ⵜⴰⴼⵙⵓⵜ ⵏ ⵡⵓⵕⵖ

ⵣⵉ ⵜⵏⴻⴼⵔⴰ ⵏ ⵜⴻⴳⵔⵙⵜ ⵜⵍⵓⵍⴰ ⵜⴻⴼⵙⵓⵜ. ⵉⵙⵙⴰ ⵡⴰⵛⴰⵍ ⵙ ⵜⵛⴻⴹⴼⵉⵏ ⵜⵉⴼⴻⵔⵇⴰⵇⵇⴰⵛⵉⵏ. ⵉⵍⵓⵍⵍⴽ ⵉⵍⵍⵉⴼ (ⴰⴹⵓ ⵉⵊⵊⴰⵏ) ⵏ ⵉⵎⵖⴰⵏ ⴷ ⵉⵍⴻⴷⵊⵓⵢⵏ.

ⴰⵔ ⵉⵙⵙⴻⴼⵍⵉⵍⵍⵉⵢ ⵓⵣⵓⵔ ⵙ ⵎⴻⵏⵏⴰⵡ ⵏ ⵉⵏⵉⵍⵏ ⵀⴰ ⴰⵣⴳⴳⵯⴰⵖ, ⵀⴰ ⴰⴼⴻⵔⵣⴳⴳⵯⴰⵖ (ⴰⵢ-ⵏⵏⴰ ⵉⵜⵜⴰⵡⵉⵢⵏ ⵙ ⵓⵣⴳⴳⵯⴰⵖ), ⵀⴰ ⴰⴽⴻⵔⵣⴳⴳⵯⴰⵖ ⵏⴻⵖ ⴰⵛⴻⵔⵣⴳⴳⵯⴰⵖ, ⵀⴰ ⴰⵡⵕⴰⵖ, ⵀⴰ ⴰⴼⴻⵔⵔⵡⵕⴰⵖ (ⴰⵢ-ⵏⵏⴰ ⵉⵜⵜⴰⵡⵉⵢⵏ ⵙ ⵜⵉⵡⴻⵕⵖⵉ), ⵀⴰ ⴰⵎⵍⵍⴰⵍ ⵀⴰ ⴰⵃⴻⵔⵎⵍⵍⴰⵍ (ⴰⵢ-ⵏⵏⴰ ⵉⵜⵜⴰⵡⵉⵢⵏ ⵖⴻⵕ ⵜⴰⵎⵍⵍⵉ), ⵀⴰ ⴰⵛⴻⵔⵎⵍⵍⴰⵍ (ⴰⵎⵍⵍⴰⵍ ⵉⵎⵎⴻⵔⴽⵙⵏ ⴷ ⵜⴱⴻⵅⵏⵉ), ⵀⴰ ⴰⵣⴻⴳⵣⴰⵡ, ⵀⴰ ⴰⴼⴻⵔⵣⴻⴳⵣⴰⵡ ⵏⴻⵖ ⴰⴼⴻⵔⴷⴰⴷⴰⵍ ⵏⴻⵖ ⴰⴼⴻⵔⵣⵉⵣⴰⵡ (ⴰⵢ-ⵏⵏⴰ ⵉⵜⵜⴰⵡⵉⵢⵏ ⵙ ⵓⵣⴻⴳⵣⴰⵡ), ⵀⴰ ⴰⵎⴰⴽⵡⴰⵍ (ⴰⵢ-ⵏⵏⴰ ⵉⵣⴻⴳⵣⴰⵡⵏ ⴱⴻⵣⵣⴰⴼ), ⵀⴰ ⴰⵣⴻⵔⴳⴻⵎⵎⵓ (ⴰⵢ-ⵏⵏⴰ ⵎⵉ ⵜⴻⴷⵔⵓⵙ ⵜⵉⵣⵣⴻⴳⵣⵡⵜ) ⵀⴰ ⴰⴱⴻⵍⴱⴰⵙ ⵏⴻⵖ ⴰⵎⴻⵏⴳⴰⵍ ⵏⴻⵖ ⴰⵎⵖⴷⴻⴷⴷⵉ (ⴰⵢ-ⵏⵏⴰ ⵉⵍⴰⵏ ⵉⵏⵉⵍ ⵏ ⵉⵖⴷ), ⵀⴰ ⴰⵃⴷⴰⴷⵉⵢ (ⴰⵢ-ⵏⵏⴰ ⵉⵜⵜⴰⵡⵉⵢⵏ ⵙ ⵓⴱⴻⵍⴱⴰⵙ), ⵀⴰ ⵓⴽⵥⵉⵢ ⵏⴻⵖ ⴰⵊⴻⵏⵊⴰⵕⵉⵢ ⵏⴻⵖ ⴰⵡⵔⴰⵙ ⵏⴻⵖ ⴰⴱⵉⴷⴰⵙ (ⴰⵢ-ⵏⵏⴰ ⵏ ⵓⴽⵍⵓ ⵉⵍⵍⴰⵏ ⴳⴻⵔ ⵓⵣⴻⴳⵣⴰⵡ ⴷ ⵓⵣⴳⴳⵯⴰⵖ), ⵀⴰ ⴰⵣⵡⴰⵡⴰⵖ, ⵀⴰ ⴰⵣⵓⴱⴰⵖ ⵏⴻⵖ ⴰⵜⴽⵓ ⵏⴻⵖ ⴰⵍⴻⵎⵍⴰⵖ (ⴳⴻⵔ ⵜⵡⴻⵕⵖⵉ ⴷ ⵜⵣⵓⵖⵉ), ⵀⴰ ⴰⴷⵎⵎⴰⵏ ⴰⵎⵎ ⵉⵙ ⵉⵇⵇⴻⵎ ⵙ ⵜⵎⵓⵣⵓⵏⵉⵏ ⴷ ⵜⴰⵇⵇⴰⵢⵉⵏ ⴷ ⵜⵎⴻⵖⵡⴰⵏⵉⵏ.

ⵉⵍⵙⴰ ⵓⴳⴰⵎⴰ ⵜⵉⵎⴻⵍⵙⵉⵜ ⵏⵏⴻⵙ ⵉⵙⵎⴻⵕⵖⴰⵏ ⴷⴷⴰⵡ ⵉⵣⴻⵏⵥⴰⵕⵏ ⵏ ⵜⴰⴼⵓⵢⵜ. ⵉⵢⵔⴷ (ⵉⵍⵙⴰ) ⵉⵍⵓⵎⴰⵖ (ⵜⵉⵎⴻⵍⵙⴰ ⵉⵜⵜⴻⵍⴷⴰⵢⵏ ⵉⵥⵕⵉ).

ⴳⴰⵏ ⵉⵊⴷⴷⵉⴳⵏ ⵉⵛⵔⵓⵔⵏ (ⴰⵢ-ⵏⵏⴰ ⵉⵜⵜⴻⵢⴰⴳⴰⵍⵏ ⴳ ⵓⴷⵎⵔ ⵏ ⵛⴰ ⵎⴰⵔ ⴰⴷ ⵉⴷⵍⵖ) ⵏ ⵉⴽⴻⵜⵍⴰⵏ (ⵜⵉⵎⴻⵍⵙⴰ) ⵏⵏⴻⵙ.

ⵀⴰ ⴰⴽⴻⵔⴽⴰⵣ (ⴰⵍⴻⴷⵊⵓⵢ ⵎⵉ ⵡⵕⴰⵖⵏ ⵉⵍⴰⵙⵉⵜⵏ ⵏⵏⴻⵙ ⴰⵎⵎ ⵜⵉⵡⴻⵕⵖⵉ ⵏ ⵓⴱⴰⵡⵊ (ⴰⵡⵕⴰⵖ ⵏ ⵜⴻⴳⵍⴰⵢⵜ), ⵀⴰ ⵜⴰⵍⵓⴹⴹⴰⵜ ⵏⴻⵖ ⵜⴰⵡⵙⵉⵙⵏⵜ (ⴰⵊⴷⴷⵉⴳ ⵎⵉ ⵣⴻⴳⴳⵯⴰⵖⵏ ⵉⵍⵙⵉⵜⵏ ⵏⵏⴻⵙ) ⵀⴰ ⵉⵎⵙ (ⴰⵢ-ⵏⵏⴰ ⵎⵉ ⴷⴰ ⵇⵇⴰⵕⵏ ⵉⵄⵕⴰⴱⵏ «ⴰⵢⴰⵙⵎⵉⵏ» ⴷ ⵓⵣⴰⵏⵣⵓ ⵏⴻⵖ ⴰⵣⴻⵏⵥⵓ ⵏⴻⵖ ⵜⵓⵥⵉⵎⵜ («ⴰⵢⴰⵙⵎⵉⵏ» ⵏ ⵉⴼⵏⵉ) ⵀⴰ ⵜⴰⵢⵙⴰ (ⴰⵢ-ⵏⵏⴰ ⵎⵉ ⴷⴰ ⵇⵇⴰⵕⵏ ⵉⵄⵕⴰⴱ «ⵓⵇⵃⵓⵡⴰⵏ»ⵀⴰ ⵉⵊⵊⵉⴽⵏ (ⴰⵢ-ⵏⵏⴰ ⵎⵉ ⴷⴰ ⵜⵜⵉⵏⵉⵏ «ⵔⴰⵢⵃⴰⵏ»).

ⵙⴽⵓⴽⴽⴻⵔⵏ (ⵙⵙⵓⴼⵖⵏ ⴰⴼⵔⵉⵡⵏ) ⵉⵙⴻⴽⵯⵍⴰ ⴷ ⵡⴰⴷⴷⴰⴳⵏ ⴷ ⵉⵅⵍⵉⴷⵊⵏ (ⴰⴷⴷⴰⴳⵏ ⵏ ⵜⴰⴳⴰⵏⵜ).

ⴰⵍⴰⵜⵏ (ⴰⴼⵔⵉⵡⵏ) ⵏⵙⴻⵏ ⵔⵣⵓⵣⵣⴻⵖⵏ.

ⴰⴳⵍⴰⵙ (ⵉⵎⴻⵏⴷⵉ ⵓⵔ ⵜⴰ ⵉⵍⵉⵏ ⵜⴰⵢⴷⵔⵜ) ⴰⵔ ⵉⵜⵜⴻⵏⵡⵉⵡⵉⵍ (ⴰⵔⵜ ⵜⵜⴰⵡⵉⵢⵏ ⵉⵏⵉⵡⵏ ⴳ ⵜⵡⴰⴷⴰ) ⴰⵎⵎ ⵉⵙ ⴰⵔ ⵉⵜⵜⴻⵙⴻⵔⴽⴰⴷ  ⴼ ⵓⵥⴰⵡⴰⵏ ⴷ ⵓⵏⵯⵢⴰ ⵏ ⵡⴰⵢⵍⴰⵍⵏ ⵏⴻⵖ ⵉⴷⴷ ⵉⵙ ⵉⵚⴹⵍ ⵙ ⵓⵙⴰⴹⵔⵏ ⵉⴽⴽⴰⵏ ⵉⴳⵏⵏⴰ.

ⴰⵔ ⵜⵜⴻⵏⴷⵓⴷⴷⵓⵢⵏ ⵡⴰⵎⴰⵏ ⴳ ⵜⵔⴳⴳⵯⵉⵡ, ⵙ ⵓⵊⵉⵅⵅⵉⵢ ⵏⵏⴻⵙⵏ ⴰⵔ ⵜⵜⴻⴷⵔⵓⵏ ⴳ ⵓⵥⴰⵡⴰⵏ.

ⵉⵎⵎⴻⵏⵣⴻⵣ ⴷ ⵓⵙⴳⵉⵊⵊⵉⵢ ⵏ ⵉⴳⴹⴰⴹ ⴷ ⵎⴰⵢ ⴷ ⵉⴳⴰⵏ ⴰⵙⴽⴰⵍⵍⴰⵄ (ⴰⵢⵍⴰⵍ).

ⵙ ⵓⴷⵓⵛ ⴰⴷ ⵉⵙⴰⵍⵍⴰⵎ ⵛⵔⴰ ⵉⴳⵔⴰⵏ .

ⵙ ⵉⵊⵊ ⵏ ⵉⵎⵖⴰⵏ ⴰⴷ ⵉⵚⴹⵍ ⵣⵓⵏⴷ ⵉⵙ ⵉⵙⵡⴰ ⴰⵔⵔⵓⴱ (ⴰⵙⴰⴹⵔⵏ ⵉⵜⵜⵓⵙⴽⴰⵔⵏ ⵣⴻⴳ ⵓⵥⵎ ⵏ ⵡⴰⴹⵉⵍ) ⵏⴻⵖ ⵉⵇⵉⵛⵎ (ⴰⵙⴰⴹⵔⵏ ⵉⵜⵜⵓⵙⴽⴰⵔⵏ ⵣⴻⴳ ⵓⵥⵎ ⵏ ⵜⵉⵢⵏⵉ ⵏⴻⵖ ⵛⴰ ⵏ ⵓⴳⵓⵎⵎⵓ ⵢⴰⴹⵏ).

ⵉⵍⵍⵓⴹⵍⴹ ⵓⴳⴰⵎⴰ (ⵉⵖⵎⴰ ⵏⴻⵖ ⵉⵍⵥⴰ ⵛⵉⴳⴰⵏ ⵙ ⵜⵉⵣⵣⴻⴳⵣⵡⵜ), ⴰⵔ ⵉⵙⴳⵓⵎⵓⵙ ⵜⴰⵡⴻⵏⴳⵉⵎⵜ, ⴰⵔ ⵉⵙⵙⴻⴼⵔⵉⵔⵉⵙ ⵓⴷⵎ, ⴰⵔ ⵉⵙⵏⵏⵉⵔⵙ ⴰⴽⴰⵔⵉⵎ, ⴰⵔ ⵉⵙⵙⴻⴷⴼⵓ ⴰⵏⴼⴼⵓ, ⴰⵔ ⵉⵙⵙⴻⴷⴽⴰⵜ, ⴰⵔ ⵉⵙⴼⴼⵓⵇⵙ.

ⵉⴳⴰ ⴰⵙⵍⵍⵓⵎ (ⵜⵉⴼⵍⵓⵢⵜ ⵉⵖⵎⴰⵏ) ⵏⵏⴰ ⵉⵍⵥⴰ ⵓⵎⴻⵖⵏⵉ ⵙ ⵎⴻⵏⵏⴰⵡ ⵏ ⵡⵓⴷⵎⴰⵡⵏ ⴷ ⵓⵖⵎⴰⵏ ⴷ ⵉⴽⵯⴻⵍⴰⵏ.

ⵉⴳⴰ ⵜⴰⵎⴰⵜⴰⵔⵜ ⵏ ⵜⵉⵎⵎⵓⵏⵡⴰ ⴷ ⵜⵉⵡⵡⵓⵙⵏⴰ ⵉ ⵡⵉ-ⵏⵏⴰ ⵓⵔ ⵉⵙⴻⴽⵙⵉⵡⵏ ⵉⵖⴻⵣⵡⵔ ⵅⴰⵙ ⵙ ⵢⴰⵜ ⵜⵉⵟ ⵎⴻⵇⵇⴰⵕ ⵍⴰⵏ ⵙⵏⴰⵜ ⵏ ⵜⵉⵟⵟⴰⵡⵉⵏ.

ⵜⴰⵔⴽⴰ (ⴰⵙⴰⵏⴰⵢ ⵉⵥⵉⵍⵏ) ⵢⴰⴷ ⴰⵔ ⵜⵜⴻⵍⴷⴰⵢ ⴰⴼⴳⴰⵏ ⴷ ⵓⵎⵓⴷⴰⵔ ⴰⴷ ⴳⵉⵙ ⵉⵥⵥⵉⵕⵡⵉⵥ (ⵉⵙⵙⴰⵔⴰ)ⵙ ⵓⴷⵓⵛ, ⴰⴷ ⴷⵉⵙ ⵉⵙⵎⵓⵛⵛⵍ (ⵉⴷⴷⴰ ⵜⴰⵡⴰⴷⴰ ⵏ ⵉⴼⴽⵔ), ⴰⴷ ⴳⵉⵙ ⵉⴳⴻⵔⴼⵍ ⴰⵙⵍ ⵏ ⴰⵡⴷ ⵢⴰⵏ ⵓⵎⴻⵜⵜⵙⵓ (ⴰⵎⵏⵓⵙ, ⴰⵏⴻⵣⴳⵯⵓⵎ).

ⴰⵙⴰⵏⴰⵢ ⴰⴷ ⴰⵎⵥⵥⴰⵢⴰⵜ ⴰⵔ ⵉⵙⵙⴻⴼⵔⵉⵔⵉⵙ ⵓⴷⵎⴰⵡⵏ, ⴰⵔ ⵉⵙⵙⴻⵔⵣⵓⵣⵓⵖ ⵓⵍⴰⵡⵏ.

ⴳⴻⵔ ⵉⵃⵙⵉⵏⵏ (ⵉⵃⴱⴰ) ⵏ ⵓⴳⴰⵎⴰ ⴰⴷ ⵜⴻⵎⵎⴻⵛⴽⵓⴽⴹ (ⴰⵔ ⵜⴻⵎⵎⴻⵏⴼⴰⵍ ⵜⵓⴼⵔⴰⵡⵉⵏ) ⵜⵡⴻⵏⴳⵉⵎⵜ ⴷ ⵓⵖⵏⴰⵏ, ⴰⵔ ⵙⴰⵍⵍⴰⵎⵏⵜ ⵡⴰⵍⵍⵏ  ⴳ ⵉⵙⴽⴽⵉⵏⵏ, ⴰⴳⵔⵔⵓ ⴰⵔ ⵉⵙⵙⴻⵍⴽⴰ ⵉⵎⵢⴰⵔⵏ.

ⴰⵍⴷⵓⴷⵢ ⵏ ⵜⵓⴷⴻⵔⵜ ⴰⵔ ⵉⵙⴼⴰⴼⴰ ⵉⴱⴻⵅⵛⵓⵛⵏ ⵣⴻⴳ ⵓⵙⴻⴳⵔⵙ ⵏⵙⴻⵏ.

ⵀⴰ ⵜⵉⵣⵣⵡⴰ ⴰⵔ ⵜⵜⴻⵍⵎⴰⵎⵏⵜ ⴰⵎⵖⵓⵙ.ⴳⴰⵏⵜ ⵜⵉⵏⴻⴱⴳⴰⵡⵉⵏ ⵏ ⵉⵄⵍⵓⵍⴰⵏ (ⵉⵍⴻⴷⵊⵓⵢⵏ, ⵉⵊⴷⴷⵉⴳⵏ, ⵉⵍⴻⵍⵍⵓⵛⵏ) ⵉⴱⴱⴻⵕⵥⵓⵥⵥⴻⵖⵏ (ⵉⵏⵏⴰⵕⵥⵎⵏ ⵉⵎⵉⵇ ⵙ ⵉⵎⵉⵇ) ⴰⵎⵎ ⵉⵙ ⴰⵔ ⵜⴻⵏⵜ ⵜⵜⴻⴽⴷⴰⵎⵏ (ⴰⴷⴷⴰⵢ ⵉⵏⵏⴻⴹ ⵛⴰ ⵉⵖⵉⵍ ⵏⵏⴻⵙ ⵉ ⵓⴳⴻⵕⴹ ⵏ ⵛⵔⴰ ⵀⴰⵜⵉⵏ ⵉⴽⴷⵎ ⵜ).

ⴰⵔ ⵜⴻⵏⵜ ⵜⵜⴻⵏⵚⴰⴼⵏ (ⴰⵔ ⵜⴻⵏⵜ ⵜⵥⴰⵢⴰⵜⵏ) ⵎⴰⵔ ⴰⴷ ⴰⵙⵉⵢⵏⵜ ⵜⴰⵍⴻⴽⵎⴰⵙⵜ (ⴰⵢ-ⵏⵏⴰ ⵏ ⵉⵇⵡⴰⵡⵛⵏ ⵏ ⵓⵡⵡⴻⵔⵏ ⵉⵜⵜⵉⵍⵉⵏ ⴳ ⵉⵊⴷⴷⵉⴳⵏ) ⵏⵙⴻⵏ.

ⴰⵡⴷ ⵉⵃⵔⴰⵔⴰⴷⵏ ⴰⵔ ⵜⵜⴻⴼⴰⴼⴰⵏ, ⴰⵔ ⵜⵜⴻⵎⵎⴻⵛⵜⴰⵢⵏ ⵜⴰⴼ ⴰⴷ ⵙⵔⴰⵔⵏ ⴰⵎⵓⵙⵙⵓ ⵏⵙⴻⵏ ⴰⵀⴰ ⴼⴼⴻⵖⵏ ⵉⵖⵉⵙⴰⵏ ⵏⵙⴻⵏ.

ⵉⵍⵥⴰ ⵓⴳⴰⵎⴰ ⴰⵀⴰ ⵉⵍⵍⵓⴹⵍⴻⴹ.

ⵉⵜⵙⵏ ⵉⴳⵔⴰⵏ ⵙⵜⵉⵢⵏ ⵙ ⵓⵍⴻⴷⵊⵓⵢ ⴰⵡⵕⴰⵖ ⵏⵏⴰ ⵉⴽⴻⵍⴹⵏ ⵉⵍⴻⵍⵍⵓⵛⵏ ⵢⴰⴹⵏ.

ⵡⵉ-ⵢⵢⴰⴹ ⵣⴻⴳⴳⵯⴰⵖⵏ ⵙ ⵓⵢⴻⴷⵊⵉⴳ ⴰⵣⴳⴳⵯⴰⵖ ⵉⴽⴻⵍⴹⵏ ⵡⵉ-ⵢⵢⴰⴹ.

ⵉⵥⵓⵡⴰⵢ (ⵉⵇⴰⵛⵛⵓⵏ ⵓⵙⴷⵉⴷⵏ ⵓⵔ ⵉⵍⵉⵏ ⴰⵍⴰⵜⵏ) ⴷ ⵉⵇⴰⵛⵛⵓⵏ (ⵉⵛⴻⵟⵃⴰⵏ ⵉⵎⴻⵥⵥⵢⴰⵏⵏ) ⵙⵍⵓⵍⵍⵉⵢⵏ (ⵙⵙⵓⴼⵖⵏ ⴰⴼⵔⵉⵡⵏ).

ⵉⵊⵓⵍⴰⵍ (ⵉⵛⴻⵟⵃⴰⵏ ⵉⴽⵏⴰⵏ ⴱⴻⵣⵣⴰⴼ ⵍⵓⵎⵏ ⵖⵉⴼ ⵜⵔⴳⴳⵯⵉⵡ ⵏ ⵡⴰⵎⴰⵏ)ⴰⵔ ⵜⵜⴰⵏⵣⵏ (ⴰⵔ ⵜⵜⴻⴱⴻⵏⴷⴰⵇⵏ) ⵉ ⵡⴰⵎⴰⵏ.

ⴰⵡⴷ ⵢⴰⵜ ⵜⵙⴻⴽⵯⵍⵓⵜ ⵓⵔ ⵜⴻⵣⵣⵉⴼ (ⵉⵣⵣⴻⴼ : ⵉⴽⴽⴻⵙ ⵜⵉⵎⴻⵍⵙⴰ ⵏⵏⴻⵙ).

ⴽⵓ ⴰⵎⵖⴰ ⵙ ⵜⵎⴻⵍⵙⵉⵜ ⵏⵏⴻⵙ.ⵉⴳⴰ ⵓⵎⴷⴰⵣ ⴰⵍⵎⵓ ⵏ ⵓⵖⵏⴰⵏ.ⴽⵓ ⴰⵖⵏⵓ ⴷ ⵎⴰⵢ ⴷ ⵉⵜⵜⴻⵍⴹⴰⴹ (ⵉⵜⵜⴻⵟⵟⴻⴹ).

ⴰⵢⵍⴰⵍⵏ ⴰⵔ ⵜⵜⴻⵖⵏⵓⵏⵏⴻⵙⵏ ⵙ ⵓⵜⵛⵉ ⵉⴼⵍⵓⵊⵊⴰⵏ .

ⵉⵛⴱⴰ ⵏ ⵉⵡⴷⴰⵏ ⴰⵔ ⵜⵜⴻⴼⵔⵉⵔⵉⵙⵏ ⵙ ⵓⴷⵡⴰⵜ ⴳ ⵓⵙⴰⴷⵡⵓ (ⴰⵏⵙⴰ ⵏ ⵓⵙⵡⵓⵏⴼⵓ) ⵉⵍⵍⴰⵏ ⴳ ⵓⴳⴰⵎⴰ.

ⵉⵙⵏⵓⴼⴼⴰ ⵓⵎⴻⵖⵏⵉ ⴰⵎⴰⴹⴰⵍ ⵙ ⵓⵣⴻⴹⵡⵉ (ⴰⵎⴷⴰⵣ) ⵏⵏⴰ ⵓⵔ ⴰⵙ ⵙⵙⵉⵏⵏ ⵉⵜⵙⵏ ⵉⵙⴻⴽⵙⵉⵡⵏ ⵙ ⵢⴰⵜ ⵜⵉⵟ.ⵉⴱⵓⴽⴰⴹ ⵏ ⵓⴳⵔⵔⵓ ⵓⵔ ⵔⵉⵏ ⴰⴷ ⵙⵙⴻⵍⴽⴰⵏ (ⴰⴷ ⵉⵙⵙⵓⴼⵖ ⵛⵔⴰ ⴽⵔⴰ ⵏ ⵓⵎⵢⴰⵔ ⴰⴷⴷⴰⵢ ⴷⴰ ⵉⵙⵡⵉⵏⴳⵉⵎ ⴳ ⴽⵔⴰ ⵏ ⵓⵙⴽⴽⵉⵏ) ⵜⵉⵎⵎⵓⵏⵡⴰ ⴷ ⵜⵉⵡⵡⵓⵙⵏⴰ ⵏⵏⴰ ⵉⴳⴰⵏ ⵜⵉⵔⵙⴰⵍ ⴼ ⵉⵙⴱⴻⴷⴷⴰ ⵓⵎⴻⵖⵏⵉ ⴰⵙⵍⵍⵓⵎ ⵏⵏⴻⵙ ⴰⴽⴻⵙⵡⴰⵡⴰⵜ .

ⵙ ⵓⴱⵓⴽⴹ ⵏ ⵓⴳⵔⵔⵓ ⵓⵔ ⴰⵔ ⵜⵜⴰⵛⵣⵏ ⴰⵣⴰⵏ ⵏ ⵓⵎⴻⵖⵏⵉ.ⵓⵔ  ⴰⵔ ⵜⵜⵉⵥⵉⵕⵉⵏ ⵅⴰⵙ ⵜⴰⵍⵍⵙⵜ .

ⴰⴽⵓⴷ ⴰⵎⵙⵙⵓⵙⵖ (ⵉⵙⵙⵓⴷⴷⴰⵏ ⴱⴻⵣⵣⴰⴼ) ⵓⵔ ⵉⵍⵍⵉ ⴳ ⵜⵓⴷⴻⵔⵜ ⵏⵙⴻⵏ.ⴽⵓⴷ ⵜⵃⵓⵏⵏⴻⵣⵏ (ⵜⵜⴻⴱⴻⵏⴷⴰⵇⵏ) ⵉ ⵓⵎⴻⵖⵏⵉ ⴰⵔ ⵜⴻⵜⵜⵉⵢⵏ ⵜⴰⴷⴰⵡⵜ ⵉ ⵓⵙⴰⵍⴰⵢ (ⴷⵉ-ⴷⴷⴰ ⴳ ⵜⵜⵓⴼⵙⴰⵔⵏ ⵉⵙⵍⵍⵓⵎⵏ ⵏⴻⵖ ⵓⵎⵏⴰⵏ ⵢⴰⴹⵏⵉⵏ ⵏⵏⴰ ⵉⵖⵏⴰ ⵓⴼⴳⴰⵏ) ⵏⵏⴻⵙ ⵉⵍⴰⵏ ⵎⴻⵏⵏⴰⵡ ⵏ ⵡⴰⵣⴰⵏⵏ.ⵓⵔ ⵔⵉⵏ ⴰⴷ ⴰⴽⵯⵣⵏ ⵉⵙ ⵉⵜⵜⴻⵢⴰⵙⵢ ⵓⵃⵎⵎⴰⵕ ⵏ ⵜⵖⴻⵕⵎⴰ ⴼ ⵙⵏⴰⵜ ⵏ ⵜⵉⵔⵙⴰⵍ ⵜⵉ-ⵏ ⵜⵉⵎⵎⵓⵏⵡⴰ ⴷ ⵜⵉ-ⵏ ⵜⵉⵡⵡⵓⵙⵏⴰ.

ⵖ ⵓⴳⴰⵎⴰ ⴰⴷ ⵉⵍⴼⵓ ⵓⵏⵍⵍⵉ ⴰⴹⵓ ⵉⵊⵊⴰⵏ ⵏ ⵉⵎⵖⴰⵏ ⵀⴰ ⵉⵊⵊⵖⵢⵓⵍ, ⵀⴰ ⴰⴹⴰⵕⵜⴱⵉⵔ, ⵀⴰ ⴰⴹⴰⵕⵡⴰⵢⵍⴰⵍ, ⵀⴰ ⵉⵍⵙⴼⵓⵏⴰⵙ, ⵀⴰ ⵜⴰⵡⵊⵊⵉⵎⵜ ⵏ ⵉⵣⵎ, ⵀⴰ ⵜⵉⴼⵉⵥⵥⴰ ⵏ ⵉⵍⴻⵖⵯⵎⴰⵏ, ⵀⴰ ⵜⴰⵅⴱⴰⵛⵜ ⵏ ⵡⵓⵛⵛⵏ ⵀⴰ ⴰⵣⴽⴽⵓⵏ ⵀⴰ ⴰⵢⴼⴷ, ⵀⴰ ⵡⴰⵍⴰⵎ, ⵀⴰ ⵉⴼⴻⵔⴱⴰⵖⵓⵙ ⴰⵀⴰ … ⴰⴷ ⵢⴰⵛⵣ ⴰⵙⵖⵓ (ⴰⵛⴰⵍ ⴰⵣⴳⴳⵯⴰⵖ) ⵀⴰ ⵉⵔⵔⵉⵙ (ⵉⴷⵇⵇⵉ), ⵀⴰ ⵜⴰⴼⵣⴰ, ⵀⴰ ⴰⴱⴰⴼⴼⴰ (ⴰⵏⴰⵡ ⵏ ⵡⴰⵛⴰⵍ ⵉⵎⵍⵍⵓⵍⵏ ⵏⵏⴰ ⵙ ⴷⴰ ⵜⵜⴻⵖⵎⵓⵏ ⵉⵜⵙⵏ ⵉⵡⴷⴰⵏ ⵜⵉⴳⵯⵎⵎⴰ ⵏⵙⴻⵏ), ⵀⴰ ⵜⴰⵎⵙⴻⵙⵜ (ⴰⵛⴰⵍ ⵉⵍⴳⴳⵯⴰⵖⵏ), ⵀⴰ ⴰⴼⴰⵔⵜⴰⵙ (ⴰⵛⴰⵍ ⵉⴽⵜⴰⵔⵏ ⵙ ⵉⵃⴻⵛⵜⴰⵡⵏ).

ⴳⴻⵔ ⵉⵃⴱⴰ ⵏ ⵉⴳⵔⴰⵏ ⴰⴷ ⵉⵏⵙⴳ ⵓⵎⴷⴰⵔ ⴰⴹⵓ ⵓⴹⵍⵉⵍ (ⵉⵙⴽⴽⴰⵏ) ⵉⵜⵜⴻⵙⵔⴰⵢⵏ ⵉⵣⴻⵏⵣⵉⴼⵏ (ⵉⵥⵓⵕⴰⵏ ⵏ ⵉⵛⵢ) ⵏⵏⴻⵙ ⵢⵓⵙⵙⴰⵏ ⵙ ⵜⵓⵔⵏⴰⵏⵜ (ⵜⴰⵊⵊⵎⴰ ⵏ ⵓⴽⴻⵔⵣⵓⵥⴼ : ⴰⴷⴷⴰⵢ ⵓⵔ ⵉⵙⵙⵉⵏ ⵛⴰ ⴰⴷ ⵉⵙⴰⵡⵍ ⵙ ⵜⴰⵟⴼⵉ ⴰⵔ ⵉⵔⴳⴳⴻⵎ ⵉⵡⴷⴰⵏ ⵎⴻⵇⵇⴰⵕ ⵓⵔ ⵜ ⵓⵡⵉⴹⵏ ⵙ ⵓⵢ-ⵏⵏⴰ ⵉⵅⵅⴰⵏ ⴱⴻⵣⵣⴰⴼ ⵀⴰⵜⵉⵏ ⵉⴳⴰ ⴰⴽⴻⵔⵣⴰⵥⴰⴼ), ⴰⴷ ⵢⴰⴼ ⵜⴰⵖⴱⴰⵍⵓⵜ ⵏ ⵓⴼⵓⵔⵀⵜ (ⴰⵙⴰⴳ ⵉⵙⵍⵍⴰ ⴽⵔⴰ ⵉ ⵓⵙⴻⵟⵚⵓ ⴰⴷ ⵉⴼⵓⵔⵀⵜ) ⴷ ⵜⵓⴷⴻⵛⵜ (ⵜⵓⴷⴻⵛⵜ ⵜⴻⵍⵍⴰ ⴳ ⵓⵜⵛⵉ ⴳ ⵜⵖⵓⵕⵉ ⴳ ⵓⵃⵡⵡⴻⵚ ⴳ ⵓⵏⵓⴷⴷⴻⵎ …. ⴰⵖⴻⴷⵊⴰⵊ.), ⴰⴷ ⵉⵙⵔⵖ (ⵉⵏⵙⴳ :ⵉⵙⵙⵉⴷⴼ ⴰⴹⵓ ⵙ ⵜⵓⵔⵉⵏ) ⴰⵣⵡⵓ ⵉⵎⴰⵏ ⴷ ⵉⵍⵍⵉⴼ ⴳ ⵢⴰⵏ ⵓⵔⴷⴷⵃ (ⴰⵎⵓⵙⵙⵓ ⵉⵜⵜⴻⵎⵢⴰⵡⴰⵢⵏ ⴷ ⵓⵥⴰⵡⴰⵏ ⴰⵎⵎ ⵓⵃⴻⵢⴷⵙ) ⵎⵉ ⵉⴽⴽⴰ ⵓⵥⴰⵡⴰⵏ ⵏⵏⴻⵙ ⵉⵖⴻⵏⴱⴰ ⵏ ⵉⵙⴽⴰⵍⵍⴰⵄⵏ ⴷ ⵜⵔⴻⴳⴳⵯⵉⵡ ⵏ ⵡⴰⵎⴰⵏ, ⴰⴷ ⵉⴼⴼⴻⵖ ⵉⵔⴹⵎ ⵉⵍⵓⵍⵍⴻⴽⵏ ⴳ ⵡⴰⵏⵏⴰⵣ ⴷⴷⴻⵖ ⵙ ⵉⴳⴻⵟⵎⴰⵏ ⵏ ⵡⵓⵣⵣⴰⵍ ⴷ ⵓⵛⴹⴰⵕ, ⴰⴷ ⵢⴰⴷⴼ ⴰⵎⴰⴳⵍⴰⵍ ⵏ ⵡⴰⴽⴰⵍ ⵉⵙⵙⵓⴷⴷⴰⵏ ⵙ ⵓⴱⵍⵉⴽⵎ (ⵉⵎⵉⵇ ⵏ ⵓⵙⵉⴷⴷ) ⵏ ⵜⴰⴼⵓⵢⵜ ⴷ ⵓⵣⴻⵏⵥⴰⵕ ⵏⵏⴻⵙ ⴷ ⵓⵙⵉⴷⴷ ⵏⵏⴰ ⵓⴳⵎⵏ  ⵉⵜⵔⴰⵏ ⵣⴻⴳ ⵉⵟⵉⵊ .

ⴰⵎⴰⴳⵍⴰⵍ ⵏⵏⴰ ⴷⴰ ⵉⵙⵙⵓⴷⵓⵛⵏ ⵡⵉ-ⴷⴷⴰ ⴷ ⵜⵉ-ⵏⵏⴰ ⴽⴽⵯⴰⵔⵏ ⵡⵓⵍⴰⵡⵏ ⵏⵙⴻⵏ ⵙ ⵓⵔⵓⵎⵙⵓ (ⵜⴰⵢⵔⵉ ⵉⵖⴱⴰⵏ) ⵏ ⵓⴼⵓⵍⴽⵢ.

ⴰⴼⵓⵍⴽⵢ ⵉⵍⵍⴰ ⵖⵉⴼ ⵎⴻⵏⵏⴰⵡ ⵏ ⵡⵓⴷⵎⴰⵡⵏ ⴰⵀⴰ ⵉⵎⴰⵏ ⴷ ⵎⴻⵏⵏⴰⵡ ⵏ ⵉⵏⵉⵍⵏ .

ⴽⵓ ⴰⴼⵓⵍⴽⵢ ⵏⴻⵖ ⴰⵀⵓⵙⴽⵢ ⵉⵍⴰ ⵉⴹⵉⵙ ⵏⵏⴻⵙ ⴷⴰⵔ ⵡⵉ-ⵍⵍⵉ ⵉⵙⴻⴽⵙⵉⵡⵏ ⵙ ⵜⵉⵢⵏⵏⵉⵜ ⵉⵙⵙⵓⴷⴷⴰⵏ ⴷⴰⵜ ⵏ ⵡⴰⴷ ⵜⵜⵉⵢⵏ ⴰⵍⵍⵏ ⵙ ⵉⴷⵉⵙ ⴰⴱⵏⴰⴱⴰⴽ (ⵓⵔ ⵉⴼⴰⵡⵏ) ⴷ ⵓⴷⵏⴰⵏⵏⴰⵙ (ⴰⵡⵍⴰⵍⵍⴰⵙ, ⵉⵍⵍⴰⵙⵏ).

ⵣⵉ ⵜⵏⴻⴼⵔⴰ ⵏ ⵜⴻⴳⵔⵙⵜ ⵜⵍⵓⵍⴰ ⴷⵉⵖ ⵜⴻⴼⵙⵓⵜ ⵏⴻⵖ ⵜⴻⵙⴽⵓⵍⴻⵍ ⵉⵎⵛⵉ ⵏⵏⴰ ⵉⵙⴽⵓⵍⴻⵍ ⵓⵙⵉⴷⴷ ⵣⴻⴳ ⵜⵏⴻⴼⵔⴰ ⵏ ⵜⴰⵍⵍⴻⵙⵜ.

ⵅⴰⵙ ⵡⴰⵔⴳⵔⵔⵓ (ⵡⴰ-ⵏⵏⴰ ⵓⵔ ⵉⵍⵉⵏ ⵜⴰⵡⴻⵏⴳⵉⵎⵜ) ⴰⵢ ⴷ ⵉⵜⵜⴻⵍⵣⵣⴰⴽⵏ (ⴰⵔ ⵢⴰⴽⴽⴰ ⵜⴰⴷⴰⵡⵜ) ⵉ ⵜⵉⵎⵎⵓⵏⵡⴰ ⴷ ⵜⵉⵡⵡⵓⵙⵏⴰ ⴳ ⵎⴰⵢ ⴷ ⵉⴳⴰⵏ ⴰⴷⴻⵎⴽⴰⵍ ⴷ ⵡⴰⵡⴰⵍ ⴷ ⵉⵏⵉⵍ ⴷ ⵓⵏⴻⵛⵜ.

ⴰⵎⵏⵏⴻⴳⵔⴰ (ⴰⵡⴻⵏⴳⴰⵎ, ⵡⴰ-ⵏⵏⴰ ⵉⵍⴰⵏ ⵜⴰⵡⴻⵏⴳⵉⵎⵜ) ⴰⵔ ⵉⵜⵜⴻⵙⴻⵏⴱⴰⵔ ⴰⵙⵢⴰⴽ (ⴰⴷ ⵉⵙⵎⵓⵏ ⵛⵔⴰ ⵉⵜⵙⵏ ⵉⴼⴻⵔⴷⴰⵙⵏ ⴼ ⵢⴰⵏ ⵓⴷⵎ, ⵢⴰⵏ ⵓⵏⴻⵛⴽ  ⴼ ⵢⴰⵏ ⵓⵃⵜⵜⵓ ….) ⵏ ⵓⵖⵏⴰⵏ ⴳ ⵢⴰⵏ ⵓⴷⵎ ⴷ ⴰⵎⴽⴻⵢⵢⴹ (ⴰⵢ-ⵏⵏⴰ ⵓⵔ ⵉⴳⵉⵏ ⴰⴳⵔⵔⵓ).

ⵎⴻⵇⵇⴰⵕ ⵍⵍⴰⵏ ⵉⵜⵙⵏ ⵉⴳⵔⴰⵏ ⵙⵜⵉⵢⵏ ⵙ ⵜⵉⵡⴻⵕⵖⵉ ⵏⴻⵖ ⵙ ⵜⵣⵓⵖⵉ ⵀⴰⵜ ⵉⵙ ⵉⴼⵍⵓⵊⵊⴰ ⵓⵍⴻⴷⵊⵓⵢ ⴰⵡⵕⴰⵖ ⵏⴻⵖ ⴰⵣⴳⴳⵯⴰⵖ ⴳⵉⵙⵏ, ⵎⴰⵛⴰ ⵓⵔ ⴰⵔ ⵉⵜⵜⵉⵏⵉ ⵓⵢ-ⴰ ⵉⵙ ⵓⵔ ⵍⵍⵉⵏ ⵉⵍⴻⵍⵍⵓⵛⵏ ⵢⵓⵙⵉⵢⵏ ⵉⵏⵉⵍⵏ ⵢⴰⴹⵏ.

ⴰⴼⴳⴰⵏ ⵓⵏⵥⵉⵥ ⴰⴷ ⵢⴰⴽⵯⵣ ⴰⵢ-ⴰ ⴰⵙⴰⴳ ⴰⵔ ⵉⵙⴰⵍⵍⴰⵎ ⵉ ⵉⴷⵉⵔ (ⴰⵡⵜⵜⵓ ⵏ ⵉⵥⵕⵉ).

ⵉⵀⵓⵙⴽⵢ ⴰⴷ ⵉⵎⵢⴰⵏⴰⵎ, ⴰⴷ ⵉⵎⵢⴰⵎⴰⵏ ⴷ ⵓⴳⴰⵎⴰ.

ⴰⴷ ⵉⴱⵓⵥⵥⵏ ⵙ ⵜⵉⵎⵎⵓⵏⵡⴰ ⴷ ⵜⵉⵡⵡⵓⵙⵏⴰ ⴳ ⵓⵎⴰⴹⴰⵍ.

ⴰⴷ ⵉⵎⵢⴰⴷⴷⴰⵔ, ⴰⴷ ⵉⵎⵎⴻⵣⴷⴰⵖ ⴷ ⵓⵡⴰⵢⵟ, ⴰⴷⵜ ⵉⵣⵔⴽ, ⴰⴷⵜ ⵉⴷⴳⵢ ⵉⵎⵛⵉ ⵏⵏⴰ ⵉⴳⴰ, ⴰⴷ ⵓⵔ ⵜ ⵉⵙⴷⵉⴷⴷⵉⵢ ⴳ ⵜⵓⴷⴻⵔⵜ ⵏⵏⴻⵙ, ⴰⴷ ⵉⴷⵙ ⵉⵛⵛⵓⵔ ⴰⵍⴷⵓⴷⵢ ⴷ ⵓⵍⴻⵖⴷⵓⴷⵢ (ⴰⵙⴰⴳ ⵓⵔ ⵜⴻⵍⵍⵉ ⵜⴰⵙⵙⴰⵙⵜ ⴳ ⵜⵓⴷⴻⵔⵜ) ⵏ ⵜⵓⴷⴻⵔⵜ.

ⵉⵥⵉⵍ ⴰⴷ ⵉⴳ ⵣⵓⵏⴷ ⵓⵣⴻⵔⴽⵟⵟⵉⴼ (ⴰⵢⵍⴰⵍ ⴰⴼⴻⵔⵇⴰⵇⴰⵛ ⵉⵍⴰⵏ ⴰⵖⴻⵏⴱⵓ ⵓⵎⵍⵉⵍ)ⵓⵔ ⵉⵏⵇⵇⴰⵏ ⴰⵣⴻⵍⴳⴰⵎ (ⵡⴰ-ⵏⵏⴰ ⴷ ⵉⴷⵙ ⵉⵎⵣⴰⵔⴰⵢⵏ ⴳ ⵉⵎⵢⴰⵔⵏ ⵏⴻⵖ ⴳ ⵜⵉⴷⵎⵉ ⵏⴻⵖ ⴳ ⵉⵎⵖⵉⵍⵏ).

ⵉⵖⵓⴷⴰ ⴰⴷ ⵢⵉⵙⵉⵏ ⵛⵔⴰ ⵉⵡⵜⵜⴰ ⵏⵏⴻⵙ ⴷ ⵉⵡⵜⵜⴰ ⵏ ⵡⵉ-ⵢⵢⴰⴹ.ⵉⴼⵓⵍⴽⵢ ⴰⴷ ⵉⵎⵓⵏ ⴽⵓ ⴰⴼⴳⴰⵏ ⴷ ⵡⴰ-ⵢⵢⴰⴹ ⵜⴰⵎⵓⵏⵜ ⵏ ⵡⴰⵎⴰⵏ ⴷ ⵓⵖⵖⵓ ⵖⵉⴼ ⵜⴰⵟⴼⵉ ⵏ ⵜⴰⵎⵎⴻⵏⵜ ⴷ ⵡⵓⴷⵉ ⴳ ⵓⵖⴰⵔⴰⵙ ⵏ ⵓⵃⴻⴹⵕⵏ (ⴰⴷⴷⴰⵢ ⵓⵔ ⵉⵍⵍⵉ ⵓⵎⵎⴻⴽⵏⵙ).

ⵉⵀⵓⵙⴽⵢ ⴰⴷ ⵉⵕⵥⵎ ⵉ ⵓⴳⵔⵔⵓ ⵏⵏⴻⵙ,ⵉⵙⵙⵉⵍⵡ ⵉ ⵉⵎⵊⵊⴰⵏ ⵏⵏⴻⵙ ⵜⴰⴼ ⴰⴷ ⵉⵔⵎⵙ ⴰⴽⴽⵯ ⵎⴰⵢ ⴷ ⵉⴳⴰⵏ ⴰⵡⴰⵍ, ⴰⵏⵯⵢⴰ ⴷ ⵓⵥⴰⵡⴰⵏ ⴷ ⵎⴰⵔⵔⴰ ⵉⴽⵯⵍⴰⵏ ⴷ ⵎⴰⵢ ⴷ ⵉⴳⴰⵏ ⴰⵏⵛⴽ ⴷ ⵓⵡⵙⵉⵏ (ⴰⵏⴰⵡ), ⴰⴷ ⵉⵙⵙⵉⵏⵡ ⵉⵍⵙ ⵏⵏⴻⵙ, ⵉⵎⵢⴰⵔⵏ ⵏⵏⴻⵙ, ⵉⵕⴰⵄⴰⵜⵏ ⵏⵏⴻⵙ ⵎⴰⵔ ⴰⴷ ⵉⵙⴻⴽⵙⵉⵡ ⵙ ⵡⴰⵍⵍⵏ ⵏ ⵓⵏⵍⵍⵉ ⴷ ⵜⵡⴻⵏⴳⵉⵎⵜ .

ⵓⵔ ⵉⵍⵍⵉ ⵉⴱⴹ ⴳⴻⵔ ⵓⴼⴳⴰⵏ ⴰⴱⵅⵅⴰⵏ ⴷ ⵓⴷⵎⵎⴰⵏ ⴷ ⵓⵃⴻⵔⵣⴳⴳⵯⴰⵖ ⴷ ⵓⵃⴻⵔⵎⵍⵍⴰⵍ ⴷ ⵓⴼⴻⵔⵡⵕⴰⵖ ⴰⵛⴽⵓ ⵛⵛⴰⵔⵏ ⵉⴼⴳⴰⵏⵏ ⵎⴻⵇⵇⴰⵕ ⵎⵣⴰⵔⴰⵢⵏ ⵙ ⵉⵏⵉⵍⵏ ⴰⵍⵎⴻⵎⵎⵓ (ⵜⵓⵎⴰⵙⵜ :ⴰⵢ-ⵏⵏⴰ ⵉⴳⴰⵏ ⴰⵎⵟⵟⴰⵍⴰⵍ ⴳ ⵛⴰ ⵏ ⵓⵙⴽⴽⵉⵏ)  ⵏ ⵜⵉⴼⴼⵓⴳⵏⴰ.

ⴰⵅⵅⵉⴷ ⵉⵡⴷⴰⵏ ⴰⴷⴷⴰⵢ ⵎⴰⵏ ⵖⵉⴼ ⵓⴼⵓⵍⴽⵢ, ⴰⵙⴰⴳ ⵓⵔ ⴷⴰ ⵉⵙⵙⴰⵔⴰ ⵛⴰ ⴷⵉⴳⵙⵏ ⴰⴷ ⵉⵙⵍⵓⴱⴱⴻⴹ ⵡⴰ-ⵢⵢⴰⴹ ⵉⴷⴷⴻⵖ ⵓⵔ ⵉⵎⵙⴰⵙⴰ ⴷ ⵉⴷⵙ ⴳ ⵜⵉⴷⵎⵉ, ⵏⴻⵖ ⵓⵔ ⵉⵔⵉ ⴰⴷ ⵉⴽⴽ ⴰⴱⵔⵉⴷ ⵏⵏⴰ ⵉⴽⴽⴰ ⵙ ⵉⴳⵏⵏⴰ, ⵉⴷⴷⴻⵖ ⵓⵔ ⵉⵍⵉ ⵡⴰⵏ ⵉⵏⵉⵍ ⵏⵏⴻⵙ, ⵏⴻⵖ ⵉⴷⴷⴻⵖ ⴷⴰ ⵉⵙⵙⵉⵡⵉⴷ ⵓⵖⴻⵎⴱⵓⴱ ⵏⵏⴻⵙ ⵙ ⵜⴰⴱⴻⵅⵏⵉ ⵏⴻⵖ ⵙ ⵓⴽⵓⵛⵔ (ⴰⵣⵍⴰⴹ ⴰⵔ ⵜⴰⴼⴻⵙⵏⴰ ⵜⴰⵎⴰⵣⴷⴰⵔⵜ).

ⵜⵉⴱⴱⵓⵖⵕⴰ ⴰⵔ ⵜⴻⵙⴼⵉⵜⵜⵉⴽⵙ ⵖⵉⴼ ⵓⵣⵓⵖ (ⵓⵣⵓⵔ) ⵏ ⵡⴰⴽⴰⵍ.

ⴰⵅⵅⵉⴷ ⴰⵙⴰⴳ ⴷⴰ ⵉⵜⵜⴰⵙⵢ ⴽⵓ ⴰⴼⴳⴰⵏ ⴰⵎⵓⵔ ⵏⵏⴻⵙ ⴳ ⵉⵄⵍⵉⵣⵏ (ⴰⴽⴽⵯ ⵎⴰⵢ ⴷ ⵉⵏⴼⴰⵏ ⵉ ⵜⴼⴻⴽⴽⴰ ⵉⴳⴰⵏ ⴰⵄⵍⵉⵣ) ⴷ ⵉⵜⵊⵉⵖⵏ (ⴰⵢ-ⵏⵏⴰ ⵉⵍⴰ ⵛⴰ ⴰⵀⴰ ⵉⴳⴰ ⴰⵏⴰⴱⴰ ⴰⵎⵎ ⵜⴰⵡⴻⵛⴽⵉⵏⵜ ⵏ ⵜⵓⴷⵢⵉⵣⵉⵏ ⴷ ⵜⴰⴳⵔⵓⵎⵎⴰ ⵏ ⵜⵙⵉⵙⴰⵡ ⴷ ⵎⴰⵢ ⴷ ⵉⴳⴰⵏ ⴰⵣⵓⵜⴼ ⴰⵙⵓⵏⴰⵏ …).

ⴰⵙⴰⴳ ⵉⵜⵔⴰ (ⵉⴽⴽⵓⵙⴰ ⴰⵢ-ⵏⵏⴰ ⵉⴳⴰⵏ ⴰⵏⴰⴱⴰ) ⵛⵔⴰ ⵉⵔⴻⴼⵙⴰⵏ ⵉⵖⵓⴷⴰⵏ ⴰⴷ ⵉⵎⵓⵏ ⴷ ⵎⴻⴷⴷⴻⵏ ⴰⵙⵍ ⵏ ⴰⵡⴷ ⵢⴰⵜ ⵜⵓⴽⵔⵉⵙⵜ.

ⴰⵎⵢⴰⵎⴰⵏ ⴷ  ⵓⵡⴰⵢⵟ ⵉⵔⴰ ⴰⴷ ⵉⴱⵓⵥⵥⵏ ⵙ ⵜⵉⵔⵙⴰⵍ ⵏ ⵜⵓⴷⴻⵔⵜ ⴷ ⵜⵖⴻⵕⵎⴰ ⵡⴰⵏ ⵜⵉⵎⵎⵓⵏⵡⴰ ⴷ ⵜⵉⵡⵡⵓⵙⵏⴰ.

ⴰⴷ ⵉⴽⴷⵎ ⴽⵓ ⵢⵓⴽ ⵜⴰⵣⵔⵔⴰⵢⵜ (ⴰⴳⴻⵕⴹ ⵏ ⵓⵊⴷⴷⵉⴳ) ⴰⵙⵍ ⵏ ⵡⴰⴷⵜ ⵉⵙⵙⵓⴽⴼ ⴰⵀⴰ ⵢⴰⵣⵏ ⵉ ⵡⴰ-ⵢⵢⴰⴹ ⴰⵣⴰⵏ ⵏ ⵜⵉⴼⴼⵓⴳⵏⴰ.

ⴰⴷ ⵉⴳ ⵉⴼⴻⵔ ⴰⵣⴻⴳⵣⴰⵡ ⵏⴻⵖ ⵓⵎⵍⵉⵍ ⵜⵉⵍⵍⴻⴼⵜ ⵉⴽⴽⴰⵜⵏ ⴰⵡⵜⵜⵓ ⵉ ⵓⵎⵎⴻⴽⵏⵙ (ⵉⵎⴻⵏⵖⵉ).

ⴰⴷ ⵉⵛⵛⵓⵔ ⴽⵓ ⵢⴰⵏ ⴷ ⵓⵡⴰⵢⵟ ⵜⵉⵔⴰⵎ ⵏ ⵜⴻⴼⵙⵓⵜ ⵏ ⵡⵓⵕⵖ ⵙ ⵡⵓⴷⵓⵛ ⴷ ⵜⴰⵟⴼⵉ .

ⴰⵖⴰⵣⴰⴼ ⵎⵓⵃⵎⵎⴰⴷ ⵜⴰⴼⵙⵓⵜ ⵏ 2968/2018