ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴰⴷ ⵙⵏⵉⵎⵎⵔⵖ ⵉ ⵡⵓⵍ ⴰⵎⵇⵇⵔⴰⵏ ⵏ ⵉⵡⵛⵉⵏ ⴼⵓⵙ ⵉ ⵡⵓⵍ ⴰⵎⵥⵥⵢⴰⵏ, ⵏ ⵉⵏⵏⴰⵏ ⴰⵡⴰⵍ ⴰⵣⴷⴷⴰⴳ, ⴷⵉ ⵓⵎⵏⴰⴹ ⴰⴷ ⵏⵅⵙ ⴰⵏⵙⵙⵉⵡⵍ ⵅ ⵉⵛⵜ ⵏ ⵜⵙⴱⴷⴰⴷⵜ ⵣⵉ ⵜⵙⴱⴷⴰⴷⵉⵏ ⵜⵉⵎⵇⵇⵔⴰⵏⵉⵏ ⵏ ⵜⵓⵙⵙⵏⴰ ⴷ ⵜⴷⵍⵙⴰ ⵖⵔ ⵇⴰⵄ ⵉⵎⴰⵣⵉⵖⵏ, ⵍⵎⵓⵏⵜ ⴰ ⵇⵇⴰⵔⵏ ⴰⵙ ⴰⵛⵜ ⵜⵎⵓⵏⵜ ⵉ ⴰⵢⵜ ⵡⴰⵕⴰⵢⵏ ⵙ ⵉⵍⵙ ⵏⵏⵙⵏ « ⴱⵢⴰⵏⵏⵓ » ⵜⴰⵎⵍⴷⴰ ⴰⴷ ⵜⵜⵉⵍⵉ ⴷⵉ ⴽⵓⵍ ⴰⵙⵙ ⵏ 13 ⵉⵏⵏⴰⵢⵔ ⵣⴳ ⵓⵙⴳⴳⵯⴰⵙ ⵏ ⵜⵍⴰⵍⵉⵜ ⵏ ⵉⵜⵜⵉⵍⵉⵏ ⴷⵉ ⵡⴰⵙⵙ ⴰⵎⵣⵡⴰⵔⵓ ⵓⵙⴳⴳⵯⴰⵙ ⴰⵎⴰⵣⵉⵖ ⵏⵏⴰ ⵉⵙⵙⵏⵜⵉⵏ ⴰⴽⴷ ⵓⴳⵍⵍⵉⴷ ⴰⵎⴰⵣⵉⵖ ⵏⵏⵓⵎⵉ ⵇⵇⴰⵔⵏ ‘’ⵛⵉⵛⵏⴰⵇ ⴰⵎⵣⵡⴰⵔⵓ’’ ⵉⵇⵇⵉⵎ ⵅ ⵓⵙⵖⵉⵎ ⴰⴷⴰⴱⵓ ⴷⵉ ⴷⴷⵡⵍⵜ ⵏ ⵎⵉⵚⵕⴰ ⵜⴰⵎⵙⵜⵓⵎⴰⵏⵜ ⴰ ⵜⵙⴰⵔ ⴷⵉ 950 ⴷⴰⵜ ⵉ ⵜⵍⴰⵍⵉⵜ ⵍⵎⴰⵙⵉⵃ.
ⵎⵉⵍⵍⵉ ⵏⵓⴼⴰ ⴰⵏⵙⵙⵔⵖ ⵉⵛⵜ ⵏ ⵜⴼⵜⵉⵍⵜ ⵜⵎⵓⴷⵔⵓⵙⵜ ⵅ ⵎⴰⵎⵛ ⵉⵣⵔⵔⵉ ⵉⵅⴼ ⵓⵙⴳⴳⵯⴰⵙ ⴰⵎⴰⵣⵉⵖ ⵖⵔ ⵜⵡⵙⵉⵜ ⵏ ⴰⵢⵜ ⵡⴰⵕⴰⵢⵏ ⵏⵏⴰ ⵉⵜⵜⵡⴰⵙⵙⴰⵏⵏ ⵙ ⵜⵔⴳⴰⵣⵜ ⵉⵔⴳⵣⵏ ⴷⵉ ⵍⵡⵇⵜ ⵏ ⵜⵏⵣⴱⴰⵢⵜ ⵉ ⵉⵕⵓⵎⵢⵏ (1912/1955), ⵍⵡⵇⵜ ⴰ ⵜⵜⵉⵍⵉⵏ ⴰⵛⵜ ⵡⴰⵕⴰⵢⵏ ⵙⵙⵎⵓⵏⵏ ⴰⵢⴰⴼⵓ ⴰⵏⴼⵍⴰⵃ ⵏⵏⵙⵏ ⵙ ⵓⵏⵇⵇⴰⵔ ⴷ ⵓⵣⵉⵣⴰ (ⵚⵚⵉⴼ), ⵉⵏⵉⵖ ⵜⵜⵉⵍⵉⵏ ⵜⵜⵄⴰⵢⴰⵏⵏ ⵜ ⵙ ⵓⵎⵥⵥⵢⴰⵏ ⵙ ⵓⵎⵇⵇⵔⴰⵏ, ⵉⵎⵣⵡⵓⵔⴰ ⵜⴰⴼⵓⴳⵍⴰ ⵜⴱⴰⵍⵉⵛⵜ ⵏⵏⵙⵏ ⵜⵜⵓⵖ ⵜⵜⵉⵏⵉⵏ ⴰⵙ « ⵙⵓⵏⴰ » ⵣⴳ ⵜⴰⵍⵖⵉⵡⵉⵏ ⵏⵏⵙ : ‘’ⵙⵓⵏⴰ ⴱⵖⴰⵜ ⵍⴳⴷⴷⵉⴷ, ⵡⵍⵄⵉⴷ ⵎⴰⵣⴰⵍ ⴱⵄⵉⴷ ‘’, ⴰⵎⵎⴰ ⵉⵙⵎ ⵏ ⵜⴼⵓⴳⵍⴰ ⵜⴰⵎⴰⵢⵏⵓⵜ ⴷ ‘’ⴱⵢⴰⵏⵏⵓ’’. ⴷⴰⵜ ⵏ ⵡⴰⵙⵙ ⴰⴷ ⵜⵜⵉⵍⵉⵏ ⵍⵀⵍ ⵍⵡⴰⵛⵓⵏ ⵉⵎⵥⵥⵢⴰⵏⵏ ⵙⵙⵎⵓⵜⵜⴳⵏ ⴰⵙⵏ ⵉⵄⵎⴰⴷ ⴱⴱⵢⴰⵏⵏⵓ ⵣⵉ ⵜⴰⴷⴷⴰⴳⵜ ⵓⵍⵉⵍⵉ ⵏⵏⵖⵔ ⵜⵍⵍⴰ ⵜⴼⵓⵕⴽⴰ (ⵇⵇⵍ ⵖⵔ ⵜⵡⵍⴰⴼⵜ ⵙ ⵏⵏⵊ) ⵉⵏⵉⵖ ⴽⴽⵙⵏ ⴰⵙⵏ ⴰⵇⵛⵓⵔ ⵙ ⵜⴱⵔⵉⴷⵜ ⵜⵓⵚⴱⵉⵃⵜ ⵙⵙⵓⵏⵟⵏ ⴰⵙⵏ ⴰⵇⵛⵓⵔ ⵏⵏⵙⵏ ⵉⵜⵜⵉⵍⵉ ⵉⵜⵜⵄⵕⵓⵕⵕⵓⵊ ⵙ ⴷⴷⵡ ⵇⴰⵍⵏ ⴰⵙⵏ ⴰⵏⵉⵙ ⵖⴰ ⵎⵄⵏⵏ ⵉⵏⵉⵖ ⵊⵏ ⵜⵏ ⴷⵉ ⴷⴷⵅⴰⵏ(ⴰⴳⴳⵓ), ⵏⵙⵏ ⴱⵕⵕⴰ ⵉⵜⵜⵀⵔⵜⴰⵍ ⵅⴰⴼⵙⵏ ⵓⵊⵔⵉⵙ, ⵜⴰⵎⵢⵉⵔⵜ ⵏ ⵜⴼⵓⵛⵜ ⵏ ⵡⴰⵙⵙ ⴰⵎⵇⵇⵔⴰⵏ ⵎⵓⵏⵏ ⵍⵡⴰⵛⵓⵏ ⵖⵔ ⵜⵎⵣⴳⵉⴷⴰ ⴽⵓⵍ ⵉⴷⴷⵊ ⵉⵛⵙⵙⵉ ⴰⵄⵎⵓⴷ ⴱⴱⵢⴰⵏⵏⵓ ⵏⵏⵙ, ⴱⵟⵟⵓⵏ ⵍⵓⵅⵟⵏ ⵜⵉⵍⴰⵍ; ⵉⴷⵊ ⴷ ⴰⵏⴼⵍⵓⵙ ⴰⵎⴰⵜⴰⵢ ⵉⴷⵊ ⴷ ⴰⵖⵢⵓⵍ ⵏ ⵜⵔⴱⵃⵜ ⵉⵅⵙⵙⵉ ⵉⵛⵜ ⵏ ⵜⵅⵏⵛⵉⵍⵜ, ⵉⵏⵉⵖ ⵜⵏⵏⵟⵏ ⵅ ⴰⵢⵜ ⴷⴷⵛⵕ ⵙⵙⵓⵜⵓⵔⵏ ⴰⵙⵏ ⴱⵢⴰⵏⵏⵓ( ⵉⴳⵓⵎⵎⴰ ⵉⵏⵇⵇⴰⵔⵏ ⴰⴽⴷ ⵣⵣⵛⵜ ⴷ ⴹⴹⵕⴰ ⴷ) ⵣⵉ ⵡⴰⵡⵍⵉⵡⵏ ⵏ ⵜⵜⵉⵏⵉⵏ :
ⴱⵢⴰⵏⵏⵓ ⴱⵢⴰⵏⵏⵓ ⴱⵢⴰⵏⵏⵓ ⴱⵢⴰⵏⵏⵓ ⵜⴰⵣⴰⵔⵜ ⴳ ⴰⵏⴷⵓ
ⴱⵢⴰⵏⵏⵓ ⴱⵢⴰⵏⵏⵓ ⴱⵢⴰⵏⵏⵓ ⴱⵢⴰⵏⵏⵓ
ⵓⵏ ⴰⵏⵖ ⵓⵔ ⵉⵡⵛⵉⵏ ⵛⵡⴰⵢ ⴰⵜ ⵉⵇⴱⵛ ⵓⵛⵓⵔⴷⵓ.
ⴽⵓⵍ ⴰⵅⵅⴰⵎ ⵉⵜⵉⵜⵜⵛ ⴰⵙⵏ ⴰⵢⵏ ⵓⵎⵉ ⵉⵣⵎⵔ ⵃⴷ ⴷ ⵉⵚⵓⵍⴹⵢⵢⵏ ⵃⴷ ⴷ ⵉⴳⵓⵎⵎⴰ ⴹⴹⵕⴰ ⵉⵏⵉⵖ ⵉⴽⵙⵙⵉ ⵜ ⵓⵖⵢⵓⵍ ⵏⵏ; ⵍⵍⴰⵏ ⵉⵏⵏ ⴰⵙ ⵉⵜⵜⵉⵏⵉⵏ ⵙ ⵜⵃⵃⴰⴽⵜ : ‘’ⵓⵔ ⴰⵡⵏ ⵏⵜⵉⵜⵜⵛ ⴱⵢⴰⵏⵏⵓ ⴰⵍ ⵉⵙⵙⵀⵓⵕⵕⵜ ⵓⵖⵢⵓⵍ ⵏⵏⵓⵏ’’,ⴰⴷ ⵙⵙⵎⵓⵏⵏ ⴰⵍ ⵏⵏⵟⵏ ⵅ ⴰⵢⵜ ⵜⵎⴰⵣⵉⵔⵜ ⵇⴰⵄ ⵉⵏⵉⵖ ⴷⵡⵍⵏ ⵖⵔ ⵍⴼⵇⵉ ⵏⵉⵖ ⵖⵔ ⵛⵕⴰ ⵍⴰⵍⵍⴰⵙ ⵏ ⵜⵙⴷⵏⴰⵏ ⴷⵉ ⵜⵏⴼⴽⴰⵢⵜ ⴷ ⵓⵖⵓⴷⵉ (ⵜⵉⵎⵎⵓⵣⵖⴰ) ⵃⵓⵎⴰ ⴰⴷ ⴰⵙⵏ ⵜⴱⵟⵓ ⴽⵓⵍ ⵢⴰⵏ ⵙ ⵜⵙⵖⵔⵜ ⵏⵏⵙ,ⵓⵏ ⴰⵙⵏ ⵓⵔ ⵉⵡⵛⵉⵏ ⵜⵉⵔⵎⵜ ⵏⵏⵙ ⵇⵕⵟⵏ ⵉⵛⵜ ⵏ ⵜⵎⵊⵊⵜ ⵓⵄⵎⵓⴷ ⴱⴱⵢⴰⵏⵏⵓ ⵍⴰⵡⵃⵏ ⴰⵙⵜ ⵅ ⵜⴰⴷⴷⴰⵔⵜ;ⵜⴰⵎⴰⵜⴰⵔⵜ ⵏⵏⵙ ⴰⵢⵜ ⵓⵅⴰⵎ ⵏⵏ ⵓⵔ ⴷⴰⴳⵙⵏ ⵜⵉⴼⵔⴰⵙ ⵏ ⴰⵢⵜ ⵜⵎⴰⵣⵉⵔⵜ ⴰⴷ, ⴰⵎⵎⴰ ⵍⵡⴰⵛⵓⵏ ⵉⵎⵇⵇⵔⴰⵏⵏ (15 /17 ⵉⵙⴳⴳⵯⴰⵙⵏ) ⵙ ⵢⵉⵟ ⴰⴳⴳ ⵙⵙⵓⵜⵓⵔⵏ ⴱⵢⴰⵏⵏⵓ ⵏⵏⵙⵏ ⵃⵓⵎⴰ ⵓⵔ ⵜⵏ ⵉⵜⵜⵉⵥⵉⵕ ⵃⴷ ⵡⴰⴳⵎⵙ ⵏⵉⵜⵏⵉ.
ⵉⵟ ⵏⵏ ⵜⵎⵓⵏⵏ ⵇⴰⵄ ⴰⵢⵜ ⵓⵅⴰⵎ (ⵙ ⵓⵔⵎⵎⵓⵙ ⵏⵏⵙ ⴰⵣⴰⵢⴽⵓ) ⴽⴽⵔⵏⵜ ⵜⵙⴷⵏⴰⵏ ⵙⵙⵎⵓⵜⵜⵓⴳⵏⵜ ⵜⵉⵔⵎⵜ ⵏ ⵡⴰⵍⵍⴰⵙ ⵏⵏⵓⵎⵉ ⵇⵇⴰⵔⵏ ⴷⵉ ⵓⵎⴰⵡⴰⵍ ⵓⴽⴽⵯⴰⵕⴰⵢⵏ ‘’ⵜⵜⵔⵉⴷ’’ ⵙⴳ ⵉⵔⴷⵏ ⵜⵜⴰⵡⵍ ⵜⵜ ⵅ ⵓⴱⵍⴰⵟ ⵏ ⵉⵙⵍⵉ, ⵜⵜⵎⵓⵏⵙⵡⵡⵏ ⵙ ⵜⵉⵔⵎⵜ ⴰⴷ ⵏ ⵜⵜⵔⵉⴷ ⴰⴽⴷ ⵓⵇⴷⴷⵉⴷ ⴷ ⵡⴰⵎⴰⵏ ⵓⵢⴷⴷⵉⴷ ⴳ ⵜⵉⴼⵔⴰⵙ ⵏ ⵜⵓⵎⵔⵜ ⴷ ⵓⴼⵔⴰ, ⵙⵙⵉⵏ ⵉⵏⵉⵖ ⴽⵓⵍ ⵉⴷⵊ ⵢⴰⵡⵟ ⵜⴰⴷⴷⴰⵔⵜ ⵏⵏⵙ ⵙⵙⵓⵜⵓⵔⵏ ⵣⵖⵔ ⴱⴰⴱ ⵉⵜⵔⴰⵏ ⴰⴷ ⵅⴰⴼⵙⵏ ⵉⵄⴰⵢⴷ ⵓⵙⴳⴳⵯⴰⵙ ⴰⵎⴰⵣⵉⵖ ⵙ ⵜⵉⴼⵔⴰⵙ ⵏ ⵉⵖⵓⴷⴰⵏ.
ⵣⴳ ⵉⵎⴷⵡⴰⵍⵏ ⵓⵔⵣⵣⵓ ⴰⴷ ⵎⵓⴼⵙⵓⵙ :
-ⴰⵏⵎⵎⴰⵍ ⵏ ⵜⵙⵍⵎⴰⴷⵜ ⴷ ⵓⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴰⵙⵍⵎⴷ ⴰⵎⵏⵣⵓ,2020.
-ⴰⴷⵍⵉⵙ ⵓⵏⵍⵎⴰⴷ ⴷ ⵜⵏⵍⵎⴰⴷⵜ : ⵜⵉⴼⴰⵡⵉⵏ ⴰ ⵜⴰⵎⴰⵣⵉⵖⵜ, ⴰⵙⵡⵉⵔ ⵡⵉⵙⵙ ⵙⵎⵎⵓⵙ.
