⵜⴰⴽⵔⵣⴰ ⴷ ⵜⴼⵍⵍⴰⵃⵜ, ⵉⴳ ⴷⴰⵔⵙ ⴰⵅⵎⵎⴰⵙ.
