ⴰⵏⴰⵡⵏ ⵏ ⵓⵙⵡⵉⵏⴳⵎ ⴰⵏⴼⴳⴰⵏ

ⵢⵓⵔⴰ ⵜ: ⴱⵓⵎⵉⵚⵕ ⵄⴱⴷⵍⵡⴰⵃⴷ

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⴷ ⴰⴼⴳⴰⵏ ⴳ ⵜⵓⴳⵜⵜ ⵏ ⵜⵉⴽⴽⴰⵍ ⴷⴰ ⴰⵙ ⴷ ⵜⵜⴷⴷⵓⵏ ⵉⵜⵙⵏ ⵏ ⵉⵙⵡⵉⵏⴳⵉⵎⵏ ⴳ ⵓⵏⵍⵍⵉ ⵏⵏⵙ ⴱⵍⴰ ⴳⵉⵙⵏ ⵉⴱⴰⴹ ,ⴰⵔ ⵜⵜⵉⵍⵉⵏ ⴽⵔⴰ ⵏ ⵉⵙⵡⵉⵏⴳⵉⵎⵏ ⴰⵔ ⴰⵙ ⵏ ⵉⵜⵜⵎⵎⵔ ⵢⴰⵏ , ⵉⵍⵉⵏ ⵡⵉⵢⵢⴰⴹ ⴱⴰⵀⵔⴰ ⵅⵛⵏⵏⵉⵏ ⴰⵔ ⵜⵜⴳⴳⴰⵏ ⴱⴰⴱ ⵏⵏⵙⵏ ⴳ ⵢⴰⵏ ⵡⴰⴷⴷⴰⴷ ⵉⵔⵡⵉⵏ ⵉⴽⵜⴰⵔⵏ ⵙ ⵓⵖⵉⵍⵓⴼ , ⵎⴰⵛ ⵓⵔ ⴰⴽⴽⵯ ⵉⵖⵉ ⴰⴷ ⴷⵉⵙⵏ ⵉⴱⴹⵓ .
ⵎⵇⵇⴰⵔ ⴰⴽⴽⵯ ⵉⵙⴽⵔ ⵜⵓⴳⵜⵜ ⵏ ⵜⵉⵔⵎⵉⵜⵉⵏ ⴰⴼⴰⴷ ⴰⴷ ⴰⵙⴷ ⵙⵓⵍ ⵓⵔ ⵜⵜⴷⴷⵓⵏ ⴰⵎ ⴰⵏⴰⵡ< ⴰⵏⵏ ⵏ ⵉⵙⵡⵉⵏⴳⵉⵎⵏ ⵉⵅⵛⵏⵏ , ⵎⴰⵛⵛ ⵉⵖ ⵏⴻⵏⵏⴰ ⵙ ⵓⵎⴷⵢⴰ ⴰⴼⴳⴰⵏ ⴰⵔ ⴰⵙⴷ ⵜⵜⴷⴷⵓⵏ ⵖⴰⵙ ⴽⵔⴰ ⵏ ⵉⵙⵡⵉⵏⴳⵉⵎⵏ ⵉⵃⵍⴰⵏ ⵜⵜⵓⵜⵏⵉⵏ ⵙ ⵜⵓⵎⵔⵜ ⴱⴰⵀⵔⴰ ⵢⴰⵜⵜⵓⵢⵏ , ⵉⵙ ⵔⴰⴷ ⵉⵎⵎⵔ ⴳ ⵜⵓⴷⵔⵜ ⵏⵏⵙ ? ⵉⵙⴷ ⵓⵔ ⴰⵖ ⵙⴽⴰⵔⵏ ⵉⵙⵡⵉⵏⴳⵉⵎⵏ ⴰⵏⵏ ⵅⵛⵏⵏⵉⵏ ⵢⴰⵜ ⵜⵓⵎⵔⵜ ⵉⵏⵜⵍⵏ ⵉ ⵉⵎⴰⵏ ⵏ ⵓⴼⴳⴰⵏ ? .
ⵍⵍⴰⵏ ⵜⵓⴳⵜⵜ ⵏ ⵉⴷ ⴱⴰⴱ ⵏ ⵓⵙⵡⵉⵏⴳⵎ ⴰⴼⵍⵙⴰⴼ ⴳ ⵓⵎⴰⴹⴰⵍ ⵏⵖⴷ ⴳ ⵓⵎⵣⵔⵓⵢ ⵏ ⵓⵙⵡⵉⵏⴳⵎ ⴰⵎⴰⵜⵜⴰⵢ ⵎⵎⴰⵖⵏ ⴱⴰⵀⵔⴰ ⴰⴼⴰⴷ ⴰⴷ ⵙⴳⵓⵍⵓⵏ ⵢⴰⵜ ⵜⵙⵡⵉⵏⴳⵎⵜ ⴳ ⵉⴳⵔ ⴰⴷ , ⵎⴰⵙⴷ ⴰⴱⴽⴽⵉⴷ ⴷ ⵓⵜⵔⵙ ⴷⴰⵔⵙ ⵢⴰⵏ ⵡⴰⵎⵓⵔ ⵏⵏⴰ ⵉⵙⴽⴰⵔ ⵉ ⵜⵓⵎⵔⵜ ⵏ ⵓⴼⴳⴰⵏ ⵏⵖⴷ ⵉ ⵓⵙⵡⵉⵏⴳⵎ ⵏⵏⵙ ⵙ ⵓⵎⴰⵜⴰ , ⵙ ⵎⴰⵏⵉⴽ ?
ⵎⴽ ⵍⵍⵉⵙ ⵏⴻⵏⵏⴰ ⴳ ⵜⵉⵣⵡⵉⵔⵉ ⵎⴰⵙⴷ ⴰⵙⵡⵉⵏⴳⵎ ⵏⵖⴷ ⴰⴽⴽⵯ ⵉⵖ ⵏⴻⵏⵏⴰ ⵜⵉⵡⵡⵓⵔⴳⴰ ⵏⵏⴰ ⵉⵃⵍⴰⵏ ⵉ ⵡⴰⴹⵓ ⵏⵏⵙⵏⵜ ⵓⵔⴰⵖ ⵜⵜⴰⵡⵙ ⴳ ⵜⵓⵎⵔⵜ ⵏ ⵉⵎⴰⵏ , ⵔⴰⴷ ⴷⵉⵖ ⵏⵉⵏⵉ ⵎⴰⵙⴷ ⵉⵙⵡⵉⵏⴳⵉⵎⵏ ⵏⵏⴰ ⵉⴳⴰⵏ ⴰⵟⵟⴰⵏ ⴷ ⵎⴰⴷⵏⵉⵎⴰⵏ ⴰⵔ ⵜⵜⴰⵡⵙⵏ ⴰⵡⴷ ⵏⵜⵜⵏⵉ ⴳ ⵜⵓⵎⵔⵜⵔ ⴷ ⵓⵏⵍⵍⵉ ⵏ ⴱⴰⴱ ⵏⵏⵙⵏ .
ⵔⴰⴷ ⵏⵖⴰⵍ ⵎⴰⵙⴷ ⵢⴰⵏ ⵓⴼⴳⴰⵏ ⴰⵔ ⵉⵙⵡⵉⵏⴳⵉⵎ ⵖⴰⵙ ⴳ ⵜⵖⴰⵡⵙⵉⵡⵉⵏ ⵉⵃⵍⴰⵏ , ⵓⵔⴰⵖ ⴰⴽⴽⵯ ⵉⵜⵜⴽⴽⴰ ⵓⵖⵉⵍⵓⴼ ⵎⵏⵉⴷ ⵏ ⵓⵙⵡⵉⵏⴳⵎ ⵏⵏⵙ , ⵉⵙ ⵔⴰⴷ ⵉⵎⵎⵔ ⵙ ⵎⴽ ⴰⵏⵏ ?
ⵍⵍⴰⵏ ⵉⵜⵙⵏ ⵏ ⵉⴷⴱⴰⴱ ⵏ ⵓⵙⵡⵉⵏⴳⵎ ⴰⵎⴰⵜⵜⴰⵢ ⴰⴼⵍⵙⴰⴼⴰⵏ ⵏⵏⴰ ⵉⵙⴳⵔⵉⵡⵉⵄⵍⵏ ⴰⵙⵡⵉⵔ ⵏ ⵓⵙⵡⵉⵏⴳⵎ ⵏ ⵓⴼⴳⴰⵏ ,ⴰⵔ ⵜⵜⵉⵏⵉⵏ ⵎⴰⵙⴷ ⴳ ⵓⵙⵡⵉⵏⴳⵎ ⴳ ⵜⵖⴰⵡⵙⵉⵡⵉⵏ ⵏⵏⴰ ⴳ ⵉⴳⴳⵓⵜ ⵓⵖⵉⵍⵓⴼ ⴰⵔ ⴳⵉⵙⵏ ⵉⵜⵜⵉⵍⵉ ⵢⴰⵏ ⵡⴰⵏⴰⵡ ⵏ ⵜⵓⵎⵔⵜ ⴱⴰⵀⵔⴰ ⵢⴰⵜⵜⵓⵢⵏ ⵏⵏⴰ ⵔⴰⴷ ⵓⵔ ⵢⵉⵍⵉ ⴳ ⵓⵙⵡⵉⵏⴳⵎ ⴳ ⵜⵖⴰⵡⵙⵉⵡⵉⵏ ⵏⵖⴷ ⴳ ⵉⵙⵏⵜⴰⵍ ⴳ ⵜⴳⴳⵓⵜ ⵜⵓⵎⵔⵜ ⴷ ⵜⴰⴷⴼⵉ ⵜⴰⵏⵉⵎⴰⵏⵜ .
ⴰⵏⵓⵃⵢⵓ ⵏⵏⴰ ⵉⵍⵍⴰⵏ ⴳⵔ ⵙⵉⵏ ⵉⵙⵏⵜⴰⵍ ⴰⴷ – ⵜⵓⵎⵔⵜ / ⴰⵟⵟⴰⵏ – ⵉⴳⴰⵜ ⵎⴰⵙⴷ ⴽⵓ ⵢⴰⵏ ⴷⴰⵔⵙ ⴰⵎⵓⵔ ⵏⵏⴰ ⵙⴰⵔ ⵉⵜⵜⴰⵡⵙ ⴳ ⵓⵙⴱⵓⵖⵍⵓ ⵏ ⵓⵏⵍⵍⵉ ⵏ ⴱⴰⴱ ⵏⵏⵙ , ⵉⵖ ⴰⴽⴽⵯ ⵎⵓⵏⵏ ⵙ ⵙⵉⵏ ⴳ ⵢⴰⵏ ⵓⴼⴳⴰⵏ ⴰⵔ ⴱⴰⵀⵔⴰ ⵉⵜⵜⴰⵜⵜⵓⵢ ⵓⵙⵡⵉⵔ ⵏ ⵓⵙⵡⵉⵏⴳⵎ ⵏⵏⵙ , ⵉⵖ ⵜⵏ ⵉⵙⵎⵓⵏ ⵙ ⵙⵉⵏ ⴰⵔ ⴷⴰⵔⵙ ⵉⵜⵜⴳⵔⵉⵡⵉⵍ ⵓⵙⵡⵉⵏⴳⵎ ⵏⵏⵙ, ⵙ ⵎⴽ ⴰⵏⵏ ⴰⵔ ⵉⵙⵙⵏⴼⴰⵍ ⵜⵓⵎⵍⵉⵢⵉⵄⵏ ⴳⵔ ⵜⵉⴷ ⴳ ⵜⵍⵍⴰ ⵜⴰⴹⴼⵉ ⴷ ⵜⵉⵏⵏⴰ ⴳ ⵉⵍⵍⴰ ⵡⴰⵟⵟⴰⵏ ⵉⵙⵎⵎⵔⴽⵙ ⴳⵔⴰⵜⵙⵏⵜ ,ⴰⴼⴰⴷ ⴰⴷ ⵉⵙⴽⵓ ⴰⵙⵡⵉⵏⴳⵎ ⵏⵏⵙ ⴰⵏⵉⵎⴰⵏ ⵙ ⵢⴰⵜ ⵜⵎⴰⵎⴽⵜ ⴳ ⵉⵍⵍⴰ ⵓⵎⵎⵔⴽⵙ ⵉⵣⵉⵍⵏ .
ⵎⴰⵏⵉⴽ ⴰⵙ ⵏⵣⴹⴰⵕ ⴰⴷ ⵏⵙⴷⴷⵔⴼⵉ ⴰⵏⵍⵍⵉ ⵏⵏⵖ ⵙ ⵓⵙⵡⵉⵏⴳⵎ ⵉⵎⵎⵔⴽⵙⵏ ⴳⵔ ⴰⵟⵟⴰⵏ ⴷ ⵜⵓⵎⵔⵜ ?
ⴰⵙⵇⵇⵙⵉ ⴰⴷ ⵔⴰⴷ ⴰⵖ ⵉⵕⵥⵎ ⴰⵏⵍⵍⵉ ⵏⵏⵖ ⴰⴼⴰⴷ ⴰⴷ ,ⴰⵛⴽⵓ ⴰⵔ ⵏⵍⴽⴽⵎ ⵜⵉⴷⵜ ⵉⵖ ⵏⵙⵙⴷⵔⴰ ⵉⵙⵡⵉⵏⴳⵉⵎⵏ ⵏⵏⵖ ⵏⵙⴰⵜⵜⵓⵢ ⵜⴰⵏⵏⴰⵢⵜ ⵏⵏⵖ ⵙ ⵜⵓⴳⵜⵜ ⵏ ⵜⵓⵎⴰⵏⵉⵏ ⵏⵏⴰ ⴰⵖ ⵉⵙⵙⵓⵜⵍⵏ .

anawn n uswingm anfgan

yura t : Boumisser Abdelouahed

ur gis turda mas d afgan g tugtt n tikkal da as d ttddun itsn n iswingimn g unlli nns bla gisn ibaḍ ,ar ttilin kra n iswingimn ar as n ittmmr yan , ilin wiyyaḍ bahra xcnnin ar ttggan bab nnsn g yan waddad irwin iktarn s uɣiluf , mac ur akkʷ iɣi ad disn ibḍu .
mqqar akkʷ iskr tugtt n tirmitin afad ad asd sul ur ttddun am anaw< ann n iswingimn ixcnn , macc iɣ nenna s umdya afgan ar asd ttddun ɣas kra n iswingimn iḥlan ttutnin s tumrt bahra yattuyn , is rad immr g tudrt nns ? isd ur aɣ skarn iswingimn ann xcnnin yat tumrt intln i iman n ufgan ? .
llan tugtt n id bab n uswingm aflsaf g umaḍal nɣd g umzruy n uswingm amattay mmaɣn bahra afad ad sgulun yat tswingmt g igr ad , masd abkkid d utrs dars yan wamur nna iskar i tumrt n ufgan nɣd i uswingm nns s umata , s manik ?
mk llis nenna g tizwiri masd aswingm nɣd akkʷ iɣ nenna tiwwurga nna iḥlan i waḍu nnsnt uraɣ ttaws g tumrt n iman , rad diɣ nini masd iswingimn nna igan aṭṭan d madniman ar ttawsn awd nttni g tumrtr d unlli n bab nnsn .
rad nɣal masd yan ufgan ar iswingim ɣas g tɣawsiwin iḥlan , uraɣ akkʷ ittkka uɣiluf mnid n uswingm nns , is rad immr s mk ann ?
llan itsn n idbab n uswingm amattay aflsafan nna isgriwiɛln aswir n uswingm n ufgan ,ar ttinin masd g uswingm g tɣawsiwin nna g iggut uɣiluf ar gisn ittili yan wanaw n tumrt bahra yattuyn nna rad ur yili g uswingm g tɣawsiwin nɣd g isntal g tggut tumrt d tadfi tanimant .
anuḥyu nna illan gr sin isntal ad – tumrt / aṭṭan – igat masd ku yan dars amur nna sar ittaws g usbuɣlu n unlli n bab nns , iɣ akkʷ munn s sin g yan ufgan ar bahra ittattuy uswir n uswingm nns , iɣ tn ismun s sin ar dars ittgriwil uswingm nns, s mk ann ar issnfal tumliyiɛn gr tid g tlla taḍfi d tinna g illa waṭṭan ismmrks gratsnt ,afad ad isku aswingm nns animan s yat tmamkt g illa ummrks iziln .
manik as nzḍaṛ ad nsddrfi anlli nnɣ s uswingm immrksn gr aṭṭan d tumrt ?
asqqsi ad rad aɣ iṛẓm anlli nnɣ afad ad ,acku ar nlkkm tidt iɣ nssdra iswingimn nnɣ nsattuy tannayt nnɣ s tugtt n tumanin nna aɣ issutln .