ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴳ ⵓⵙⴰⵜⵉ ⵏ ⵓⴹⴼⴰⵕ ⵏ ⵓⵙⵏⴼⴰⵕ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ,ⵜⵙⴽⵔ ⵜⴰⴹⴰ ⵜⴰⵎⵖⵔⵉⴱⵉⵜ ⴳ ⵡⴰⵙⵙ ⵏ 8 ⵏⵓⵡⴰⵏⴱⵉⵔ ⵉⵣⵔⵉⵏ, ⵢⴰⵏ ⵓⵙⵉⵡⴹ ⵅⴼ ⵡⴰⴷⴷⴰⴷ ⵉⵀⵔⵛⵏ ⵏⵏⴰⵖ ⴰⵔ ⵉⵜⵜⵉⴷⵉⵔ ⵓⵙⵏⴼⴰⵔ ⴰⴷ ⵏ ⵓⵙⵙⵍⵎⴷ ⵏ ⵜⵎⴰⵣⵉⵖⵜ. ⵍⵍⵉⵖ ⵜⴼⵔⴽ ⵜⴰⴹⴰ ⵙ ⵜⵉⵍⴰⵍ ⵏ ⵡⴰⵎⵓⵏ ⴰⵎⴰⴷⴰⵏ ⴰⴼⴰⴷ ⴰⴷ ⵉⵙⴱⵓⵖⵍⵓ ⴰⵙⵏⴼⴰⵕ ⴰⴷ ⵙ ⵜⵣⵎⵎⴰⵔ ⵏ ⵜⵏⴱⴰⴷⵜ ⵜⴰⵎⴰⵢⵏⵓⵜ ⵙ ⵎⴰⴷ ⵉⵣⵍⵉⵏ ⵙ ⵓⵙⴷⴰⵡ ⴰⴷ, ⵜⵏⵏⴰ ⵜⴰⴹⴰ ⵜⴰⵎⵖⵔⵉⴱⵉⵜ ⴰⴷ ⵜⵙⴽⵔ ⵢⴰⵏ ⵡⴰⵀⵉⵍ ⴷ ⵓⵙⴷⴰⵡ ⵉⵣⵍⵉⵏ ⵙ ⵓⵙⵏⴼⴰⵔ ⴰⴷ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ .
ⵎⴰ ⴰⵏⵏ ⴰⴼ ⵔⴰⴷ ⵜⵙⵏⵎⴰⵍⴰ ⵜⴰⴹⴰ ⵢⴰⵏ ⵓⵏⵎⴰⵍⴰ ⵏ ⵉⵏⵎⵓⴳⴳⴰⵔⵏ ⴷ ⵜⵉⵏⴰⵡⵉⵏ ⵅⴼ ⵓⵙⵏⵜⵍ ⴰⴷ ⵏⵉⵜ, ⵔⴰⴷ ⴳⵉⵙ ⴰⵡⵙⵏ ⵉⴽⴰⴷⵉⵎⵉⵏ ⴷ ⵉⵙⵍⵎⴰⴷⵏ ⵉⵡⵡⵓⵔⴰⵏⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵉⵎⵙⵜⴳⴳⴰⵔⵏ ⵢⴰⴷⵏⵉⵏ. ⴳ ⵓⵙⴰⵜⵉ ⴰⴷ ⴰⴼ ⵔⴰⴷ ⵜⵙⵏⵎⴰⵍⴰ ⵜⴰⴹⴰ ⵜⴰⵎⵖⵔⵉⴱⵉⵜ ⴰⵙⵙ ⵏ ⴰⵙⵉⵎⵡⴰⵙ 10 ⴷⵓⵊⴰⵏⴱⵉⵔ ⵢⴰⵏ ⵓⵏⵎⵓⵇⵇⴰⵕ ⴷ ⵉⵎⵙⵜⴳⴳⴰⵔⵏ ⴷ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵏⴰⴷⵉⵏ ⴰⴽⴽⵯ ⵏ ⵜⴳⵍⴷⵉⵜ, ⵎⴽⵍⵍⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴰⵙⵙ ⵏ ⴰⵙⵉⴹⵢⴰⵙ ⴰⴷ ⵏⵉⵜ ⵢⴰⵜ ⵜⵉⵏⴰⵡⵜ ⵏⵏⴰⵖ ⵔⴰⴷ ⵢⴰⵎⵓ ⵎⴰⵙⵙ ⵃⵎⴰⴷ ⵄⴰⵚⵉⴹ,ⴷ ⵎⴰ ⵄⴱⴷⵙⵙⵍⴰⵎ ⵅⴰⵍⴰⴼⵉ, ⴷ ⵓⵙⵍⵎⴰⴷ ⵄⵍⵉ ⴳⵯⵉⵍⴰⵍ ⵏⵜⵜⴰ ⴷ ⵓⵙⵍⵎⴰⴷ ⵏ ⵜⵎⴰⵣⵉⵖⵜ ⵎⴰⵙⵙ ⵕⵛⵉⴷ ⴰⴽⵕⴽⴰⵕ .
ⵔⴰⴷ ⵜⴰⴼⵉⵎ ⵢⴰⵜ ⵜⵏⴼⵓⵍⵜ ⵏ ⵓⵙⵏⵎⴰⵍⴰ ⵏ ⵜⵉⵏⴰⵡⵜ ⴰⴷ ⵏⵏⴰ ⵔⴰⴷ ⵉⵜⵜⵓⵙⵏⵎⴰⵍⴰ ⴰⵙⵙ ⵏ ⴰⵙⵉⴹⵢⴰⵚ 11 ⴷⵓⵊⴰⵏⴱⵉⵔ 2021 ⴳ ⵜⵉⵣⵉ ⵜⵉⵙⵙ ⵜⵥⴰⵜ ⴷ ⵓⵣⴳⵏ :
ⵜⵉⵖⵔⵉ ⴳ ⵜⴰⵙⵙⴰⵙⵜ ⵏ ⵓⵙⵏⴼⴰⵔ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ ⴷ ⵉⴼⵙⵙⴰⵢⵏ ⵏ ⵓⵙⴱⵓⵖⵍⵓ ⵏⵏⵙ .
ⵙⴳ ⵍⵍⵉⵖ ⵉⵙⵙⵏⵜⵉ ⵓⵙⵏⴼⴰⵕ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ, ⴰⵙⴳⴳⵯⴰⵙ ⵏ 2003, ⴰⴷ ⵍⵍⴰⵏ ⴽⵉⴳⴰⵏ ⵏ ⵉⵎⵓⴽⵔⵉⵙⵏ ⵏⵏⴰ ⵉⵍⵍⴰⵏ ⴷⴰⵜ ⵏ ⵓⵙⵏⴼⴰⵕ ⴰⴷ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵜⵍⵍⴰ ⵢⴰⵜ ⵜⵎⵢⴰⵇⵇⴰⵏⵜ ⴳⵔ ⵜⵏⵖⵍⴰⴼⵜ ⵏ ⵓⵙⴳⵎⵉ ⵜⴰⵏⴰⵎⵓⵔⵜ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵜⵏⵖⵓⴱⴰ ⵜⵎⵢⴰⵇⵇⴰⵏⵜ ⴰⴷ ⴳ ⵎⵏⵉⴷ ⵏ ⵡⴰⵔ ⵜⴰⵢⵔⵉ ⵏ ⵉⵎⵙⵜⴳⴳⴰⵔⵏ ⵏ ⵜⵉⵏⵎⵍ ⵜⴰⵎⵖⵔⵉⴱⵉⵜ ⵉ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵙⴳ ⴷⴰⵔ ⵉⵏⵎⵓⵔⵉⵏ ⴷ ⵜⵏⵎⵓⵔⵉⵢⵉⵏ ⵜⵉⵎⵖⵔⵉⴱⵉⵢⵉⵏ .
ⵉⵙⵓⵍ ⵓⵙⵏⴼⴰⵕ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⴳⴰ ⴰⴷⵙⵍⴰⵏ ⴱⵍⴰ ⵏⵏⵙ ⵓⵔ ⵖⵉⵏ ⴽⵉⴳⴰⵏ ⵏ ⵉⵡⵜⵜⴰⵙⵏ ⴰⴷ ⵜⵜⵓⵙⴽⴰⵔⵏ, ⵙⵍⴰⵡⴰⵏ ⴰⴽⴽⵯ ⵡⵉⵍⵍⵉ ⵅⴼ ⵉⵙⴳⵎⴹ ⵉⵏⴰⵡ ⴰⴳⵍⴷⴰⵏ ⵏ 30 ⵢⵓⵍⵢⵓ 2001 ⴷ ⵉⵏⴰⵡ ⴰⴳⵍⴷⴰⵏ ⵏ ⴰⵊⴷⵉⵔ ⴳ 17 ⴽⵜⵓⴱⵕ ⴳ ⵓⵙⴳⴳⵯⴰⵙ ⴰⵏⵏ ⵏⵉⵜ, ⵔⴰⴷ ⵏⵉⵏⵉ ⵎⴰⵙ ⵔⴰⴷ ⵓⵔ ⵜⵎⵓⵔⵙ ⵜⵙⵔⵜⵉⵜ ⵜⴰⵏⴰⵎⵓⵔⵜ ⵜⴰⵎⴰⵢⵏⵓⵜ ⵎⵏⵉⴷ ⵏ ⵜⵎⴰⵣⵉⵖⵜ ⴱⵍⴰ ⴰⵙⵎⵓⵔⵙ ⵏ ⵓⵙⵏⴼⴰⵔ ⴰⴷ ⴰⴷⵙⵍⴰⵏ ⴷ ⵡⴰⴷⴰⴼ ⵏⵏⵙ ⴳ ⵓⵏⵎⴰⵍⴰ ⴰⵏⵎⵍⴰⵏ ⴰⵎⵖⵔⵉⴱⵉ, ⴰⴼⴰⴷ ⴰⴷ ⴰⴽⴽⵯ ⵜⵉⵍⵉ ⴳ ⵜⵉⵏⵎⴰⵍ .
ⴰⴷⴷⴰⴷ ⵉⵀⵔⵛⵏ ⵏⵏⴰ ⵜⴷⴷⵔ ⵜⵎⴰⵣⵉⵖⵜ ⴳⵔ 2007 ⴰⵔ 2011, ⴷⴼⴼⵉⵔ ⵏ ⵓⵙⵏⵚⴱ ⵏ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵜⵎⵏⴹⴰⵡⵜ ⵜⴰⵎⵖⵔⵉⴱⵉⵜ, ⵙ ⵜⵓⵇⵇⵍⴰ ⵏ ⵉⵙⵍⴳⴰⵏⵏ ⵉⵙⵏⵎⴰⵍⴰⵢⵏ ⵙⴳ ⴷⴰⵔ ⵡⵉⵏⵏⴰ ⴷⴰⵔ ⵓⵔ ⴰⵏⵣⴳⵓⵎ ⴷ ⵜⴰⵢⵔⵉ ⵜⴰⵙⵔⵜⴰⵏⵜ ⵏ ⵓⵙⵏⵢⵓⴷⴷⵓ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵎⵇⵇⴰⵔ ⵉⵎⵓⵔⵙ ⵓⵙⵏⴼⴰⵔ ⴰⴷ ⴳ ⵓⵙⴳⴳⵯⴰⵙ ⵏ 2003 ⴰⵔ 2007 ⵍⵍⵉⵖ ⴳⵉⵙ ⵉⵎⵙⵜⴳⴳⴰⵔⵏ ⵏⵏⴰ ⴷⴰⵔ ⴰⵏⵣⴳⵓⵎ , ⴰⵢⵍⵍⵉⵖ ⵏⵏ ⵉⴹⵕ ⵓⵙⵏⴼⴰⵔ ⴰⴷ ⴳ ⵉⴼⴰⵙⵙⵏ ⵏ ⵓⵏⵣⴰⵖ ⵏ ⵓⵎⵓⵔⵙ ⵏ ⵓⵙⵏⴼⴰⵕ ⴰⴷ ⴰⵅⴰⵜⴰⵔ .
ⴷⴼⴼⵉⵔ ⵏ 18 ⵏ ⵓⵙⴳⴳⵯⴰⵙ ⵅⴼ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⵏ 2003, ⴷ ⵍⵍⵉⵖ ⵣⵣⵉⴹⵕⵏ ⴽⵉⴳⴰⵏ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵡⵡⵓⵔⵉ ⵉⴷⵓⵙⵏ ⵏⵏⴰ ⵉⵙⴽⵔ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⴽⵔⴰ ⵏ ⵉⵎⵙⵜⴳⴳⴰⵔⵏ ⴳ ⵜⵏⵖⵍⴰⴼⵜ ⵏ ⵓⵙⴳⵎⵉ ⵜⴰⵏⴰⵎⵓⵔⵜ ⵏ ⵓⵙⵙⵍⵎⴷ,ⵉⵍⵍⴰ ⵢⴰⵏ ⵓⵙⴳⵓⴷⵉ ⵉⴷⵓⵙⵏ ⴳ ⵓⵙⵡⵉⵔ ⵏ ⵓⵙⴱⵓⵖⵍⵓ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵜⵜⵓⵙⴽⴰⵔ ⵓⵙⵎⵓⵜⴳ ⵏ ⵉⵙⵍⵎⴰⴷⵏ ⵉⵡⵡⵓⵔⴰⵏⵏ ⵎⵇⵇⴰⵔ ⵍⵍⴰⵏ ⴽⵉⴳⴰⵏ ⵏ ⵉⵎⵓⴽⵔⵉⵙⵏ ⵏⵏⴰ ⴱⴷⴷⴰ ⵉⵎⵓⵏⵏ ⴷ ⵓⵙⵏⴼⴰⵕ ⴰⴷ .
ⵜⵣⵣⵔⵉ ⵜⵎⴰⵣⵉⵔⵜ ⵏⵏⵖ ⵎⴰⴷ ⵉⵜⵜⴳⴳⴰⵏ 14 ⵏ ⵓⵙⴳⴳⵯⴰⵙ ⴳ ⵓⵙⵏⴼⴰⵕ ⵏ ⵓⵙⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⵎⴰⵍⴰ ⴰⵏⵎⵍⴰⵏ ⴰⵎⵖⵔⵉⴱⵉ, ⵎⵔ ⵜⵍⵍⴰ ⵢⴰⵜ ⵜⴰⵢⵔⵉ ⵉⴷⵓⵙⵏ ⵙ ⵜⴳⴰ ⵜⵎⴰⵣⵉⵔⵜ ⵏⵏⵖ ⵢⴰⵏ ⵓⵎⴷⵢⴰ ⴰⵙⵔⵜⴰⵏ ⴳ ⵉⴳⵔ ⴰⴷ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵉⵖⵜ ⴰⴼⴰⴷ ⴰⴷ ⵙⵜⵜ ⵉⴷ ⵜⵙⵙⴼⴰⵖ ⵙⴳ ⵜⵓⵜⵍⴰⵢⵉⵏ ⵏⵏⴰ ⵉⴷⴷⴰⵏ ⴰⴷ ⵏⵖⵓⴱⵓⵏⵜ, ⵜⵉⵍⵉ ⵢⴰⵜ ⵜⵏⴼⵔⵓⵜ ⵜⴰⵙⵏⵉⵍⵙⴰⵏⵜ ⴷ ⵢⴰⵜ ⵜⵙⵜⵕⴰⵜⵉⵊⵉⵜ ⵉⴷⵓⵙⵏ ⴳ ⵉⴳⵔ ⴰⴷ .
ⵜⵍⴽⵎ ⵜⵉⵣⵉ ⴰⴷ ⵎⵎⴰⵙⵙⵏ ⵉⵎⵙⵜⴳⴳⴰⵔⵏ ⴰⴽⴽⵯ ⵏⵏⴰ ⵉⵙⵡⵡⵓⵔⵉⵏ ⴳ ⵉⴳⵔ ⴰⴷ , ⴰⴼⴰⴷ ⴰⴷ ⵉⵍⵉⵏⵜ ⵜⵣⵎⵎⴰⵔ ⵏ ⵓⵙⴱⵓⵖⵍⵓ ⵏ ⵉⴳⵔ ⴰⴷ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⴼⴰⴷ ⴰⴷ ⵢⵉⵍⵉ ⴳ ⵓⵙⵡⵉⵔ ⴰⴼⴰⴷ ⴰⴷ ⵜⵜⵔⴰⵔ ⵜⴰⵖⴹⴼⵜ ⵉ ⵜⵎⴰⵣⵉⵖⵜ ⵢⵉⵍⵉ ⵓⵣⵣⵓⴳⵣ ⴰⴷⵙⵍⴰⵏ ⵏ ⵉⵜⴳⴰⵔⵏ ⵏ ⵓⴷⵓⵙⵜⵓⵔ ⴷ ⵉⵙⵍⴳⴰⵏⵏ ⵏⵏⴰ ⵉⵣⴷⵉⵏ ⴷ ⵓⵙⵏⵚⴱ ⵏⵏⵙ .
ⵜⴰⴹⴰ ⵜⴰⵎⵖⵔⵉⴱⵉⵜ ⵉ ⵜⵎⵏⴰⴳⴰⵔⵉⵏ ⵜⵉⵏⴰⵎⵓⵔⵉⵏ
ⴰⵎⴰⵔⵉⵙ
