ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⵙⵏⵎⴰⵍⴰ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ ⴰⵢⵢⴰⵡ ⵏ ⵜⵣⵏⵉⵜ ⵜⴰⵎⵙⵉⵔⵜ ⵜⴰⵎⴳⴳⴰⵔⵓⵜ ⵜⵉⵙ ⵚⴹⵉⵚⵜ ⵙⴳ ⵜⵙⴰⵡⵔⵉⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵢⵓⴷⴼ ⴳ ⵓⵙⵏⴼⴰⵕ ⵏ « ⵉⵄⵔⵔⵉⵎⵏ ⵉⵎⵙⵏⴼⵍⴰⵍ ⵉⵎⴰⵣⵉⵖⵏ ⴳ ⵜⵙⵓⵜⵍⵜ ⵏⵏⵙ ⵜⵉⵙ ⵚⴹⵉⵚⵜ » ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵏ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ « ⴳ ⵜⵙⴳⴰ ⵙ ⵜⴰⵢⵢⴰⴹ » ⴷ ⵓⵙⵙⵥⵕⴼ ⵏ ⵜⵎⵔⵙⵍⵜ ⴼⵕⴰⵏⵙⴰ ⴷ ⵜⵎⴰⴷⴷⴰⵙⵜ ⵏ ⵜⵣⵡⴰⴳⵜ ⴷ ⵜⵏⴼⴰⵍⵉⵜ, ⴳ ⵜⵣⵏⵉⵜ ⴰⵙⵙ ⵏ ⵓⵙⴰⵎⴰⵙ 06 ⵎⴰⵕⵚ 2022.
ⵜⵙⵎⵓⵏⵜ ⵜⵎⵙⵉⵔⵜ ⴰⴷ ⵙⵉⵏ ⵉⵎⵓⵙⵙⵓⵜⵏ ⵉⵏⴳⵔ ⵓⵙⵎⵓⵜⵜⴳ ⴷ ⵓⵎⵔⴰⵔⴰ ⴷ ⵉⵎⴳⴳⴰⵢⵏ ⴳ ⵢⵉⴳⵔ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ:
ⴰⵎⵓⵙⵙⵓ ⴰⵎⵣⵡⴰⵔⵓ: ⵜⴰⵙⴰⵡⵔⵜ ⵜⵉⵙ ⵚⴹⵉⵚⵜ ⵏ ⵓⵙⵎⵓⵜⵜⴳ ⴷ ⵓⵙⴼⴰⵍⴽⵉ ⵏ ⵜⵣⵎⵎⴰⵔ ⵏ ⵉⵄⵔⵔⵉⵎⵏ ⵉⵎⵙⵏⴼⵍⴰⵍ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵓⵙⵙⵓⵜⵉ ⵏ ⵓⵙⵍⵎⴰⴷ ⵎⴰⵙⵙ ⵃⵎⴰⴷ ⴷⴷⴰⵀⵓⵣ, ⵙ ⵜⵓⵙⴽⵔⴰ ⵏ ⵢⴰⵏ ⵓⵙⵉⵜⴳ ⵉ ⵓⵙⵎⵓⵜⵜⴳ ⵏ ⵙⵎⵎⵓⵙⵜ ⵜⵙⴰⵡⵔⵉⵏ ⴰⴷ ⵏ ⵜⵡⵓⵔⵉ ⵍⵍⵉ ⵣⵔⵉⵏⵉⵏ, ⴷ ⵓⵙⵙⴽⵯⵜⵉ ⴰⵎⴰⵜⴰⵢ ⵙ ⵜⵎⴰⵎⴽⵉⵏ ⵏ ⵜⵉⵔⵔⴰ ⵏ ⵉⵎⴰⴳⵔⴰⴷ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
– ⴰⵎⵓⵙⵙⵓ ⵡⵉⵙ ⵙⵉⵏ: ⴰⵍⵎⵓⵇⵇⴰⵔ ⴰⵎⵔⴰⵔⴰⵏ ⴳⵔ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ (ⵎ.ⵃⵎⴰⴷ ⴷⴷⴰⵀⵓⵣ, ⵎ.ⵕⴰⵛⵉⴷ ⴰⴽⵕⴽⴰⴹ ⴷ ⵎ.ⵙⴰⵄⵉⴷ ⵓⵛⵛⵏ) ⴷ ⵉⵎⵙⵢⴰⴼⵓⵜⵏ ⵙⴳ ⵜⵙⴰⵡⵔⵜ ⵏ ⵜⵎⴰⵣⵉⵖⵜ, ⵍⵍⵉⵖ ⵙⴰⵡⵏ ⵖ ⵓⵍⵎⵓⵇⵇⴰⵔ ⴰⴷ ⴰⵎⵔⴰⵔⴰⵏ ⵖⴼ ⵜⵉⵔⵎⵉⵜⵉⵏ ⵏⵏⵙⵏ ⵏⵏⴰ ⵉⵥⵍⵉⵏⵉⵏ ⵙ ⵉⴷ ⵎⴰⵙⵙ, ⵎⴽⵍⵍⵉ ⵏⵏ ⴷⴰⵖ ⴳⴳⵔⵏ ⵉ ⵜⵓⴳⵜ ⵏ ⵉⵎⵓⴽⵔⵉⵙⵏ ⴷ ⵉⴼⵙⵙⴰⵢⵏ ⵜⵜⵡⴰⴼⴽⴰⵏⵉⵏ, ⵙ ⵓⵙⵏⵜⵉ ⵏ ⵓⵍⵎⵎⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵔ ⵓⵙⵙⵖⵔ ⵏⵏⵙ. ⵉⵏⵉⵏ ⵉⵙⵍⵎⴰⴷⵏ ⵎⴰⵙ ⴱⴰⵀⵔⴰ ⵜⵔⵅⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵎⴽ ⵜⵜ ⵏⵙⵎⵣⴰⵣⴰⵍ ⴷ ⵜⵓⵜⵍⴰⵢⵉⵏ ⵢⴰⴹⵏⵉⵏ, ⵙⵙⵓⵜⵔⵏ ⵉⵍⵎⵎⴰ ⴰⵎⵓⵔⵙ ⵉ ⵉⵄⵔⵔⵉⵎⵏ ⵉⵎⵙⵏⴼⵍⴰⵍ ⴼⴰⴷ ⴰⴷ ⵙⵎⴷⵏ ⵉⵙⵏⴼⴰⵔ ⵏⵏⵙⵏ ⵙ ⵢⴰⵏ ⵓⵙⵏⴼⵍⵓⵍ ⵢⴰⴹⴼⵓⵜⵏ.
