ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵙ ⵓⵣⵎⵣⵣⵓ ⵏ ⵓⵙⵓⴷⴻⴷ ⴰⴳⵍⴷⴰⵏ ⵢⴰⵜⵜⵓⵢⵏ ⵏ ⵢⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎ ⵜⴰⵏⵓⵕⵥⵎⵜ ⵜⴰⵏⴰⵎⵓⵔⵜ ⵜⴰⵎⴰⴷⴷⵓⴷⵜ ⵉⵜⵜⵢⴰⵡⴼⵔⴰⵏ, ⵉⵙⵏⵎⴰⵍⴰ ⵡⴰⵎⵎⴰⵙ ⵏ ⵢⵉⴼⴼⵓⵙ ⵉ ⵜⴳⵎⵉ ⴷ ⵜⵓⴷⵔⵜ ⵉⵛⵛⴰⵔⵏ ⴷ ⵙ ⵜⵏⴰⵍⵉⵜ ⵙⴳ ⴷⴰⵔ ⵜⴽⴰⴼⵉⵎⵉⵜ ⵜⴰⵏⵎⵏⴰⴹⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴰⴳⵯⵍⵎⵉⵎ ⵡⴰⴷ ⵏⵓⵏ, ⴷ ⵜⵎⵙⵎⵓⵏⵜ ⵏ ⵜⴰⵎⵓⵏⵜ, ⵢⴰⵜ ⵜⵉⵏⴰⵡⵜ ⵜⴰⵏⵎⵏⴰⴹⵜ ⴷⴷⵓ ⵓⵙⵏⵜⵍ: « ⴰⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ, ⵉⵔⵉⵎⵏ ⴷ ⵜⵎⵙⴰⵔⵉⵏ ».
ⵜⵉⵏⴰⵡⵜ ⵙⵙⵓⵜⵉⵏ ⵜⵜ ⵉⵎⵓⵣⴰⵢⵏ ⵙⴳ ⵡⴰⵎⵎⴰⵙ ⴰⵏⵎⵏⴰⴹ ⵏ ⵜⴰⵣⵣⵓⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴰⴳⵯⵍⵎⵉⵎ ⵡⴰⴷ ⵏⵓⵏ, ⴷ ⵉⵏⵎⵀⴰⵍⵏ ⵉⵙⴳⴰⵡⴰⵏⵏ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ, ⴷ ⵉⵎⴳⴳⵉⵡⴰⵙ ⵉⵎⵥⵍⴰⵢⵏ, ⴷ ⵉⵙⵍⵎⴰⴷⵏ ⴷ ⵉⵎⵙⵏⴼⵍⵓⵍⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳ ⵜⵎⵀⵍⵉⵡⵉⵏ ⵏ ⵙⵉⴷⵉ ⵉⴼⵏⵉ, ⵟⴰⵏⵟⴰⵏ, ⴰⵙⵙⴰ ⵥⵥⴰⴳ ⴷ ⵓⴳⵯⵍⵎⵉⵎ.
ⵜⴷⴷⴰ ⴷ ⵜⵉⵏⴰⵡⵜ, ⵜⴳ ⴰⵙⴼⵓⴳⵍⵓ ⵙ ⵜⵓⴳⴳⵓⵥⵜ ⵉⴼⵓⵍⴽⵉⵏ ⵏⵏⴰ ⴱⴷⴷⴰ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⴼⵔⴳ ⵕⴱⴱⵉ, ⵉ ⵜⵎⴰⵣⵉⵖⵜ ⵏⵏⴰ ⵉⴳⴰⵏ ⴰⴼⵔⴷⵉⵙ ⴰⴷⵙⵍⴰⵏ ⵏ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ ⵜⴰⵕⵚⵍⵉⵜ ⴷ ⵜⵏⴱⵖⵓⵔⵜ ⵙ ⵉⵎⵓⵖⵍⵏ ⵏⵏⵙ ⵉⵎⵢⴰⵏⴰⵡⵏ, ⴷ ⵡⴰⵢⴷⴰ ⵉⵛⵛⴰⵔⵏ ⵉ ⵉⵏⵖⵔⴰⴱⵉⵢⵏ ⴰⴽⴽⵯ ⵙ ⵜⵉⵔⵏⵉ.
ⵎⴽⵍⵍⵉ ⵉⴽⵛⵎ ⵓⵏⵎⵓⵇⵇⴰⵔ ⴰⴷ ⴰⵙⴳⵎⴰⵏ ⴳ ⵓⵙⴰⵜⵉ ⵏ ⵓⵙⵎⵀⵍ ⴰⴷⵙⵜⴰⵔ ⵏ ⵜⵎⴰⵣⵉⵖⵜ ⴰⵎ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵣⵉⵔⵜ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ.
ⵉⴳⴰ ⵓⵙⴼⵓⴳⵍⵓ ⴰⴷ ⵙ ⵢⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⵉⴼⴰⵡⵜ ⵏ ⵜⵓⴳⴳⴰⵙ ⵉⵜⵜⵢⴰⵙⴽⴰⵔⵏ ⵏ ⵓⵙⴷⵓⵙ ⵏ ⵜⴰⵡⵉⵜ ⵉⵜⵜⵔⵏⵓⵏ ⵙ ⵜⴷⵍⵙⴰ ⴷ ⵡⴰⵢⴷⴰ ⴰⵎⴰⵣⵉⵖ, ⴷ ⵓⵙⵎⵀⵍ ⵏ ⵜⵓⴳⴳⵓⵥⵜ ⵜⴰⴳⵍⴷⴰⵏⵜ ⵙ ⵢⵉⵙⴳⵔ ⴰⴷ ⴰⴷⵙⵍⴰⵏ ⵏ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ, ⵎⴽⵍⵍⵉ ⵉⴳⴰ ⵢⴰⵜ ⵙⴳ ⵜⵉⴼⴰⵡⵉⵏ ⵏ ⵜⵉⴹⴰⴼ ⵜⴰⴳⵍⴷⴰⵏⵜ ⵅⴼ ⵓⵙⵡⴰⵔ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵜⵓⴳⵜ ⵏ ⵢⵉⴳⵔⴰⵏ.
ⵜⵡⴰⵜⵙ ⵜⵉⵏⴰⵡⵜ ⴰⴷ, ⴰⴷ ⵜⵍⵓⵃ ⵜⵉⴼⴰⵡⵜ ⵏⵏⵙ ⵅⴼ ⵜⵢⴰⴼⵓⵜ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⴽⴰⴷⵉⵎⵉⵜ ⵜⴰⵏⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ, ⴷ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵉⵎⵙⴰⵔⴰⵙⵏ ⵏ ⵓⵙⵎⴰⵜⴰ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵏⴰⴹⵜ ⵙ ⵓⵎⵙⴰⵙⴰ ⴷ ⵉⵙⵡⴰⵍⴰⵜⵏ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ, ⵎⴽⵍⵍⵉ ⵜⴳⴰ ⵜⵉⵏⴰⵡⵜ ⵜⴰⵡⵀⴰⵍⵜ ⵏ ⵓⵙⵙⴰⴳⴳⵯ ⵅⴼ ⵉⵔⵉⵎⵏ ⵉⵙⵏⴼⵍⵓⵍⵏ ⵏ ⵉⵙⵍⵎⴰⴷⵏ ⴷ ⵜⴱⵔⵉⴷⵉⵏ ⵜⵉⵜⵔⴰⵔⵉⵏ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵙⵍⴰⵡⴰⵏ ⴰⴽⴽⵯ ⵜⵉⵎⵢⴰⴷⴰⵙⵉⵏ ⵏ ⵓⵙⵎⵓⵙⵙⵓ ⴷ ⵓⵙⵉⴷⴼ ⵏ ⵜⴰⵜⵉⴽⵏⵓⵍⵓⵊⵉⵜ ⴷ ⵜⵙⵏⵎⴰⵍⴰⵢⵜ ⴷ ⵜⵙⵏⵙⵉⵡⵉⵏ ⴱⵓⵖⵍⴰⵏⵉⵏ, ⵎⴽⵍⵍⵉ ⵜⵙⵎⴽⵍ ⵜⵉⵏⴰⵡⵜ ⵙ ⵓⵙⵙⴼⵔⵓ ⴷ ⵓⵙⴼⵙⵉ ⵜⵓⴳⴳⴰⵙ ⵏ ⵜⵎⵙⵙⵓⴳⵓⵔⵜ ⵜⴰⵙⴳⵎⴰⵏⵜ ⴷ ⵓⴳⵔⴰⵡ ⵏ ⵜⵎⴳⴳⵉⵡⵙⵜ ⴷ ⵉⵎⴷⵔⴰⵡⵏ ⵉⵏⴰⵎⵓⵏⵏ ⵃⵎⴰ ⴰⴷ ⵢⵉⵍⵉ ⵓⵣⵔⴰⵢ ⵏ ⵉⵏⴰⵥⴰⵕⵏ ⴰⴽⴽⵯ ⵏⵏⴰ ⵉⵥⴹⴰⵕⵏ ⴰⴷ ⴷⵉⴷⵙⵏ ⵉⵎⵎⵉⴳⴳⵉⵔ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵍⵎⴷ ⴰⵎⵏⵣⵓ ⴳ ⵜⵙⴳⴰ.
ⵎⴽⵍⵍⵉ ⵙⵙⵎⵖⵓⵔⵏⵜ ⵜⴽⵛⵛⵓⵎⵉⵏ ⴰⴽⴽⵯ ⵙ ⵜⵙⵏⵜⴰⵢⵉⵏ ⴳⴰⵏⵉⵏ ⵜⵉⵖⴰⵔⵉⵡⵉⵏ ⵙ ⵓⵏⵀⵍⵍⴰ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⴰⵏⴰⵎⵓⵔ, ⴷ ⵓⵙⴷⵓⵙ ⵏ ⴰⵢⵍⵍⵉ ⵉⵜⵜⵓⵍⴽⴰⵎⵏ ⵙⴳ ⵓⵎⵎⵉⵥⵏ ⵣⴷⵉⵏⵉⵏ ⴷ ⵜⵎⴰⵣⵉⵖⵜ ⵙⴳ ⵢⵉⵏⴰⵡ ⵏⵏⴰ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵏⵔⵓ ⵕⴱⴱⵉ ⴳ ⵓⵊⴷⵉⵔ 2001.
ⵜⵙⵎⴷ ⵜⵉⵏⴰⵡⵜ ⵙ ⵉⵙⵖⵍⴰⴼ ⵡⴰⵜⵜⵙⵏⵉⵏ ⴰⵙⵖⵓⴷⵓ ⵏ ⵜⵎⴳⴳⵉⵜ ⵏ ⵓⵙⵍⵎⴷ ⴷ ⵓⵍⵎⵎⵓⴷ ⴳ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵏⴰⴹⵜ, ⴷ ⵓⵙⵎⵏⵉⴷ ⵏ ⵜⵙⵓⵎⴰⵔ ⵜⵉⵙⴳⵎⴰⵏⵉⵏ ⵜⵉⵎⵙⴽⴰⵔⵉⵏ ⵡⴰⵜⵜⵙⵏⵉⵏ ⴰⵙⴱⵓⵖⵍⵓ ⵏ ⵜⵎⵙⴽⵔⵜ ⵏ ⵉⵙⵍⵎⴰⴷⵏ, ⵎⴽⵍⵍⵉ ⵜⵜⵓⵙⵎⵏⵉⴷⵏⵜ ⵜⵎⵙⵙⴽⵜⴰⵢ ⵏ ⵓⵏⵄⴰⵕ ⵖⵓⵔ ⴰⵡⵜⵜⴰⵙ ⵏ ⵡⵓⴽⵓⵙ ⵏ ⵡⴰⵏⴰⵡⵏ ⴰⴽⴽⵯ ⵏ ⵓⵏⴷⵍⴼ ⵣⵎⵔⵏⵉⵏ ⴰⴷ ⵣⴷⵉⵏ ⴷ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⴰⵣⵉⵔⵜ ⵏⵏⵖ.
ⵄⴱⴷⵍⵡⴰⵃⴷ ⴱⵓⵜⴱⴰⵖⴰ – ⴰⴳⵯⵍⵎⵉⵎ
