جريدة العالم الأمازيغي صوت الإنسان الحر
ⴷ ⵜⴰⵏⵉⵜⴰ ⴷ ⵜⴰⵏⴼⵓⵙⵜ ⵉⵏⵓ ⵉ ⵎⴰⵔⵔⴰ ⵡⵏⵏⵉ ⵉⵔⵣⵣⵓⵏ ⴰⴷ ⵉⵙⵙⵏ ⵎⴰⵎⵎⴽ ⴱⴱⵓⵀⵍⵢⵖ.
ⵣⴳ ⵡⴰⵟⵟⴰⵚ ⵣⴳⴳⵯⴰⵎⵉ ⵣⴼⴰⴷ ⵎⴰ ⴰⴷ ⵍⵓⵍⵏ ⵡⴰⵟⵟⴰⵚ ⵏ ⵉⴽⵓⵛⵏ ⴽⴽⵔⵖ ⴷ ⵣⴳ ⵉⵊⵊ ⵏ ⵢⵉⴹⵚ ⵢⵓⵍⵍⵖ ⵓⴼⵉⵖ ⵎⴰⵔⵔⴰ ⵉⵃⵢⵢⴰⵙⵏ ⵉⵏⵓ ⵜⵜⵡⴰⴽⵔⵏ – ⵙⴰ ⵏ ⵉⵃⵢⵢⴰⵙⵏ ⵉ ⴰⵔⵎⵖ ⵙ ⵓⴼⵓⵙ ⵉⵏⵓ ⵜⵓⵖⴰ ⵜⴱⴷⴷⴰⵍⵖ ⵣⵣⴰⵢⵙⵏ ⵓⴷⵎⴰⵡⵏ ⴷⵉ ⵜⵓⴷⵔⵜ ⵉⵏⵓ ⵉ ⴷⴷⴰⵔⵖ ⵙⴰ ⵏ ⵜⵡⴰⵍⴰⵜⵉⵏ ⴷⵉ ⵜⵎⵓⵔⵜ ⵓⵛⴰ ⴽⵙⵉⵖ ⴷⴳ ⵉⴹⴰⵕⵏ ⵉⵏⵓ ⵓⵣⵣⵍⵖ ⵙ ⵡⵓⴷⵎ ⵉⵏⵓ ⴷ ⴰⵃⵔⴷⵓⵙ ⴷⴳ ⵉⵣⵓⵔⴰⵢ ⵉⵛⵛⵓⵔⵏ ⵙ ⵉⵡⴷⴰⵏ ⵇⵇⴰⵔⵖ ⵙ ⵎⵉⵏ ⵖⴰⵔⵉ ⴷⵉ ⵜⵎⵉⵊⵊⴰ: ⵉⵛⴼⴼⴰⵔⵏ, ⵉⵛⴼⴼⴰⵔⵏ! ⵉⵛⴼⴼⴰⵔⵏ ⵉ ⵖⴰⵔ ⵉⵏⵏⵓⵔⵢⵏ! ⵎⴰⵔⵔⴰ ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ ⵉ ⵜⵓⵖⴰ ⴷⴰⵢⵉ ⴷ ⵉⵖⵣⵣⴰⵔⵏ ⵛⴰ ⵉⴽⵙⵉ ⵉⴷⴷⵓⵇⵇⵓⵥ ⵅⴰⴼⵉ ⵙ ⴷⴷⵃⴰⴽⵜ ⵛⴰ ⵉⴽⵙⵉ ⴷⴳ ⵉⴹⴰⵕⵏ ⵏⵏⵙ ⵉⵔⵡⵍ ⵣⵣⴰⵢⵉ ⵖⴰⵔ ⵜⴰⴷⴷⴰⵔⵜ ⵏⵏⵙ ⵜⵟⵟⴼ ⵉⵜ ⵜⵉⴳⴳⵯⴷⵉ.
ⵓⵎⵉ ⵡⵡⴹⵖ ⵖⴰⵔ ⵓⵙⴰⵔⴰⴳ ⵏ ⵜⵉⵖⵔⵎⵜ ⵉⵊⵊ ⵏ ⵓⵃⵏⵊⵉⵔ ⵉⴱⴷⴷ ⵅⴼ ⵜⵥⵇⵇⴰ ⵉⵙⵖⵓⵢⵢⵓ ⴷ ⵉⵏⵏⴰ: ⴰ ⵉⵡⴷⴰⵏ ⴰⵜⵔⵔⴰⵙ ⴰ ⴷ ⴰⴱⵓⵀⴰⵍⵉ! ⵣⵉ ⵙⵙⴰ ⵡⴰⵔ ⴽⵙⵉⵖ ⴷⵉ ⵜⵉⵟⵟⴰⵡⵉⵏ ⵉⵏⵓ ⴰ ⴷⴰⵢⵙ ⵖⵣⴰⵔⵖ ⵟⵟⵢⴰ ⵏ ⵜⴰⴼⵓⴽⵜ ⵉⴷⵔⵔⵄ ⵓⴷⵎ ⵉⵏⵓ ⴰⵃⵔⴷⵓⵙ ⵉ ⵜⵡⴰⵍⴰⵜ ⵜⴰⵎⵣⵡⴰⵔⵓⵜ ⴷⵉ ⵜⵓⴷⵔⵜ ⵉⵏⵓ.
ⵜⵡⴰⵍⴰⵜ ⵜⴰⵎⵣⵡⴰⵔⵓⵜ ⵏⵟⵟⵃⵖ ⴷⵉ ⵜⴰⴼⵓⴽⵜ, ⵜⵢⵢⴰ ⴷ ⵜⵎⵅⵙⴰ ⵉⵏⵓ ⵉ ⵡⴰⵥⵥⵕⵉ ⵏⵏⵙ, ⵉⵊⵊ ⴰⵢⵉ ⵡⴰⵔ ⵇⵇⵉⵎⵖ ⵔⵣⵣⵓⵖ ⵉⵃⵢⵢⴰⵙⵏ ⵉⵏⵓ ⴰⵅⵎⵉⵏⵏⵉ ⵖⴰⵛⵉⵖ, ⵅⴰⴼⵙ ⵙⵖⵓⵢⵢⵖ ⵏⵏⵉⵖ: ⵉⵛⴼⴼⴰⵔⵏ ⵏ ⵉⵃⵢⵢⴰⵙⵏ ⵉⵏⵓ ⴷ ⵉⵎⵉⵎⴰⵏ!
ⴰⵎⵢⴰ ⵉ ⴷⵡⵍⵖ ⴷ ⴰⴱⵓⵀⴰⵍⵉ, ⵎⴰⵛⴰ ⵓⴼⵉⵖ ⴷⵉ ⵜⵉⴱⴱⵓⵀⵍⵢⴰ ⴰ ⵜⵉⵍⴻⵍⵍⵉ ⴷ ⵓⵏⵊⴰ, ⵜⵉⵍⴻⵍⵍⵉ ⵏ ⵓⵖⵉⵎⵉ ⴰⴽⴷ ⵉⵅⴼ ⵉⵏⵓ ⴷ ⵓⵏⵊⴰⵎ ⵣⵉ ⵜⵓⵙⵙⵏⴰ ⵏ ⵉⵡⴷⴰⵏ ⵉ ⵜⵓⴷⵔⵜ ⵉⵏⵓ, ⵃⵉⵜ ⵢⵏⵏⵉ ⵉⵙⵙⵏⴻⵏ ⵜⵓⴷⵔⵜ ⵏ ⵛⴰ ⵏ ⵉⵊⵊ ⵎⵖⴰⵔ ⵏⵜⵉⵍⵉ ⴷ ⵉⵙⵎⵖⴰⵏ ⵏⵏⵙⵏ ⴷⴳ ⵉⵊⵊ ⵏ ⵓⵖⵣⴷⵉⵙ.
ⵎⴰⵛⴰ ⴷⴳ ⵉⵛⵜ ⵏ ⵜⵉⴷⵜ ⵡⴰⵔ ⵙⵙⵎⵖⴰⵔⵉⵖ ⵛⴰ ⵙ ⵓⵏⵊⴰⵎ ⵉⵏⵓ ⴰⵟⵟⴰⵚ, ⵃⵉⵜ ⵡⴰⵅⵅⴰ ⴰⵛⴼⴼⴰⵔ ⴰⵇⴰⵜ ⴷⴳ ⵓⴱⵏⵉⵇ ⵏⵜⵜⴰ ⵉⴳⴳⵯⵊ ⵅⴼ ⵉⵛⴼⴼⴰⵔⵏ ⵏⵏⵖⵏⵉ ⵡⴰⵔ ⴷ ⴰⵙ ⵉⵜⵎⵙⴰⵔ ⵛⴰ ⴷ ⴰⵄⴼⴼⴰⵏ.
ⵎⵓⵃⴰⵎⵎⴷ ⴼⴰⵔⵉⵙⵉ
Jabran xalil jabran azwel 1
Mammek dewleɣ d abuhali?
d tanita d tanfust inu i marra wenni irezzun ad issen mammek bbuhelyeɣ.
zeg waṭṭaṣ zeggʷami zfad ma ad lulen waṭṭaṣ n ikucen kkreɣ d zeg ijj n yiḍeṣ yulleɣ ufiɣ marra iḥeyyasen inu ttwakren – sa n iḥeyyasen i armeɣ s ufus inu tuɣa tbeddaleɣ zzaysen udmawen di tudert inu i ddareɣ sa n twalatin di tmurt uca ksiɣ deg iḍaṛen inu uzzleɣ s wudem inu d aḥerdus deg izuray iccuren s iwdan qqareɣ s min ɣari di tmijja: iceffaren, iceffaren! iceffaren i ɣar innuryen! marra timɣarin d irgazen i tuɣa dayi d iɣezzaren ca iksi idduqquẓ xafi s ddeḥakt ca iksi deg iḍaṛen nnes irwel zzayi ɣar taddart nnes teṭṭf it tiggʷdi.
umi wwḍeɣ ɣar usarag n tiɣremt ijj n uḥenjir ibedd xef tẓeqqa isɣuyyu d inna: a iwdan aterras a d abuhali! zi ssa war ksiɣ di tiṭṭawin inu a dayes ɣzareɣ ṭṭya n tafukt iderreԑ udem inu aḥerdus i twalat tamezwarut di tudert inu.
twalat tamezwarut neṭṭḥeɣ di tfukt, teyya d tmexsa inu i waẓẓṛi nnes, ijj ayi war qqimeɣ rezzuɣ iḥeyyasen inu axminni ɣaciɣ, xafes sɣuyyeɣ nniɣ: iceffaren n iḥeyyasen inu d imiman!
amya i dewleɣ d abuhali, maca ufiɣ di tibbuhelya a tilelli d unjam, tilelli n uɣimi aked ixef inu d unjam zi tussna n iwdan i tudert inu, ḥit yenni issnen tudert n ca n ijj mɣar ntili d isemɣan nnsen deg ijj n uɣezdis.
maca war ssemɣariɣ ca s unjam inu aṭṭaṣ, ḥit waxxa aceffar aqat deg ubniq netta iggʷej xef iceffaren nneɣni war d as itemsar ca d aԑeffan.
Muḥammed FARISI
