ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⵙⵙⵉⵜⴳ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵡⵉⵣ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵙⵓⵖⵍⵜ ⵏ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⵎⵔⵙⵍⴰⵏ, ⵉⵜⵜⵓⵙⴳⵎⴹⵏ ⴰⴽⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴳ 14 ⵛⵓⵜⴰⵏⴱⵉⵔ 2022, ⵖⵔ ⵜⵙⵏⵜⴰⵢⵉⵏ ⴰⵡⵜⵜⴰⵙ ⵏⵏⵙⵏⵜ ⴰⵙⵎⵓⵜⵜⴳ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⴷ ⵓⵎⵔⴰⵔⴰ ⵏ ⵜⵎⵓⵣⴰⵢⵉⵏ ⴷ ⵜⵎⵙⴽⵔⵉⵏ ⵜⵉⴼⵓⵍⴽⵉⵏ ⴰⴼⴰⴷ ⴰⴷ ⵉⵜⵜⵓⵙⴷⵓⵙ ⵓⵣⵔⴰⴽ ⵏ ⵉⵏⴰⵡⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵖⵏⵜ ⵏ ⵜⵏⴼⵔⵓⵜ.
ⵉⴷⴷⴰ ⴷ ⵖⴰⵢⴰ ⴷ ⴳ ⵜⴳⵓⵔⵉ ⵏ ⵎⴰⵙⵙ ⴰⵃⵎⴰⴷ ⴰⵢⵜ ⵟⵟⴰⵍⴱ, ⵍⵡⴰⵍⵉ ⵏ ⵜⵏⴼⵔⵓⵜ ⴳ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴳ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⵏ ⵉⵙⵎⴰⵜⵜⴰⴳⵏ/ⵜⵉⵙⵎⴰⵜⵜⴰⴳⵉⵏ ⵅⴼ « ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵉⵙⵓⵔⵙⵏ ⵏ ⵜⵎⵣⵡⴰⴳⵜ: ⵜⵉⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⴰⵜⵉ ⴰⵏⴰⵎⵓⵔ ⵏ ⵓⴼⵔⴰⴳ ». ⵉⵙⴷⴷⵉⴷ ⵎⴰⵙⵙ ⴰⵢⵜ ⵟⵟⴰⵍⴱ ⵎⴰⵙ ⵜⴰⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⵏⵏⴰ ⵢⴰⵎⵓⵏ ⴳ ⵓⵙⴰⵜⵉ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⴰⵏⵎⵜⵜⴰ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵙⵡⵓⵔⵉⵢⵏ ⵉⵎⵣⵡⴰⴳⵏ ⴷ ⵉⴼⵔⴷⵉⵙⵏ ⵏ ⵜⵡⵊⵉⵡⵉⵏ ⵏⵏⵙⵏ, ⵜⵙⵎⵏⴰⵍ ⵉⵙⵡⴰⵍⴰⵜⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵏⵏⴰ ⵉⴳⴰⵏ ⴰⵎⴷⵢⴰ ⴰⵎⵣⵡⴰⵔ, ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ ⴳ ⵢⵉⴳⵔ ⵏ ⵓⵙⵡⵓⴷⴷⵓ ⴰⵏⴼⴳⴰⵏ ⵏ ⵉⵡⵜⵜⴰ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵣⵡⴰⴳⵉⵏ / ⵉⵎⵣⵡⴰⴳⵏ ⵙ ⴰⴽⴽⵯ ⵉⵙⵎⵉⵍⵏ ⵏⵏⵙⵏ.
ⵉⵙⵙⵉⵜⴳ ⴰⵡⴷ ⵓⴳⵏⵙⴻⵙ ⵏ ⵜⵎⵔⵙⵍⵜ ⵏ ⵜⵏⴼⵔⵓⵜ ⵉⵡⵉⵣ ⵏ ⵓⵙⵇⵇⵉⵎ ⵅⴼ ⵓⵙⴷⵓⵙ ⵏ ⵓⵎⵏⵉⴷ ⴰⵣⵔⴼⴰⵏ ⴳ ⵓⵙⵡⵓⴷⴷⵓ ⵏ ⵜⵣⵣⵉⴳⵣⵉⵏ ⵏ ⵜⵎⵣⵡⴰⴳⵜ ⵙ ⵎⴰⴷ ⵉⵎⵙⴰⵙⴰⵏ ⴰⴽⴷ ⵉⵏⴰⵡⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⴷ ⵓⵙⵎⵀⵍ ⵏⵏⵙ ⵉ ⵜⵎⵓⵣⴰⵢⵉⵏ ⵏ ⵉⵙⵓⵜⴰⵢ ⵏⵏⵙ ⴷ ⵉⵎⵓⵣⴰⵢⵏ ⵏⵏⵙ ⵉⵎⵥⵍⴰⵢⵏ ⵉ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵉⵎⵙⵜⴳⴳⴰⵔⵏ ⵅⴼ ⵓⵣⵣⴳⵉⵔ ⵏ ⵓⵙⵍⴳⵏ, ⵜⵜⵡⴰⴼⴽⵏⵜ ⴰⵙⵏ ⵜⵥⴷⴰⵕⵉⵏ ⵏ ⵓⵎⵔⴰⵔⴰ ⴰⵎⵛⵛⴰⵔⵏ ⴷ ⵓⵎⴹⴰⴽⴰⵕ ⴰⴽⴷ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵙⵉⴷⴷ ⵅⴼ ⵅⴼ ⵉⵎⵙⴰⵔⴰⵙⵏ ⴷ ⵜⵏⵥⴰⵕ ⵜⵉⵎⵇⵔⴰⵏⵉⵏ ⵏⵏⴰ ⵎⵉ ⵜⵜⵎⴰⴳⴳⴰⵔⵏ ⴳ ⵜⵉⵣⵉ ⵏ ⵜⵙⴽⵔⴰⵡⵜ ⵏ ⵜⵡⵓⵔⵉⵡⵉⵏ ⵏⵏⵙⵏ ⵜⵉⴽⵓⵢⴰⵙⵙⵉⵏ ⴳ ⵢⵉⴳⵔ ⴰⴷ.
ⵉⵙⵙⵎⵜⵔ ⵎⴰⵙⵙ ⴰⵢⵜ ⵟⵟⴰⵍⴱ ⵎⴰⵙ ⵉⴳⴰ ⵓⵙⴰⵡⵔ ⴰⴷ ⴰⵙⵓⵍⴼ ⵏ ⵓⵙⵎⴰⵢⵏⵓ ⵏ ⵓⵙⵓⵖⵏ ⴰⵎⵛⵛⴰⵔⵏ ⵏⴳⵔ ⵜⵎⵔⵙⴰⵍ ⵏ ⵜⵏⴼⵔⵓⵜ ⴷ ⵉⵣⵔⴼⴰⵏ, ⴷ ⵓⵙⴳⵓⴷⵉ ⵏ ⵜⵓⴳⴳⴰⵣ ⵉⵡⴰⵜⵜⵙⵏ ⴰⵙⴷⵓⵙ ⵏ ⵉⵎⴰⵙⵙⵏ ⵏ ⵓⴼⵔⴰⴳ ⵏ ⵜⵎⵣⵡⴰⴳⵉⵏ/ⵉⵎⵣⵡⴰⴳⵏ ⴷ ⵜⵏⴼⵔⵓⵜ ⵏ ⵉⵣⵔⴼⴰⵏ ⵏⵏⵙⵏ ⴷ ⵓⴼⵔⴰⴳ ⵏ ⵡⴰⴷⴷⵓⵔ ⵏⵏⵙⵏ ⴱⵍⴰ ⵓⵙⴽⴰⵔ ⵙ ⵓⵙⵓⵔⵙ ⵏⵏⵙⵏ ⴰⵎⵙⵙⵓⴳⵓⵔ.
ⵉⴽⴽⴰ ⵓⴳⵏⵙⴰⵙ ⵏ ⵜⵎⵔⵙⵍⵜ ⵏ ⵜⵏⴼⵔⵓⵏⵜ ⵍⴰ ⵉⵙⴰⵡⴰⵍ ⴳ ⵜⵙⵓⵜⵍⵜ ⵏⵏⴰ ⵎⵉ ⵜⵕⵥⵎ ⵜⵉⵡⵓⵔⵉⵡⵉⵏ ⵏⵏⵙ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⴳⵉⵙ ⵅⴼ ⵉⵎⵉⴷⵏ ⵉⵙⵜⵔⴰⵜⵉⵊⵉⵢⵏ ⵏ ⵜⵎⴷⵔⴰⵡⵜ ⵏⴳⵔ ⵓⵙⵇⵇⵉⵎ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴳ ⵢⴰⵜ ⵙⴳ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵜⵉⵎⵣⵡⴰⵔⵉⵏ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⵎⵏⵥⴰⵡ ⴷ ⵓⴳⵔⴰⵖⵍⴰⵏ.
