ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ ترجمة: ع. بتبغ
ⴳ ⵎⴰⴷ ⴷ ⵉⴷⴷⴰⵏ ⴰⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ.
ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⴰⴷ ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⴳ ⵕⵕⴱⴰⵟ, ⵜⵉⵖⵉⵎⵉⵜ ⵏ ⵜⵡⵓⵔⵉ ⵜⴻⵜⵜⵢⴰⵡⵥⵍⴰⵢ ⵉ ⵜⵎⵓⴽⵔⵉⵙⵜ ⵏ ⵡⴰⵎⴰⵏ. ⵉⴽⵛⵎ ⵓⴳⵔⴰⵡ ⴰⴷ ⴳ ⵓⵙⴰⵜⵉ ⵏ ⵓⴹⴼⵓⵕ ⴰⵙⵓⵍⴰⵏ ⴷ ⵜⵓⴳⴳⵓⵥⵜ ⵢⴰⵜⵜⵓⵢⵏ ⵏⵏⴰ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⴼⵔⴳ ⵕⴱⴱⵉ, ⵉ ⵜⵎⵙⵍⴰⵢⵜ ⴰⴷ ⵜⴰⵙⵜⵕⴰⵜⵉⵊⵉⵜ, ⵙⵍⴰⵡⴰⵏ ⴰⴽⴽⵯ ⴳ ⵓⵎⵏⴰⴹ ⴰⴷ ⵏ ⵖⵉⵍⴰ ⵏⵏⴰ ⵉⵥⵕⴰⵏ ⴰⵣⵎⵎⴻⵎ ⵏ ⵜⴰⴳⴰⵎⵉⵜ ⵉⴼⴰⵡⵏ ⴳ ⵓⵙⵡⵉⵔ ⵏ ⵓⵏⵥⴰⵕ ⴷ ⵡⵓⴷⵓⵣ ⵉⴳⴳⵓⵜⵏ ⵅⴼ ⵓⵙⵓⴳⴰⵎ ⵏ ⵡⴰⵎⴰⵏ ⴳ ⵜⵎⵏⴰⴹⵉⵏ ⴰⴽⴽⵯ ⵏ ⵜⴳⵍⴷⵉⵜ.
ⴳ ⵜⵉⵣⵡⵉⵔⵉ ⵏ ⵜⵖⵉⵎⵉⵜ ⵏ ⵜⵡⵓⵔⵉ ⴰⴷ, ⵉⵙⵙⵎⵏⵉⴷ ⵓⵎⴰⵡⵙⴰⵙ ⵏ ⵓⵎⴰⵡⴰ ⴷ ⵡⴰⵎⴰⵏ ⵎⴰⵙⵙ ⵏⵉⵥⴰⵕ ⴱⴰⵕⴰⴽⴰ, ⴰⴼⵙⵔ ⵅⴼ ⵡⴰⴷⴷⴰⴷ ⵏ ⵡⴰⵎⴰⵏ, ⵏⵏⴰ ⵉⵥⵕⴰⵏ ⴳ ⵓⵣⵎⵣ ⵙⴳ ⵛⵓⵜⴰⵏⴱⵉⵔ ⴰⵔ ⴰⵎⵎⴰⵙ ⵏ ⵉⵏⵏⴰⵢⵔ 2024, ⴰⵣⵎⵎⴻⵎ ⵏ ⵜⴷⵔⵙⵉ ⴳ ⵓⵏⵥⴰⵕ ⵏⵏⴰ ⵉⵍⴽⵎⵏ 70% ⵙ ⵓⵎⵣⴰⵣⴰⵍ ⴷ ⵓⵏⴰⵎⵎⴰⵙ, ⴷ ⵜⵍⴽⵎ ⵜⵎⵏⵛⴽⵜ ⵏ ⵡⵓⴳⴳⵓⴳⵏ 23.2% ⵎⵏⵉⴷ ⵏ 31.5% ⴳ ⵓⵣⵎⵣ ⵢⴰⴽⵙⵓⵍⵏ ⵏ ⵓⵙⴳⴳⵯⴰⵙ ⴰⴷ ⵉⵣⵔⵉⵏ.
ⵣⵎⵔⵏⵜ ⵜⵎⴳⴳⵉⵢⵉⵏ ⵉⵜⵜⵢⴰⵡⵙⴽⴰⵔⵏ ⵙ ⵓⵣⵣⴳⵉⵔ ⵏ ⵜⴰⵔⴰⵜⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ, ⵙⵍⴰⵡⴰⵏ ⴰⴽⴽⵯ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⴰⵏⴰⵎⵓⵔ ⵏ ⵓⵊⵉⵊⵓ ⵙ ⵡⴰⵎⴰⵏ ⵏ ⵜⵉⵙⵙⵉ ⴷ ⵡⵉⵏ ⵜⴰⵙⵙⴰⵡⵜ 2020-2027, ⵙⴳ ⵓⵊⵉⵊⵓ ⵏ ⵜⵓⴳⵜ ⵏ ⵜⵙⴳⵉⵡⵉⵏ ⴷ ⵜⵎⵏⴰⴹⵉⵏ ⵙ ⵡⴰⵎⴰⵏ ⵏ ⵜⵉⵙⵙⵉ ⵙ ⵜⵡⵉⵍⴰ ⵉⴳⵓⵎⵏ ⴳ ⵉⵙⴳⴳⵯⴰⵙⵏ ⴰⴷ ⴳⴳⵯⵔⴰⵏⵉⵏ. ⵉⵣⴷⵉ ⵓⵢⴰ ⵙ ⵜⵓⵥⵍⴰⵢⵜ, ⵙ ⵜⵉⴳⴳⵉ ⵏ ⵓⵣⴷⴰⵢ ⴳⵔ ⵉⵎⴷⵡⴰⵏ ⵏ ⵙⴱⵓ ⴷ ⴱⵓⵔⴳⵔⴰⴳ ⴷ ⵓⵙⵡⵓⵔⵉ ⵏ ⵉⵙⵔⴰⵙ ⵏ ⵓⵙⵣⴷⴳⵉ ⵏ ⵡⴰⵎⴰⵏ ⴳ ⵓⴳⴰⴷⵉⵔ ⴷ ⵓⵙⴼⵉ/ ⴰⴳⵏⵣⴰ ⴰⵡⵔⴰⵖ.
ⴹⴰⵕⵜ ⵏⵏⵙ, ⵉⵙⵙⵎⵏⵉⴷ ⵓⵎⴰⵡⵙⴰⵙ, ⴳⵔ ⵉⴼⴰⵙⵙⵏ ⵏ ⴱⴰⴱ ⵏ ⵡⴰⴷⴷⵓⵔ, ⴰⵙⵖⵉⵡⵙ ⴰⵎⵖⴰⵡⵍ ⵏ ⵜⵡⵓⵔⵉ , ⵏⵏⴰ ⵉⵜⵜⵓⵙⵎⴰⵔⵏ ⵙⴳ ⴷⴰⵔ ⵉⴳⵔⴰⵏ ⵉⵜⵜⵓⵥⴽⴰⵢⵏ ⵙ ⵓⵎⵏⴰⵍⴰ ⵏ ⵡⴰⴷⴷⴰⴷ ⴰⴷⵡⴰⵍⵉ, ⴷ ⵜⵏⴼⵔⵓⵜ ⵏ ⵓⵙⵓⵊⴷ ⵏ ⵡⴰⵎⴰⵏ ⵏ ⵜⵉⵙⵙⵉ, ⵙⵍⴰⵡⴰⵏ ⴰⴽⴽⵯ ⴳ ⵜⵎⴷⵉⵏⵉⵏ ⴷ ⵡⴰⵎⵎⴰⵙⵏ ⴷ ⵉⵙⵓⵏⵏ ⵏⵏⴰ ⴳ ⵜⵍⵍⴰ ⵜⴷⵔⵙⵉ ⵏⵉⵖ ⵔⴰⴷ ⵜⵏ ⵜⵥⵕ.
ⵔⴰⴷ ⵢⵉⵍⵉ ⵓⵣⵣⴳⵉⵔ ⵏ ⵓⵙⵖⵉⵡⵙ ⴰⵎⵖⴰⵡⵍ ⵏ ⵜⵡⵓⵔⵉ, ⵏⵏⴰ ⵉⵜⵜⵓⵙⵎⵏⵉⴷⵏ ⵎⵏⵉⴷ ⵏ ⴱⴰⴱ ⵏ ⵡⴰⴷⴷⵓⵔ, ⴳ ⵉⵙⵡⵉⵔⵏ ⴰⴽⴽⵯ ⵉⵏⴳⵔⴰⵡⵏ ⵏ ⵡⴰⵎⴰⵏ ⴳ ⵜⴳⵍⴷⵉⵜ, ⵢⵓⵎⴰ ⵜⴰⴳⵔⵓⵎⵎⴰ ⵏ ⵜⵎⴳⴳⵉⵢⵉⵏ ⴳ ⵎⴰⴷ ⴷ ⵢⴰⵥⵏ, ⴳ ⵉⵍⵍⴰ ⵓⵙⵎⵓⵙⵙⵓ ⴰⵎⴷⵢⴰ ⵏ ⵉⵙⵓⴳⴰⵎ ⴳ ⵓⵙⵡⵉⵔ ⵏ ⵡⵓⴳⴳⵓⴳⵏ ⴷ ⵡⵓⵏⴰ ⴷ ⵉⵙⵔⴰⵙ ⵏ ⵓⵙⵣⴷⴳⵉ ⵍⵍⴰⵏⵉⵏ ⴷ ⵓⵙⴽⴰⵔ ⵏ ⵉⵎⵉⵡⴰ ⵉⵎⵖⴰⵡⵍⵏ ⵏ ⵡⴰⵙⵙⴰⵢ ⵏ ⵡⴰⵎⴰⵏ ⴷ ⵓⵊⵉⵊⵓ ⵙⵉⵙ, ⵙ ⵢⵉⵎⵉⵥ ⵏ ⵜⵎⴳⴳⵉⵢⵉⵏ ⵏⵏⴰ ⵔⴰⴷ ⵉⴽⵔⵉ ⴰⵙⵎⵔⵙ ⵏ ⵡⴰⵎⴰⵏ ⵏ ⵓⵙⵃⵔ ⴷ ⵓⵙⵓⴷⵔⵙ ⵏ ⵜⴰⴳⴳⴰⵍⵜ ⵏ ⵓⴱⵟⵟⵓ ⵜⵉⵣⵉ ⵏⵏⴰ ⵜ ⵉⵙⵡⴰⵔ ⵡⴰⴷⴷⴰⴷ.
ⵙ ⵓⵎⵙⴰⴷⴰⵖ, ⴷ ⵓⵎⵙⴰⵙⴰ ⵙ ⵜⴰⵔⴰⵜⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ, ⵔⴰⴷ ⵜⵉⵍⵉ ⵜⴰⵣⵣⴰⵣⵜ ⵏ ⵜⴱⵔⵉⴷⵜ ⵏ ⵜⵉⴳⴳⵉ ⵏ ⵉⵙⴰⵡⵔⵏ ⵉⵜⵜⵓⵖⴰⵡⴰⵙⵏ ⵏⵏⴰ ⵖⵓⵔ ⵉⴹⵉⵚ ⴳ ⵓⵣⵎⵣ ⴰⵏⴰⵎⵎⴰⵙ, ⵙⵍⴰⵡⴰⵏ ⴰⴽⴽⵯ ⵓⴳⴳⵓⴳⵏ ⵍⵍⴰⵏⵓⵏ ⴳ ⵓⴱⵔⵉⴷ ⵏ ⵓⴽⴰⵔⴰⵙ ⴷ ⵉⵙⵏⵜⴰⵢ ⵏ ⵓⵣⴷⴰⵢ ⴳⵔ ⵉⵎⴷⵡⴰⵏ ⵏ ⵙⴱⵓ ⴷ ⴱⵓⵔⴳⵔⴰⴳ ⴷ ⵓⵎ ⵕⵕⴱⵉⵄ, ⴷ ⵓⵖⴰⵡⴰⵙ ⴰⵏⴰⵎⵓⵔ ⵏ ⵉⵙⵔⴰⵙ ⵏ ⵓⵙⵣⴷⴳⵉ ⵏ ⵡⴰⵎⴰⵏ ⵏ ⵢⵉⵍⵍ, ⴷ ⵓⵖⴰⵡⴰⵙ ⵏ ⵡⴰⵍⴰⵙ ⵏ ⵓⵙⵡⵓⵔⵉ ⵏ ⵡⴰⵎⴰⵏ ⵔⴽⴰⵏⵉⵏ ⵎⵉ ⵉⵜⵜⵓⵙⴽⴰⵔ ⵓⵙⵎⴽⵍ, ⴷ ⵓⵖⴰⵡⴰⵙ ⵏ ⵜⴷⵎⵙⴰ ⵏ ⵡⴰⵎⴰⵏ ⴳ ⵓⵙⵡⵉⵔ ⵏ ⵓⵥⵟⵟⴰ ⴷ ⵓⴱⵟⵟⵓ ⵏ ⵡⴰⵎⴰⵏ ⵏ ⵜⵉⵙⵙⵉ ⴷ ⵡⴰⵎⴰⵏ ⵏ ⵓⵙⵃⵔ.
ⵢⵓⴽⵎ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⵏⵚⵕ ⵕⴱⴱⵉ, ⵉⴳⵔⴰⵏ ⴷ ⵉⵏⴳⵔⴰⵡⵏ ⵥⵍⵉⵏⵉⵏ ⵅⴼ ⵓⵙⴳⵓⴷⵉ ⵏ ⵜⵓⴽⴰⵢⵜ ⴷ ⵜⵓⴳⴳⴰⵙ ⵏ ⵓⵙⵉⵍⵉ ⵏ ⵓⵏⴰⵥⴰⵕ ⵏ ⵜⵏⴼⵔⵓⵜ ⵏ ⵡⴰⵎⴰⵏ, ⴷ ⵓⴹⴰⴽⴰⵍ ⵏ ⵓⵊⵉⵊⵓ ⵙ ⵡⴰⵎⴰⵏ ⵏ ⵜⵉⵙⵙⵉ ⴳ ⵓⵙⵡⵉⵔ ⵏ ⵜⵙⴳⵉⵡⵉⵏ ⴰⴽⴽⵯ ⵏ ⵜⴳⵍⴷⵉⵜ.
ⴳ ⵓⵎⵏⵉⴷ ⴰⴷ, ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⵉ ⵜⴰⵏⴱⴰⴹⵜ ⴰⴷ ⵜⵙⵙⵎⵔⵙ ⴰⵎⵢⴰⵡⴰⴹ ⵉⴼⴰⵡⵏ ⴷ ⵉⵏⵎⴰⵍⴰⵏ ⵎⵏⵉⴷ ⵉⵏⵎⵓⵔⴰⵏ ⵅⴼ ⵜⵣⵣⵉⴳⵣⵜ ⵏ ⵡⴰⴷⴷⴰⴷ ⵏ ⵡⴰⵎⴰⵏ ⴷ ⵉⵙⵡⵓⴷⴷⵓⵜⵏ ⵉⵎⵖⴰⵡⵍⵏ ⵏⵏⴰ ⵎⵉ ⵔⴰⴷ ⵉⵜⵜⵓⵙⴽⴰⵔ ⵓⵙⵎⵀⵍ, ⴷ ⵓⵙⴷⵓⵙ ⵏ ⵓⵙⴼⵔⴽ ⵏ ⵓⴳⴷⵓⴷ ⵙ ⵜⵉⵏⴷⵉ ⵏ ⵜⴷⵎⵙⴰ ⴳ ⵜⵙⵎⵓⵔⵜ ⵏ ⵡⴰⵎⴰⵏ ⴷ ⵓⵙⴱⴷⴷⵉ ⵏ ⵡⴰⵏⴰⵡⵏ ⴰⴽⴽⵯ ⵏ ⵓⴼⵜⵜⵙ ⵏ ⵜⵎⵜⵜⴰ ⴰⴷ ⵜⴰⵎⴰⴷⴷⴰⵔⵜ ⴷ ⵉⵙⵡⵓⵔⵉⵜⵏ ⵏⵏⵙ ⵖⵓⵔ ⵓⵔ ⵜⵍⵍⵉ ⵜⵎⴰⵙⴰⵢⵜ.
ⵉⵃⴰⴹⵕ ⴳ ⵜⵖⵉⵎⵉⵜ ⵏ ⵜⵡⵓⵔⵉ ⴰⴷ ⴰⵎⵛⵛⵉⵡⴰⵕ ⵏ ⴱⴰⴱ ⵏ ⵡⴰⴷⴷⵓⵔ ⵎⴰⵙⵙ ⴼⵓⴰⴷ ⵄⴰⵍⵉ ⵍⵀⵉⵎⵎⴰ, ⴷ ⵓⵎⴰⵡⵙⴰⵙ ⵏ ⵓⴳⵏⵙⵓ ⵎⴰⵙⵙ ⵄⴱⴷⵍⵡⴰⴼⵉ ⵍⴼⵜⵉⵜ, ⴷ ⵓⵎⴰⵡⵙⴰⵙ ⵏ ⵓⵎⴰⵡⴰ ⴷ ⵡⴰⵎⴰⵏ ⵎⴰⵙⵙ ⵏⵉⵥⴰⵕ ⴱⴰⵕⴰⴽⴰ, ⴷ ⵓⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⵎⴰⵙⵙ ⵎⵓⵃⴰⵎⵎⴰⴷ ⵚⴰⴷⵉⵇⵉ, ⴷ ⵓⵎⴰⵡⵙⴰⵙ ⴰⵎⴰⵔⵉ ⵖⵔ ⵜⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵜⵥⵕⴼⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵙⵜⵍⵜ ⵎⴰⵙⵙ ⴼⴰⵡⵣⵉ ⵍⵇⵊⵄ, ⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⵙⵉⵔⴰ ⴰⵏⴰⵎⵓⵔ ⵏ ⵓⵥⴰⵕⵓⵕ ⴷ ⵡⴰⵎⴰⵏ ⵏ ⵜⵉⵙⵙⵉ ⵎⴰⵙⵙ ⵄⴱⴷⵕⵕⴰⵃⵉⵎ ⵍⵃⴰⴼⵉⴹⵉ.
