ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⴳⴳⵯⵓⴷⵉ ⵡⴰⵡⴰⵍ, ⵅⴼ ⵎⴰⵢⴷ ⵉⵊⵔⴰⵏ ⴳ ⵔⵉⴼ, ⴰⵡⴰⵍ ⵉⴳⴰⵏ ⵡⵉⵏ ⵜⵉⴷⵜ ⴷ ⵡⵏⵏⴰ ⵓⵔ ⵜ ⵉⴳⵉⵏ? ⵉⴳⴳⵯⵓⴷⵉ ⵡⴰⵡⴰⵍ, ⴰⵢⵍⵍⵉ ⴳⴳⵯⵓⴷⵉⵏ ⵉⵎⴰⵡⵏ ⵉⵜ ⵉⵜⵜⵉⵏⵉⵏ, ⴰⵢⵍⵍⵉ ⴳⴳⵯⵓⴷⵉⵏ ⵡⵉⵙ ⵓⵔ ⵉⵎⵙⴰⵙⴰⵏ ⴷ ⵡⵉⵙ ⵓⵔ ⴰⴳⵉⵜⵙ ⵉⵎⵙⴰⵙⵏ.
ⴰⵎⴰⵜⴰ ⴳ ⵉⵎⵖⵔⴰⴱⵉⵢⵏ ⵢⵉⵡⵉ ⵅⴼ ⵎⴰⵢⴷ ⵜⵜⵉⵏⵉⵏ ⵉⵎⴰⵙⵙⵏ ⵏ ⵜⴰⵜⴷⵢⵓⵍⵓⵊⵉⵜ ⵍⵎⵅⵣⵏ , ⴷ ⵏⵜⵜⴰⵜ ⴰⵢⴷ ⵉⵏⵏⴰⵏ ⵉⵙ ⴷ ⵍⵍⴰⵏ ⵉⴼⴰⵙⵙⵏ ⵓⴱⵔⵔⴰⵏⵉ ⴼⵉⵔ ⵉ ⵜⴳⵔⴰⵡⵍⴰ ⵏ ⵔⵉⴼ, ⴰⵍⵍⵉⴳ ⵓⴽⵣⵏ ⵎⵉⵏⴷ ⵉⵙ ⴷ ⵜⴼⴼⵖ ⴱⵓⵍⵉⵣⴰⵔⵢⵓ ⴹⵏⵉⵏ ⴷ ⵜⵙⴳⴰ ⵜⴰⵏⴰⴼⵍⵍⴰⵜ ⵏ ⵜⵎⴰⵣⵉⵔⵜ, ⴰⵍⵍⵉⴳ ⵜⵣⵍⴰ ⵏ ⵜⴰⴷⵢⵓⵍⵓⵊⵉⵜ ⴰⴷ, ⵉ ⵢⵎⵖⵔⴰⴱⵉⵢⵏ ⵜⵓⴳⵜ ⵓⵙⵡⵏⴳⵎ, ⵙ ⵓⵔ ⴷⴰ ⵜⵜⴰⵙⵉⵏ ⴰⵡⴰⵍ ⵉⵏ ⴳ ⵜⵖⴰⵡⵙⴰ ⵢⴰⴷ, ⴰⵔ ⵜⵜⴰⵡⵉⵏ ⵖⴰⵙ ⵅⴼ ⵎⴰⵢⴷ ⵜⵔⴰ ⵜⵏⴱⴰⴷⵜ ⴰⴷ ⵜⵜ ⵜⵙⵙⵉⵡⴹ ⵉ ⵢⵎⵖⵔⴰⴱⵉⵢⵏ. ⴰⵢⴰⴷ ⵏ ⵜⴰⴼⴰⵜ ⵎⵉ ⵜⵔⴰ ⵜⵔⴱⵉⵄⵜ ⵜⴰⵏⴱⴱⴰⴷⵜ ⴰⴷ ⵜⵉⵏⵉ, ⵉⵙⵓⵍ ⴰⴷ ⵉⵊⵔⵓ ⵎⵛ ⵓⵔ ⵉⵊⵔⵉ, ⵉⴷⴷⵖ ⵡⵏⵏⴰ ⵉⵜⵜⵓⵔⴰⵔ ⵙ ⵡⴰⴼⴰ ⵉⵙⵓⵍ ⴰⴷ ⵜⵜ ⴰⵖⵏ ⵜⵉⵇⵇⴰⴷ ⵏⵙ. ⴷ ⵡⵏⵏⴰ ⵓⵖⵏ ⵜⵉⵇⵇⴰⴷ ⵓⵔ ⴷⴰⵢ ⴰⵙ ⵉⵜⴽⴽⵙ ⵓⵣⵎⵓⵍ, ⵎⵖⴰⵔ ⵉⵙⵙⵔⵡⵉ ⵉⵙⴰⴼⴰⵔⵏ ⵏ ⵎⴰⵢⴷ ⵉⴳⴰⵏ ⵜⵓⵊⵉⵜ.
ⵔⵉⴼ ⴰⵎ ⵜⵎⵉⵣⴰⵔ ⵉⵎⴰⵣⵉⵖⵏ, ⴷ ⵉⵎⴰⵣⵉⵖⵏ ⵙ ⵉⵅⴼ ⵏⵙⵏ, ⵎⴰⵏⵉⴳ ⵎⵛⵜⴳⵏ ⴰⴷ ⵔⵓⵏ ⵙ ⵓⵅⵓⴱ ⵏⵙⵏ, ⵍⵍⴰ ⴷ ⵜⴼⵖⵏ ⵜⵜ ⵣⵣⴰⵍⴰⵜ, ⴰⴷ ⴰⵙⵏ ⴳⵉⵏ ⵟⴰⵔⴰⵇⴰ , ⴰⴷ ⵉⵏⵉⵏ ⵜⵜ ⵉⵙ ⴷ ⵉⴽⴽⴰ ⵓⵢⴰⴷ ⴱⵔⴰ ⵏ ⵜⵎⴰⵣⵉⵔⵜ. ⵟⴰⵎⵒⵇⵔⴰⵏⵉⵜ ⵉⴽⴽⴰⵏ ⴷ ⵉⵙⵓⵍ ⵉ ⵜⵎⵉⵣⴰⵔ ⵓⵔ ⵉⵎⵓⵏⵏ ⴷ ⵓⴼⵓⵙ ⵉ ⵣⵣⴰⵍⴰⵜ ⴰⴷ, ⴰⵢⴷ ⵉⴳⴰⵏ ⵉⵙⴼⴹⴰⵡⵏ ⵉ ⵜⵖⵡⴰⵖⵜ ⵏ ⵔⵉⴼ ⴷ ⵎⴰⵢⴷ ⵉⴳⴰⵏ ⴰⵎ ⵏⵜⵜⴰ. ⵓⵔ ⵏⴻⵏⵏⵉ ⴰⴷ ⵏⵜⵜⵓ ⵉⵙ ⴷⵔⵏ ⵉⵎⴰⵣⵉⵖⵏ ⴳ ⵓⵅⵓⴱ ⵡⴰⴹⵓ, ⴰⵔ ⵜⵜⴰⵙⵉⵏ ⵡⵉⵢⴰⴹ ⴳ ⵉⵏⴱⴱⴰⴹⵏ ⵎⴰⵢⴷ ⵉⴳⴰⵏ ⵡⵉⵏⵙⵏ, ⵣⴳ ⵉⵙⵍⵎⴰⵏ ⵏ ⵔⵉⴼ ⴷ ⵙⵓⵙ ⴰⵔ ⵡⵓⵣⵣⴰⵍⵏ ⵓⵙⵎⵎⵔ ⴷ ⵢⵉⵜⴳⵍ ⵏ ⴼⴰⵣⴰⵣ.
ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⵉⵣⴷⵉⵏ ⵙ ⵡⴰⴽⴰⵍ ⴷ ⵡⴰⵎⴰⵏ ⴷ ⵜⵓⴷⵔⵜ ⵉⵎⴰⵣⵉⵖⵏ, ⴳ ⵎⴰⵢⴷ ⵉⴳⴰⵏ ⵜⴰⵏⵉⵍⴰ, ⵙⵢⴰ ⵖⵔ ⴷⴰⵜ, ⵓⵔ ⵏⵏⵉⵏ ⴰⴷ ⵙⵓⵙⵎⵏ ⵉ ⵡⵢⴰⴷ, ⵉⴷⴷⵖ ⵢⴰⵜ ⵜⵓⴷⵔⵜ ⴰⵢⴷ ⵉⵍⵍⴰ, ⵓⵔ ⵉⵍⵍⵉ ⵡⵓⴳⴰⵔ, ⵎⵛ ⵔⴰⵏ ⴰⴷ ⴷⵔⵏ ⴳ ⵎⴰⵢⴷ ⵉⵥⵉⵍⵍ, ⵓⵎⴰ ⴰⵅⵓⴱ , ⵓⵔ ⵉⵍⵍⵉ ⵎⴰⵢⵜ ⵉⵔⴰⵏ, ⴰⵎⵓⴳⴳⵓ ⵉⵙⴳⴳⵯⴰⵙⵏ ⴰⵢⴷ ⵍⵍⴰⵏ ⴳ ⵓⵃⵣⴰⵣ, ⴰⵢⴷ ⵍⵍⴰⵏ ⴳ ⵜⵎⵃⵔⴰⵏⵉⵜ, ⵓⵔ ⵉⵙⵓⵍ ⵎⴰⵢⴷ ⵉⵣⵔⵉⵏ, ⴰⵅⵓⴱ ⴷ ⵍⵎⵓⵜ ⵉⵛⵜ ⵏ ⵜⴰⵖⵎⴰ ⴰⴳ ⴷ ⵓⵙⴰⵏ. ⴰⵅⵓⴱ ⴰⵢⴷ ⵉⴳⴰⵏ ⵜⴰⵖⵡⴰⵖⵜ, ⵓⵔ ⴷ ⵜⴽⴽⵉ ⵜⵖⵡⴰⵖⵜ ⵉ ⵔⵉⴼ, ⴰ ⴱⵍⴰ ⴰⵃⵍⵉⴳ ⵏⵙ, ⵜⴰⵎⴰⵔⴰ ⴳ ⵍⵍⴰⵏ ⵎⵉⴷⴷⵏ ⵏⵙ, ⵉⵔⵉⴼⵉⵢⵏ ⵇⵔⴰⵏ, ⵓⵔ ⵇⵔⴰⵏ ⴳ ⵙⴽⵡⵉⵍⴰⵜ ⵍⵎⵅⵣⵏ, ⵇⵔⴰⵏ ⴳ ⵜⵓⴷⵔⵜ ⵏⵙⵏ, ⵉⵙⴼⴰⵏ ⵜⴰⵡⵏⴳⵉⵎⵜ ⵏⵙⵏ, ⴰⴷ ⵉⵙⵉⵏⵏ ⵉⵙ ⵓⵔ ⵉⵍⵍⵉ ⴽⵔⴰ ⵢⴰⴹ, ⴱⵍⴰ ⴰⴷ ⵉⵏⵉⵏ ⵓⵀⵓ ⵉ ⵜⵎⵃⵇⵔⴰⵏⵉⵜ, ⵉ ⵜⵎⵓⵣⴷⵔⵜ, ⵉ ⵢⵎⴰⴽⴰⵔⵏ ⵉⵢⴷⴷⴰⵜⵏ ⵏⵙⵏ, ⵉ ⵎⴰⵢⴷ ⵉⵜⵜⵉⴷⵉⵔ ⵅⴼ ⵜⵓⴷⵔⵜ ⵏⵙⵏ . ⵉⵙⵓⵍ ⴰⴷ ⵏⴽⵔⵏ ⵉⵎⴰⵣⵉⵖⵏ ⴳ ⵜⵙⴳⴳⵉⵡⵉⵏ ⵢⴰⵏ, ⵎⵛ ⵜⴷⴷⴰ ⵙ ⵉⵎⵛⵉ. ⵔⵉⴼ ⵓⵔ ⵉⴳⵉ, ⴷ ⵎⵉⴷⴷⵏ ⵏⵙ, ⵖⴰⵙ ⵜⵉⴷⵜ ⵉ ⵜⵓⴷⵔⵜ ⵏⵖ. “ⴰⴷ ⵏⵉⵍⵉ ⵏⵖⴷ ⵓⵔ ⵏⵜⵜⵉⵍⵉ”. ⴷ ⵡⵏⵏⴰ ⵉⵙⵔⵔⵎⵏ ⵅⴼ ⵜⴰⴷⵢⵓⵍⵓⵊⵉⵜ ⵜⴰⵅⵏⴷⴰⵍⵍⴰⵙⵜ, ⵉⵙⵓⵍ ⴰⴷ ⵜ ⴰⵍⵉⵏ ⵉⵛⴰⵍⵉⵅⵏ ⵏⵏⴰ ⵅⴼ ⵉⵙⵔⵎ.
ⵜⵓⴷⵔⵜ ⵉ ⵔⵉⴼ …. ⵜⵓⴷⵔⵜ ⵉ ⵢⵎⴰⵣⵉⵖⵏ.
ⵙⴰⵄⵉⴷ ⴱⴰⵊⵊⵉ
