ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵏⵓⴱⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵙ ⵏ ⵓⴽⵡⴰⵙ 30 ⵢⵓⵏⵢⵓ 2022, ⴰⵏⵎⵓⵇⵇⴰⵔ ⵏ ⵓⵙⵎⵓⵜⵜⴳ ⵅⴼ ⵜⵉⵎⴰⵢⵏⵓⵜⵉⵏ ⵏ ⵓⵔⵣⵣⵓ ⴷ ⵓⵙⵎⵓⵜⵜⴳ ⴳ ⵢⵉⴳⵔ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵉⵙⵏⵎⴰⵍⴰ ⴰⵏⵎⵓⵇⵇⴰⵔ ⴰⴷ ⵡⴰⵎⵎⴰⵙ ⵏ ⵓⵔⵣⵣⵓ ⴰⴷⵉⴷⴰⴽⵜⵉⴽⵉ ⴷ ⵉⵖⴰⵡⴰⵙⵏ ⵉⴱⵉⴷⴰⴳⵓⵊⵉⵢⵏ ⵉⴹⴼⵕⵏ ⴰⵙⵉⵏⴰⴳ, ⵢⵉⵍⵉ ⴳⵉⵙ ⵚⴰⵃⴰ ⵉ 21 ⵏ ⵓⵙⵍⵎⴰⴷ ⴰⵎⴰⵏⵏⵓⵏ ⵙⴳ ⵡⴰⵎⵎⴰⵙ ⴰⵏⵎⵏⴰⴹ ⵏ ⵜⵣⵣⵓⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⵏ ⵜⵎⵏⴰⴹⵜ ⴱⵏⵉ ⵎⵍⵍⴰⵍ ⵅⵏⵉⴼⵕⴰ. ⵉⴳ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⴳ ⵉⵍⵍⴰ ⵓⴱⴷⴷⴰⴷ ⴼ ⵉⵙⵡⴰⵍⴰⵢⵏ ⵉⴱⵉⴷⴰⵖⵓⵊⵉⵢⵉⵏ ⵉⵎⴰⵢⵏⵓⵜⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵖⵎⴽ ⴰⵏⵏ ⴷ ⵓⵙⵎⵏⵉⴷ ⵏ ⵡⴰⵏⴰⵡⵏ ⵏ ⵓⵙⵡⵓⴷⴷⵓ ⵏ ⵓⴷⵍⵉⵙ ⴰⵏⵎⵍⴰⵏ ⴳ ⵎⴰⴷ ⵉⵥⵍⵉⵏ ⵙ ⵉⴼⵔⴷⴰⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵙⵍⴰⵡⴰⵏ ⴰⴽⴽⵯ ⴳ ⵓⵙⴳⴳⵯⴰⵙ ⴰⵎⵣⵡⴰⵔⵓ ⵏ ⵓⵙⵙⵍⵎⴷ ⴰⵎⵏⵣⵓ.
ⵉⴷⵔⵓ ⴳ ⵓⵙⵡⵓⴷⴷⵓ ⵏ ⵓⵏⵎⵓⵇⵇⴰⵔ ⴰⴷ ⵎⴰⵙⵙⴰ ⴼⴰⵟⵉⵎⴰ ⴰⴳⵏⴰⵡ ⵜⵎⴰⵏⵀⴰⵍⵜ ⵏ ⵓⵔⵣⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵎⴰⵙⵙ ⵄⴰⴱⴷⵕⵕⴰⵃⵎⴰⵏ ⴱⵉⵍⵓⵛ ⴰⵎⵓⵣⴰⵢ ⴷ ⵓⵎⴰⵔⴰ ⵏ ⵉⴷⵍⵉⵙⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵎⴰⵙⵙ ⵎⵓⵚⵟⴰⴼⴰ ⵓⵎⵓⵛ ⴰⵎⴳⴳⵉⵡⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵎⴰⵔⴰ ⵏ ⵉⴷⵍⵉⵙⵏ ⵉⵏⵎⵍⴰⵏⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵎⴰⵙⵙ ⴱⵏⵄⵉⵙⴰ ⵉⵛⵛⵓ ⴰⵎⵏⵀⴰⵍ ⵏ ⵓⵔⵣⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.
ⵙ ⵜⵎⵍⴷⴰ ⴰⴷ, ⵉⵙⵎⵏⵉⴷ ⵎⴰⵙⵙ ⴰⵃⵎⴰⴷ ⴱⵓⴽⵓⵙ ⴰⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⴰⴳⵓⵔⵉ ⴳ ⵉⵙⴰⵡⵍ ⴼ ⵓⴱⵓⵔⵣ ⵏ ⵓⵙⵉⵏⴰⴳ ⵍⵍⵉⵖ ⵉⵙⵏⵓⴱⴳ ⴰⵏⵎⵓⵇⵇⴰⵔ ⴰⴷ ⵉⵥⵍⵉⵏ ⵙ ⵓⵙⵙⵍⵎⴷ ⴷ ⵓⵙⵎⵓⵜⵜⴳ ⵉⵙⵓⵍⵏ ⵉ ⵚⴰⵃⴰ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳ ⵡⴰⵎⵎⴰⵙ ⴰⵏⵎⵏⴰⴹ ⵏ ⵜⵣⵣⵓⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴱⵏⵉ ⵎⵍⵍⴰⵍ ⵅⵏⵉⴼⵔⴰ, ⵉⵙⵙⴽⵜⵉ ⴷ ⵎⴰⵙⵙ ⴱⵓⴽⵓⵙ ⵎⴰⵙ ⵉⵣⵔⵉ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳ ⵎⵏⵏⴰⵡⵜ ⵜⴼⵔⴽⵉⵡⵉⵏ, ⵉⵙⴽⵔ ⴽⵉⴳⴰⵏ ⵏ ⵉⵙⵓⵖⴰⴷ, ⵎⴰⵛⴰ ⴰⴱⵔⵉⴷ ⵙⵓⵍ ⵉⵖⵣⵣⵉⴼ. ⵢⵉⵏⵉ ⵓⵍⴰ ⵎⴰⵙ ⵜⵍⵍⴰⵜ ⵜⵏⴰⵥⴰⵕⵜ ⴰⵙⵙ ⴰⴷ ⴷⴰⵔ ⵜⵎⴰⵡⴰⵙⵜ ⴷ ⵓⵙⵉⵏⴰⴳ ⴳ ⵓⵎⵏⵉⴷ ⵏ ⵓⵙⵎⵓⵜⵜⴳ ⵏ ⵎⴰⴷ ⵉⴳⵓⵎⵏ ⴳ ⵉⵙⵍⵎⴰⴷⵏ ⵏ ⵜⵎⴰⵣⵉⵖⵜ, ⵉⵣⵎⵎⵉⵎ ⵎⴰⵙ ⵉⴹⴼⵕ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⴰⵡⵡⵓⵔⵉ ⴰⴷ ⵙⴳ 2003.
ⴳ ⵓⵎⵏⵉⴷ ⵏⵏⵙ, ⵉⵏⵏⴰ ⵎⴰⵙⵙ ⵄⴱⴷⵙⵙⵍⴰⵎⴰ ⵅⴰⵍⴰⴼⵉ, ⴰⵏⵎⵀⴰⵍ ⵏ ⵡⴰⵎⵎⴰⵙ ⵏ ⵓⵔⵣⵣⵓ ⴰⴷⵉⴷⴰⴽⵜⵉⴽⵉ ⴷ ⵉⵖⴰⵡⴰⵙⵏ ⵉⴱⵉⴷⴰⴳⵓⵊⵉⵢⵏ ⵎⴰⵙ ⵉⵡⴰⵜⵜⵙ ⵓⵏⵎⵓⵇⵇⴰⵔ ⴰⴷ ⴰⴷ ⵉⴹⴼⵕ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⴰⵡⵡⵓⵔⵉ ⵏ ⵜⵉⵍⵉⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⵏ ⵓⵙⵙⵍⵎⴷ, ⵖⵎⴽ ⴰⵏⵏ ⴷ ⵓⴹⴼⵕ ⵏ ⵉⵖⴰⵡⴰⵙ ⵉⵎⴰⵢⵏⵓⵜⵏ ⴷ ⵉⵖⴰⵡⴰⵙⵏ ⵍⵍⵉ ⵉⵙⴽⵔ ⵓⵙⵉⵏⴰⴳ ⴷ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴳ ⵡⴰⵢⵢⵓⵔ ⵏ ⵢⵓⵍⵢⵓⵣ 2021.
