ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵢⵉⵡⴹ ⵓⴳⴰⴷⵉⵔ ⵏ ⴱⴰⴽⵉⵏⵀⴰⵎ ⴳ ⴱⵕⵉⵟⴰⵏⵢⴰ ⵎⴰⵙ ⵜⵎⵎⵓⵜ ⵉⵍⵉⵣⴰⴱⵉⵜ ⵜⵉⵙ ⵙⵏⴰⵜ ⵜⴰⴳⵍⵍⵉⴷⵜ ⵏⴱⵕⵉⵟⴰⵏⵢⴰ ⴳ 96 (ⴽⴽⵓⵥ ⵡⴰⴳⵏⴰⵔⵏ ⴷ ⵚⴹⵉⵚ ⴷ ⵎⵔⴰⵡ) ⵏ ⵓⵙⴳⴳⵯⴰⵙ, ⵖⵎⴽ ⴰⵏⵏ ⴰⴼ ⵉⵍⵍⴰ ⵓⵖⵉⵍⵓⴼ ⴳ ⵓⴳⴰⴷⵉⵔ ⴰⴳⵍⴷⴰⵏ ⵍⵍⵉ ⵉⵙⵙⵓⴽⵉⵏ ⵉⵛⵏⵢⴰⵍⵏ ⴷⴼⴼⵉⵔ ⵏ ⵜⵎⵜⵜⴰⵏⵜ ⴰⴷ. ⴰⴳⵍⴷⵓⵏ ⵛⴰⵕⵍⵥ, ⵉⵡⵉⵙ ⵏ ⵜⴳⵍⵍⵉⴷⵜ ⴻⵍⵉⵣⴰⴱⵉⵜ, ⵏⵜⵜⴰⵏ ⴰⵔ ⴰⴷ ⵉⴳ ⴰⴳⵍⵍⵉⴷ ⴰⵎⴰⵢⵏⵓ ⵏ ⴱⵕⵉⵟⴰⵏⴰⵢⴰ ⵜⴰⵅⴰⵜⴰⵔⵜ.
ⵢⵉⵏⵓ ⵓⴳⴰⴷⵉⵔ ⵏ ⴱⴰⴽⵉⵏⵀⴰⵎ ⵎⴰⵙ ⵜⵎⵎⵓⵜ ⵜⴳⵍⵍⵉⴷⵜ ⵏ ⴱⵕⵉⵟⴰⵏⵢⴰ ⴳ ⵓⴳⴰⴷⵉⵔ ⵏ ⴱⴰⵍⵎⵓⵔⴰⵍ ⴳ ⵙⴽⵓⵜⵍⴰⵏⴹⴰ ⴰⵙⵙ ⵏ ⵓⴽⵡⴰⵙ 8 ⵛⵓⵜⴰⵏⴱⵉⵔ 2022.
ⴷⴼⴼⵉⵔ ⵎⴰⴷ ⵜⵎⵎⵓⵜ ⵜⴳⵍⵍⵉⴷⵜ ⴻⵍⵉⵣⴰⴱⵉⵜ, ⵔⴰⴷ ⵉⴳ ⵉⵡⵉⵙ ⴰⵎⵇⵔⴰⵏ ⵛⴰⵕⵍⵥ ⵍⵍⵉ ⴷⴰⵔ ⵍⵍⴰⵏ 73 (ⴽⵕⴰⴹ ⵡⴰⴳⵏⴰⵔⵏ ⴷ ⴽⵕⴰⴷ ⴷ ⵎⵔⴰⵡ) ⵏ ⵓⵙⴳⴳⵯⴰⵙ ⴰⴳⵍⵍⵉⴷ ⴰⵎⴰⵢⵏⵓ ⵏ ⴱⵕⵉⵟⴰⵏⵢⴰ, ⵖⵎⴽ ⵍⵍⵉ ⵔⴰⴽ ⵉⴳ ⴰⵎⵖⴰⵔ ⵏ ⵍⴽⵓⵎⴰⵏⵡⵉⵍⵜ ⵍⵍⵉ ⵉⵙⵎⵓⵏⵏ 14 (ⴽⴽⵓⵥ ⴷ ⵎⵔⴰⵡ) ⵏ ⵓⵡⴰⵏⴽ ⵖ ⵏⵉⵜ ⵜⵍⵍⴰ ⵓⵙⵜⵔⴰⵍⵢⴰ ⴷ ⴽⴰⵏⴰⴹⴰ ⴷ ⵏⵢⵓⵣⵉⵍⴰⵏⴷ.
ⵙ ⵖⵎⴽ ⴰⵏⵏ ⴰⵙ ⵔⴰⴷ ⵉⵙⵙⵏⵜⵉ ⵓⴳⵍⴷⵓⵏ ⵛⴰⵕⵍⵥ ⵉⵎⵉⵔ ⴰⵎⴰⵢⵏⵓ ⴷⴰⵔ ⵜⵓⵡⵊⴰ ⵍⵍⵉ ⵉⵃⴽⵎⵏ ⴱⵕⵉⵟⴰⵏⵢⴰ, ⵔⴰⴷ ⵢⴰⵙⵉ ⵖⵉⵍⴰⴷ ⵉⵙⵎ ⵏ ⵛⴰⵕⵍⵥ ⵡⵉⵙ ⴽⵕⴰⴹ, ⴷⴼⴼⵉⵔ ⵎⴰⴷ ⵜⴽⴽⴰ ⵉⵎⵎⵉⵙ ⵎⴰⴷ ⵉⴳⴰⵏ 70 (ⴽⵕⴰⴹ ⵡⴰⴳⵏⴰⵔⵏ ⴷ ⵎⵔⴰⵡ) ⵏ ⵓⵙⴳⴳⵯⴰⵙ ⴳ ⵉⵏⴱⴰⴹ ⵏ ⵓⴷⴰⴱⵓ ⵏ ⵜⵎⴰⵣⵉⵔⵜ ⵏ ⴱⵕⵉⵟⴰⵏⵢⴰ.
ⵉⵙⴰⵡⵍ ⵓⴳⵍⵍⵉⴷ ⵛⴰⵕⵍⵥ, ⵎⴰⵙ ⵜⴳⴰ ⵜⵎⵜⵜⴰⵏⵜ ⵏ ⵉⵎⵎⵉⵙ ⵜⵉⵣⵉ ⵏ ⵓⵖⵉⵍⵓⴼ ⵎⵇⵓⵔⵏ ⴳ ⵜⵓⴷⵔⵜ ⵏⵏⵙ, ⵢⵉⵏⵉ ⵓⵍⴰ ⵎⴰⵙ ⴷ ⴽⵉⴳⴰⵏ ⵏ ⵎⴷⴷⵏ ⴳ ⴱⵕⵉⵟⴰⵏⵢⴰ ⴷ ⵍⴽⵓⵎⴰⵏⵡⵉⵍⵜ ⴷ ⵓⵎⴰⴹⴰⵍ ⴰⴽⴽⵯ ⵔⴰⵙ ⵜⵜ ⵓⴹⵏⵏ. ⴳ ⵓⵎⵏⴰⴹ ⴰⴷ, ⵔⴰⴷ ⵉⵙⵎⵏⵉⴷ ⵓⵍⴷⵓⵏ ⵛⴰⵕⵍⵥ ⵢⴰⵏ ⵉⵏⴰⵡ ⵉ ⵜⵎⵜⵜⴰ ⴰⵙⵙ ⵏ ⵓⵙⵉⵎⵡⴰⵙ.
ⴳ ⵓⵎⵏⵉⴷ ⵏⵏⵙ, ⵜⵏⵏⴰ ⵍⵉⵣ ⵜⵔⴰⵙ, ⵜⴰⵏⵙⵙⵉⵅⴼⵜ ⵏ ⵉⵎⴰⵡⵙⴰⵙⵏ ⴳ ⴱⵕⵉⵟⴰⵏⵢⴰ, ⵎⴰⵙ ⵜⴳⴰ ⵜⴳⵍⵍⵉⴷⵜ ⵍⵍⵉ ⵉⵎⵎⵓⵜⵏ ⴰⵊⴰⵕⵉⴼ ⴼ ⵜⵜⵓⵚⴽⴰ ⴱⵕⵉⵟⴰⵏⵢⴰ ⵜⴰⵎⴰⵢⵏⵓⵜ. ⵖⵎⴽ ⵍⵍⵉ ⵜⵏⵏⴰ ⵍⵉⵣ ⵜⵔⴰⵙ ⵎⴰⵙ ⵜⵍⵍⴰ ⴷ ⵓⴳⵍⵍⵉⴷ ⴰⵎⴰⵢⵏⵓ ⵏ ⴱⵕⵉⵟⴰⵏⵢⴰ, ⵜⵖⵔ ⵓⵍⴰ ⵉ ⵎⴰⵕⵕⴰ ⵏ ⵉⴱⵕⵉⵟⴰⵏⵉⵢⵏ ⵉ ⵜⵢⴰⵏⵜ ⴷ ⵓⵙⵏⴰⵍ ⵏⵏⵙ.
ⵜⵉⵏⵉ ⴳ ⵜⵙⴳⵓⵔⵉ ⵏⵏⵙ ⴷⴰⵜ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴳ ⵓⵙⵖⵉⵎ ⵏⵏⵙ ⴳ ⴷⵡⴰⵏⵉⵏ ⵙⵜⵔⵉⵜ ⵎⴰⵙ ⵉⵍⵍⴰ ⵓⵙⵏⵜⵉ ⵏ ⵜⴼⵔⴽⴰ ⵜⴰⵎⴰⵢⵏⵓⵜ ⴳ ⵓⵎⵣⵔⵓⵢ ⵉⵥⵉⵍⵏ ⵏ ⵜⵎⴰⵣⵉⵔⵜ ⵏⵏⵖ ⵜⴰⵅⴰⵜⴰⵔⵜ.
ⵜⵎⵏⴰⵇⵇⴰⵔ ⵢⴰⴷ ⵍⵉⵣ ⵜⵔⴰⵙ ⵜⴰⴳⵍⵍⵉⴷⵜ ⵉⵍⵉⵣⴰⴱⵉⵜ ⵜⵉⵙ ⵙⵏⴰⵜ ⴳ ⵓⵙⵖⵉⵎ ⵏⵏⵙ ⴳ ⵙⴽⵓⵜⵍⴰⵏⴹⴰ ⴳ ⴱⴰⵍⵎⵓⵔⴰⵍ ⴰⵙⵙ ⵏ ⵓⵙⵉⵏⴰⵙ ⵍⵍⵉ ⵉⵣⵔⵉⵏ, ⵍⵍⵉⵖ ⵜⵜ ⵜⵙⵎⵉⴳⵍ ⴰⴷ ⵜⵙⴽⵔ ⵜⴰⵏⴱⴰⴹⵜ ⵜⴰⵎⴰⵢⵏⵓⵜ ⴳ ⵓⵎⵔⴰⵙ ⵏ ⴱⵓⵔⵡⵉⵙ ⵊⵓⵏⵙⵓⵏ.
ⵉⵍⵍⴰ ⵓⵖⵉⵍⵓⴼ ⴳ ⴽⵓ ⴱⵕⵉⵟⴰⵏⵢⴰ, ⴰⵛⴽⵏ ⵏⵏ ⵉⵏⵎⵓⵔⴰⵏ ⵙ ⴷⴰⵔ ⵉⴳⵓⴷⴰⵔ ⵉⴳⵍⴷⴰⵏⵏ ⵃⵎⴰ ⴰⴷ ⵙⵔⵙⵏ ⵜⵉⵡⵛⴽⵉⵏⵉⵏ ⵏ ⵉⵊⵊⵉⴳⵏ, ⴰⵢⵍⵍⵉ ⵉⴳⴰⵏ ⵜⴰⵎⴰⵜⴰⵔⵜ ⴼ ⵓⵖⵉⵍⵓⴼ ⵏⵏⵙⵏ ⴷⴼⴼⵉⵔ ⵏ ⵜⵎⵜⵜⴰⵏⵜ ⵏ ⵜⴳⵍⴷⵉⵜ ⵏⵏⵙⵏ.
ⵙⴳ 1952 (ⵉⴼⴹ ⴷ ⵜⵥⴰⵜ ⵜⵉⵎⵎⴰⴹ ⴷ ⵙⵉⵏ ⵡⴰⴳⵏⴰⵔⵏ ⴷ ⵙⵎⵎⵓⵙ ⴷ ⵎⵔⴰⵡ) ⴰⴷ ⵔⴳⴰ ⵉⵍⵉⵣⴰⴱⵉⵜ ⵜⴰⴳⵍⵍⵉⴷⵜ ⵏ ⴱⵕⵉⵟⴰⵏⵢⴰ ⴷ ⵎⴰⴷ ⵉⴳⴰⵏ ⵓⵍⴰ 12 (ⵙⵉⵏ ⴷ ⵎⵔⴰⵡ) ⵏ ⵓⵡⴰⵏⴽ ⵢⴰⴷⵏⵉⵏ, ⴳⵉⵙⵏ ⴽⴰⵏⴰⴹⴰ ⴷ ⵓⵙⵜⵕⴰⵍⵢⴰ ⴷ ⵏⵢⵓⵣⵉⵍⴰⵏⴷⴰ. ⵜⴳ ⵜⴳⴳⵍⵉⴷⵜ ⵉⵍⵉⵣⴰⴱⵉⵜ ⵜⵉⵙ ⵙⵏⴰⵜ ⵙⴳ ⵎⴰⴷ ⵜⵍⵍⴰ ⴳ ⵓⵎⵔⴰⵙ ⵏ ⴱⴰⴱⴰⵙ ⴰⴳⵍⵍⵉⴷ ⵊⵓⵔⵊ ⵡⵉⵙ ⵙⵉⵏ ⵍⵍⵉⵖ ⴷⴰⵔⵙ 25 (ⴰⴳⵏⴰⵔ ⴷ ⵙⵎⵎⵓⵙ) ⵏ ⵓⵙⴳⴳⵯⴰⵙ ⵜⴰⵎⴰⵜⴰⵔⵜ ⵏ ⵓⵔⴳⴳⵉⴳ ⴳ ⵜⴰⵙⵙⴰⵙⵉⵏ ⴷ ⵉⵙⵓⵔⵙⵏ ⵉⵎⵏⵏⴰⵡⵏ ⵣⵔⵉⵏ ⴳ ⵓⵎⵣⵔⵓⵢ ⵏ ⵜⴳⵍⴷⵉⵜ ⵉⵎⵓⵏⵏ ⵏⵖ ⴱⵕⵉⵟⴰⵏⵢⴰ ⵜⴰⵅⴰⵜⴰⵔⵜ. ⵜⵏⵢⵉⵍⴽⵉⵏ ⴷ ⵉⵅⴰⵜⴰⵔⵏ ⵏ ⵜⵙⵔⵜⵉⵜ ⴳ ⵓⵎⴰⴹⴰⵍ ⴰⵎ ⵏⵉⵀⵔⵓ ⴷ ⵛⴰⵕⵍ ⴷⵉⴳⵓⵍ ⴷ ⵎⴰⵏⴷⵉⵍⵍⴰ.
ⵢⵓⵔⴰ ⵜ: ⵕⴰⵛⵉⴷ ⵙⵉⴼⴰⵡ
