جريدة العالم الأمازيغي صوت الإنسان الحر
ⵉⵣⵎⵓⵎⵎⵢ ⵓⵙⴻⵍⵎⴰⴷ ⴽⵓⴷ ⴰⵔ ⵉⵙⴰⵍⵍⴰⵎ ⵉ ⵡⵓⴷⵎ ⵏ ⵉⵡⵉⵙ ⴰⵎⴻⵚⴽⴰⵏ :
– ⴰⵙⵙ-ⴰ ⵉⴳⴰ ⵜⴰⴼⴰⴳⵍⴰ ⵏ ⵓⵙⴻⵍⵎⴰⴷ .
ⵉⵙⵙⵓⴼⵖ ⵢⴰⵏ ⵓⴷⵍⵉⵙ ⵣⴻⴳ ⵓⵛⴽⴽⴰⵕ ⵏⵏⴻⵙ :
– ⵉⴳⴰ ⵓⴷⵍⵉⵙ-ⴰⴷ ⵢⴰⵜ ⵜⴰⵔⵔⴰⵛⵜ ⵉⵣⴻⵏⵏⴻⴼⵏ (ⵉⵍⴰⵏ ⵢⴰⵏ ⵓⵜⵉⴳ ⴰⵎⴰⵊⵊⴻⵢⴰⵍ).ⴰⴷⵍⵉⵙ ⴰ ⵉⵡⵉ ⵏⵓ ⵢⵓⴼ ⵜⵉⵎⴻⵍⵙⵉⵜ.ⵙ ⵓⵎⴻⵏⴷⴰⵜ ⴰⴷ ⴳⵉⵙ ⵜⵜⴰⴱⴱⴰⴷ(ⴰⴷ ⵜⵖⴻⵕⴷ ⴰⵙⴽⴽⵉⵍ ⵙ ⵓⵙⴽⴽⵉⵍ) ⴰⵔ ⴷ ⵜⵉ ⵜⵖⴻⵕⴷ ⴳ ⵢⴰⵏ ⵡⴰⵙⵙ ⴰⴽⴽⵯ ⵎⴰ ⴰⴷⴷⴰⵢ ⵜⵉⵙⵉⵏⴷ ⵉ ⵉⵍⵙ ⵏⵏⴰ ⵙ ⵉⵜⵜⴻⵢⴰⵔⴰ.ⵀⴰⵏ ⵉⵍⵙ ⴷⴷⴻⵖ ⴰ ⵎⴻⵎⵎⵉ ⵉⵣⵏⵓⵛⵛⵎ ⵜ ⵓⵎⴻⵖⵏⵉ ⵎⴰⵔ ⴰⴷ ⵙⵉⵙ ⵢⴰⵣⵏ ⵜⴰⴱⵔⴰⵜ ⵏⵏⴻⵙ ⵜⴰⴼⵓⵣⴰⵍⵜ ⵉⴳⴰⵏ «ⴰⵍ ⵇⵓⵕⴰⵏ ⴰⴽⴻⵙⵡⴰⵡⴰⵜ»
ⵢⵓⴷⵔ ⵉⵛⵉⵔⵔⵉ ⵉⵍⴻⴽⵎⵏ ⵙⴹⵉⵙ ⵏ ⵓⵙⴳⴳⵯⴰⵙ ⵉ ⵡⴰⵍⵍⵏ ⵏⵏⴻⵙ.ⵉⵙⵙⵉⵍⵡ ⵉ ⵡⴰⵏⵛⵓⵛⵏ ⵏⵏⴻⵙ.ⵢⵓⵛⴻⵢ ⵉⴱⴱⴰ ⵏⵏⴻⵙ ⵙ ⵎⴰⵢ ⴷ ⵉⵔⴰ,ⵢⵓⵙⵖ ⴰⵡⴰⵍ ⵏⵏⴻⵙ :
– ⵀⴰⵏ ⵓⵔ ⵉⵍⵍⵉ ⵎⴰⵢ ⴷ ⵢⵓⴼⵏ ⴰⴷⵍⵉⵙ .ⵀⴰⵏ ⵉⵡⴷⴰⵏ ⴳ ⵉⵡⴰⵏⵉⴽⵏ ⵉⵍⵍⴰⵏ ⴳ ⵓⵏⴼⴰ ⵏ ⵜⵖⴻⵕⵎⴰ ⴰⵔ ⵜⵜⴻⵎⵎⴻⴼⴽⴰⵏ ⵉⴷⵍⵉⵙⵏ.ⴰⵀⴰ ⵜⴰⴱⵔⴰⵜ ⵏ ⵓⵎⴻⵖⵏⵉ ⵜⴻⵣⵡⴰⵔ ⵙ ⵓⵏⵀⴰⴹ ⵏ ⵜⵖⵓⵕⵉ.ⵉⴳⴰ ⴰⵄⵓⵕⵉⴹ ⴰⴷⴰⵖ ⵉⵏⵀⴹ ⵓⵎⴻⵖⵏⵉ ⵙ ⵜⵖⵓⵕⵉ ⴰⵀⴰ ⴷⵔⵓⵙⵏ ⴷⴰⵔ-ⵏⵏⴻⵖ ⵉⵎⴻⵖⵕⴰⵏ.ⵢⴰⵛ ⴰⵖⵔⴼ ⵏⵏⴻⵖ ⴰⵢ ⴷ ⵢⵓⴼⵏ ⵉⵖⴻⵔⴼⴰⵏ ⵏ ⵓⵎⴰⴹⴰⵍ ?ⵉ ⵎⴰ ⴰⵅ ⴰⴷ ⴰⴷⴰⵖ ⵣⵡⵓⵔⵏ ⵡⵉ-ⵢⵢⴰⴹ ⵏⴻⵇⵇⵉⵎ ⵏⴻⴽⴽⵯⴻⵏⵉ ⴼⴼⵉⵔ-ⴰⵙⵏ ?ⵀⴰⵜ ⵙ ⵜⵖⵓⵕⵉ ⴰⵙ ⵏⴻⵏⵏⴰ ⴰⴷⵜⵏ ⵏⴻⵣⵡⵓⵔ ⵙ ⵓⵛⴼⴼⴰⵍⵓ.ⴷⵖⵉ ⴰⵔⴰⴷ ⴰⵍⵓⴳ ⴷ ⵓⴷⵍⵉⵙ ⴷ ⵓⵖⴰⵏⵉⴱ ⵏⵏⴻⵛ .
ⵉⵙⴻⴽⵙⵉⵡ ⵓⵔⴱⴰ ⵙ ⵜⵎⴻⵍⵙⵉⵜ ⵏ ⵢⴰⵏ ⵡⴰⵣⵣⴰⵏ ⴷ ⵢⴰⵜ ⵜⴰⵣⵣⴰⵏⵜ ⴼ ⵓⵙⵜⵓⵍ ⵏ ⵓⴷⵍⵉⵙ ⵏⵏⴰ ⴰⵙ ⵉⵙⵖⴰ.ⵉⴳⴻⵔ ⵜⵉⵟ ⴼ ⵓⴷⵎ ⵏ ⵜⴻⵔⴱⴰⵜ ⵉⴷⴷⴻⵍⵏ ⵉⵖⴼ ⵏⵏⴻⵙ ⵙ ⵢⴰⵏ ⵉⵍⴱⴹ ⵉⵍⵙⴰⵏ ⵢⴰⵏ ⵓⵇⴻⵢⴷⵓⵔ .ⵉⵙⵎⵓⵜⵜⴻⵢ ⴰⵍⵍⴻⵏ ⵙ ⵓⵔⴱⴰ ⵉⵍⵙⴰⵏ ⵢⴰⵜ ⵜⵇⴻⴱⴱⵓⵜ ⵜⵓⵎⵍⵉⵍⵜ ⵉⵙⴻⵔⵙⵏ ⵏⵏⵉⴳ ⵏ ⵉⵖⴼ ⵏⵏⴻⵙ ⵢⴰⵜ ⵜⴽⵓⵎⴱⵓⵜ ⵜⴰⵣⴻⴳⴳⵯⴰⵖⵜ.ⵉⵡⴽⵏ :
– ⴱⴱⴰ ,ⵙⴻⵖ ⵉⴷ ⴰⵎⵎ ⵜⴽⵓⵎⴱⵓⵜ-ⴰⴷ.
– ⴰⵙⴰⴳ ⵜⴻⵎⵓⵔⵙⴷ ⴰⴷⴰⵛⵜ ⵉ ⵙⴻⵖ .
– ⵓⵔ ⴷⵊⵉⵏ ⴰⵏⵏⴰⵢⵖ ⵛⵔⴰ ⵏ ⵓⵃⴻⵏⵊⵉⵔ ⴰⴷ ⵉⵍⵙ ⴰⵎⵎ ⵜⴽⵓⵎⴱⵓⵜ ⴷⴷⴻⵖ !
– ⵜⴳⴰ ⵜⴰⴷⴰⴳⴰⵎⵜ ⵏ ⵉⵡⴷⴰⵏ ⵏⵏⴰ ⵉⴱⴰⴹⵏ ⵓⴳⴳⴰⵔ ⵏ ⵡⵉ-ⵢⵢⴰⴹ.ⵀⴰⵜⵉⵏ ⴳ ⵜⴼⴰⴳⵍⴰ ⵏ ⵓⵣⵎⵎⵓⵣⴷ ⵏⵏⴻⵛ ⴽⴽⵉⵖ ⵙⵖⵉⵖ ⴰⵛ ⵢⴰⵜ ⵎⴰⵛⴰ ⵜⵣⴻⴳⵣⴰⵡ.ⴷⴷⵉⵖ ⴰⴷⴰⵛ ⴷ-ⴰⵡⵉⵢⵖ ⵜⴰⵡⵍⵍⴰⴼⵜ ⵏⵏⴻⵛ ⴽⵓⴷ ⵜⴻⵍⵙⵉⴷ ⴰⵇⴻⵢⴷⵓⵔ ⵓⵎⵍⵉⵍ ⴷ ⵜⴽⵓⵎⴱⵓⵜ ⵜⴰⵣⴻⴳⵣⴰⵡⵜ.
ⵉⵛⴷⴷⴻⵏⵛⵔ ⵓⵙⴻⵍⵎⴰⴷ ⵉⴼⴻⵍ ⵉⵡⵉⵙ ⴰⵔ ⵉⵙⴰⵍⵍⴰⵎ ⵉ ⵜⵡⴻⵍⵍⴰⴼⵜ ⵏ ⵓⵔⴱⴰ ⴷ ⵜⴻⵔⴱⴰⵜ ⵉⵇⵇⴰⵕⵏ ⴳ ⵓⴷⵍⵉⵙ ⴰⴼⵓⵣⴰⵍ ⵓⴷⵍⵉⵖ.ⴽⵓⴷ ⵉⵡⵔⵔⵉ-ⴷ ⵉⴱⴱⴰ ⵏⵏⴻⵙ ⵉⵣⵣⵉⴽⵏ ⴰⵙ ⵜⴰⵡⵍⵍⴰⴼⵜ.ⵅⴰⵙ ⵏⴻⵜⵜⴰ ⵉⴳⴻⵔ ⵜⵉⵟ ⵏⵏⴻⵙ ⵖⵉⴼⵙ ⵉⵣⵎⵓⵎⵎⵢ ,ⵉⵎⵎⴻⵔ ,ⵜⴻⴳⴳⴰⴷⵊ ⴰⵙ ⵜⵡⴻⴳⵉⵎⵜ ⵏⵏⴻⵙ ⵙ ⵓⵣⵔⴰ .ⴽⵓⴷ ⵜ ⵉⵙⵔⴰⵔ ⵉⵙⴰⵡⵍ :
– ⵔⵉⵖ ⵜ ⵜⵣⴻⴳⴳⵯⴰⵖ.
– ⴰⴷⴷⴰⵢ ⵜⵅⵉⵜⴻⵔⴷ ⴰⴷⴰⵛⵜ ⴳⴻⵖ ⴷ ⵜⴰⵔⵔⴰⵛⵜ .ⵜⴳⴰ ⵜⴰⴷⴰⴳⵎⵜ ⵏ ⵡⴰ-ⵏⵏⴰ ⵉⵍⴻⴽⵎⵏ ⴰⵛⴼⴼⴰⵍⵓ ⵏ ⵡⵓⵙⵓⵏ.ⵓ-ⵏⵏⴰ ⵉⴱⴰⴹⵏ ⴷⴰ ⵉⵜⵜⵉⵙⵉⵏ ⴰⴷ ⵉⵙⵉⵡⵍ ⵙ ⵉⵍⵙ ⵏ ⵓⵎⴻⵖⵏⵉ .ⵖⴹⴻⴼ ⵙ ⵓⵍⴰⵎⵉⴷ ⵡⴰ-ⵏⵉⵜⵉ.ⴰⴷ ⵏⴻⵣⵣⴻⵡⵓⵔ ⵙ ⵉⵏⵉⵍⵏ .
ⵢⵓⵙⵢ ⵓⵙⴻⵍⵎⴰⴷ ⵢⴰⵏ ⵓⵏⴻⴳⵎⵉⵔⵙ ⵓⵎⵍⵉⵍ :
– ⵙⵏⵓⵎⵍ ⵉⵏⵉⵍ ⵏⵏⴻⵙ.
– ⵓⵎⵍⵉⵍ.
– ⵜⴻⵖⵥⴰⵏⴷ.
ⵢⵓⵙⵢ ⵡⴰ-ⵢⵢⴰⴹ ⵉⴳⴰⵏ ⴰⵡⵕⴰⵖ :
– ⵉ ⵎⴰ ⵡⴰ ?
– ⴰⵡⵕⴰⵖ.
– ⵎⴻⵣⵢⴰⵏ.
ⵢⵓⵙⵢ ⴷⵉⵖ ⴰⵣⴻⴳⵣⴰⵡ :
– ⵉ ⵎⴰ ⴰⵢ ⴷ ⵜⵜⵉⵏⵉⴷ ⵉ ⵡⴰ ?
– ⴰⵣⴻⴳⵣⴰⵡ.
– ⵉⵖⵜⴰ.
ⵢⵓⵙⵢ ⴷⵉⵖ ⴰⵙⴳⴳⴰⵏ :
– ⵙⵏⵓⵎⵍ ⵡⴰ.
– ⴰⴱⵅⵅⴰⵏ.
– ⵉⵖⵓⴷⴰ.ⴰⴷ ⵏⴻⵎⵎⵓⵜⵜⵢ ⵙ ⵉⵙⵓⵏⵉⵣ ⵏ ⵜⵏⴻⵣⴳⵉⵜⵏ .
ⵉⵙⵙⵓⵏⵖ ⴰⵙ ⵓⵏⵣⵉⵖ :
– ⵎⴰ ⴰⵜⵜⴰ ⵡⴰ ?
– ⴰⵎⴽⵓⵥ.
– ⵓⵀⵓ ⵓⵏⵣⵉⵖ.ⵜⴻⵣⴳⴻⵍⴷ .
ⵉⵙⵙⵓⵏⵖ ⴰⵙ ⵜⵣⴰⵢⴻⵔⵜ :
– ⵎⴰ ⴰⵜⵜⴰ ⵓⵙⴰⵏⴰⵣ ⴷⴷⴻⵖ ?
– ⵜⵣⴰⵢⴻⵔⵜ.
– ⵜⴻⵖⵥⴰⵏⴷ.
ⵉⵙⵙⵓⵏⵖ ⴰⵙ ⴰⵎⴽⵓⵥ :
– ⵎⴰ ⴰⵜⵜⴰ ⵓⴷⵎ-ⴰⴷ ?
– ⵓⵏⵣⵉⵖ.
– ⵓⵀⵓ.ⵓⵔ ⴰⵔ ⵜⴻⴱⴹⵓⴷ ⴳⴻⵔ ⵓⵎⴽⵓⵥ ⴷ ⵓⵏⵣⵉⵖ.ⵎⴰ ⴰⵢ ⴷ ⵜⴻⵙⵓⴼⵍⵓⴷ ⴳ ⵓⵍⴰⵎⵉⴷ ⵡⴰ-ⵏⵉⵜⵉ.
– ⵍⵍⴰⵏ ⵎⴻⵏⵏⴰⵡ ⵏ ⵉⵍⵉⵍⵏ ⴷ ⵡⵓⴷⵎⴰⵡⵏ.
– ⵜⵍⵉⴷ ⵜⵉⵎⵉⵜⴰⵔ ⵏ ⵜⵡⴻⵏⴳⵉⵎⵜ ⵜⵓⵏⵥⵉⵥⵜ.ⴰⴷ ⵏⴻⵎⵎⵓⵜⵜⵢ ⵙ ⵓⵏⵛⴽ :
ⵉⵣⵣⵉⴽⵏ ⴰⵙ ⵜⵉⵡⵍⴰⴼⵉⵏ ⵏ ⵓⴼⴳⴰⵏ ⴰⵖⵣⵣⴰⴼ ,ⴰⴳⵣⵣⴰⵍ,ⴰⵏⴰⵎⵎⴰⵙ,ⵓⵙⴷⵉⴷ ,ⴰⵣⵓⵔⴰⵔ :
– ⵙⴽⴻⵏ ⵙ ⵓⴹⴰⴹ ⵏⵏⴻⵛ ⴰⴼⴳⴰⵏ ⴰⴳⴻⵣⵣⴰⵍ.
ⵉⵙⴻⵔⵙ ⴰⴹⴰⴹ ⵏⵏⴻⵙ ⴼ ⵎⴰⵔⵔⴰ ⵜⵏⵓⵎⵉⵍⵉⵏ ⴰⵀⴰ ⵓⵔ ⵉⵣⴳⵉⵍ ⴰⵡⴷ ⵢⴰⵜ :
– ⴷⵖⵉ ⴰⴷ ⵏⴻⵎⵎⵓⵜⵜⵢ ⵙ ⵡⴰⵏⴰⵡ ⵏⴻⵖ ⴰⵡⵙⵉⵏ .
ⵉⵙⴻⵔⵙ ⴷⴰⵜⴰⵙ ⵢⴰⵜ ⵜⵓⵡⵍⵉⴼⵜ ⵏ ⵓⴼⴳⴰⵏ ,ⵢⴰⵜ ⵏ ⵓⵎⵓⴷⴰⵔ ,ⵢⴰⵜ ⵏ ⵢⵉⵛⴽ ⴷ ⵢⴰⵜ ⵏ ⵓⵥⵕⵓ :
– ⵙⵜⴻⵢ ⴷⵖⵉ ⵎⴰⵢ ⴷ ⵉⴳⴰⵏ ⴰⴼⴳⴰⵏ ⴰⵀⴰ ⵙⴻⵔⵙ ⵜ ⴳ ⵜⵓⵅⴷⵉⵔⵜ-ⴰⴷ.
ⵢⵓⵙⵢ ⵓⵃⴻⵏⵊⵉⵔ ⵜⵓⵡⵍⵉⴼⵜ ⵏ ⵓⴼⴳⴰⵏ ⴰⵀⴰ ⵉⵙⴻⵔⵙ ⵜ ⴳ ⵜⵓⵅⴷⵉⵔⵜ ⵎⵉ ⵉⵜⵜⴻⵢⴰⵔⴰ ⵏⵏⵉⴳⴰⵙ ⵜⴰⵡⴰⵍⵜ ⵏ ⵓⴼⴳⴰⵏ.
– ⵉⵥⵉⵍ.ⴷⵖⵉ ⵙⵜⴻⵢ ⴰⵎⵓⴷⴰⵔ ⴷ ⵓⵎⵖⴰ ⴷ ⵓⵥⵕⵓ ⴰⵀⴰ ⵜⵙⴻⵔⵙⴷ ⴽⵓ ⴰⵏⴰⵡ ⴳ ⵜⵓⵅⴷⵉⵔⵜ ⵏⵏⴻⵙ.
ⵓⵔ ⵉⵣⴳⵉⵍ .ⵉⵣⵎⵓⵎⵎⵢ ⵉⴱⴱⴰ ⵏⵏⴻⵙ ⴰⵀⴰ ⵉⵚⵉⵏⵚⵢ:
– ⵎⴰ ⵎⵉ ⵜⵙⴻⵍⵍⴰⴷ ?
– ⵉ ⵢⴰⵏ ⵓⵣⵉⵜ.
– ⵎⴰ ⴰⵢ ⴷ ⵉⴽⴻⵔⴽⵛⵏ ?
– ⵛⴻⵢ.
ⵉⵕⵥⵎ ⵓⵙⴻⵍⵎⴰⴷ-ⵉⴱⴱⴰ ⵉ ⵓⵥⴰⵡⴰⵏ ⵏ ⵓⵜⴻⴽⵍⴰⵙ :
– ⵎⴰ ⵎⵉ ⵜⵙⴻⵍⵍⴰⴷ ?
ⵉⵛⵜⵉⴱⴱⵢ :
– ⵉ…..
– ⵉ ⵡⴰⵥⵍ.
ⵉⵕⵥⵎ ⵉ ⵉⵔⵉⵔⴰⵏ ⵓⵔ ⵉⵎⴰⵏ ⴷ ⵡⴰⵥⵍ :
– ⵎⴰ ⵎⵉ ⵜⵙⴻⵍⵍⴰⴷ ?
ⵉⵛⵜⵉⴱⴱⵢ ⴷⵉⵖ :
– ⴰ…ⴰ…
– ⴰⵏⵯⵢⴰ.
ⵉⴽⴽⵯⴻⵢ ⵢⴰⵜ ⵜⵎⵉⵊⵓⵔⵉⵜ ⵜⴰⵎⴻⵥⵥⵢⴰⵏⵜ ⵉⴳⴰⵏ ⵜⴰⵙⵓⵔⴰⵔⵜ ⴰⵀⴰ ⵜⴻⴳⵔⴱ:
– ⵎⴰ ⵎⵉ ⵜⵙⴻⵍⵍⴰⴷ ?
– ⵉ ⵓⵙⵉⵙ.
ⵢⵓⴷⵔ ⵉ ⵢⴰⵏ ⵓⵣⴻⵜⵢⵓⵢ (ⵜⵙⵓⵔⴰⵔⵜ)ⵉⴳⴰⵏ ⴰⴳⴹⵉⴹ :
– ⵎⴰ ⵎⵉ ⵜⵙⴻⵍⵍⴰⴷ ?
– ⵉ ⵓⵙⴳⵉⵊⵊⵉⵢ .
ⵢⵓⵙⵢ ⵢⴰⵏ ⵓⵖⴻⴷⵔⵉ ⵢⵓⴷⵔ ⵉ ⵜⵙⴰⵔⵓⵜ ⵏⵏⴻⵙ ⵉⵕⵥⵎ ⵉ ⵓⵟⵎⵓ ⵏⵏⴻⵙ ⵉⴳⴰⵏ ⴰⵎⵎ ⵓⴳⴰⵔⵉ :
– ⵎⴰ ⵎⵉ ⵜⵙⴻⵍⵍⴰⴷ ?
ⵉⵔⴽⴽⴻⴽ ⴰⵔ ⵉⵜⵜⴻⵅⵎⵎⴰⵎ :
– ………
– ⵉⵣⴰⵡⵡⴰⵏ .
ⵉⵙⴻⵔⵙ ⴷⴰⵜⴰⵙ ⵜⵓⵡⵍⵉⴼⵜ ⵏ ⵓⵣⵎⵎⵓⵣⴷ ⵏⵏⴻⵙ :
– ⵎⴰ ⴰⵢ ⴷ ⵜⴳⴰ ⵜⴰ .
– ⵜⴰⵡⵍⵍⴰⴼⵜ.
ⵉⵙⵙⵓⵏⵖ ⴰⵙ ⵓⴷⵎ ⵏ ⵜⴰⴼⵓⵢⵜ :
– ⵎⴰ ⴰⵢ ⴷ ⵉⴳⴰ ⵓⵢ-ⴰ ?
– ⵜⵓⵏⴻⵖⵜ.
ⵉⵙⵙⵓⵏⵖ ⴰⵙ ⵉⴼⴰⵙⵙⵏ ⵉⵍⴰⵏ ⴰⵎⴰⵡⵓⵙ :
– ⵎⴰ ⴰⵢ ⴷ ⵜⴻⴷⵎⵉⴷ ⵣⴻⴳ ⵜⵓⵏⴻⵖⵜ ⵜⴰ-ⵏⵉⵜⵉ ?
– ⵉⵙ ⵉⴳⴰ ⴱⴰⴱ ⵏ ⵉⴼⴰⵙⵙⵏ ⵉⵙⵎⴳ.
– ⵎⴰ ⴰⵢ ⴷ ⵏⴻⵜⵜⵉⵏⵉ ⵉ ⵓⵢ-ⵏⵏⴰ ⵜⴻⴷⵎⵉⴷ ⴳ ⵜⵡⴻⵏⴳⵉⵎⵜ ⵏⵏⴻⵛ ?
ⵉⵔⴽⴽⴻⴽ ⴰⵔ ⵉⵙⵡⵉⵏⴳⵉⵎ :
– …………..
– ⵜⵓⴷⵡⵉⵏⵜ ⵏⴻⵖ ⴰⴷⵎⵓ .
– ⵎⴰ ⴰⵢ ⴷ ⵜⵙⵓⴼⵍⵓⴷ ⵣⴻⴳ ⵓⵢ-ⴰ ?
– ⵉⵍⵍⴰ ⵓⵎⵣⵉⵔⴰⵢ ⴳ ⵡⴰⵏⴰⵡ ,ⴳ ⵓⵙⴰⵏⴰⵣ,ⴳ ⵉⵏⵉⵍ,ⵖ ⵓⵏⵛⴽ ,ⵅ ⵓⵣⵉⵜ ⴷ ⵜⵓⵡⵍⵉⴼⵜ.
– ⴰⵅⵅⵉⴷ ⴰⵙⵓⴼⵍⵓ.ⴷⵖⵉ ⴱⴹⵓ ⴳⴻⵔ ⵓⵡⵜⵎ ⴷ ⵜⴰⵡⵜⵎⵜ.
ⵉⵙⴻⵔⵙ ⴷⴰⵜⴰⵙ ⵜⵓⵏⴻⵖⵜ ⵏ ⵓⵔⴳⴰⵣ ⴷ ⵜⴰⵢⵜⵛⵜ ⴷ ⵜⵉ-ⵏ ⵓⵣⴳⵔ ⴷ ⵜⴼⵓⵏⴰⵙⵜ.ⵙ ⵓⴹⴰⴹ ⵏⵏⴻⵙ ⵉⵙⴻⵏⴳⴰⵔⴰ ⴳⴻⵔ ⵓⵡⵜⵎ ⴷ ⵜⴻⵡⵜⵎⵜ..
– ⴰⴷ ⵏⴰⴹⵓ ⵖ ⵉⵍ-ⴰⴷ ⵙ ⵓⴷⵎⴰⵡⵏ ⵏ ⵜⵏⴻⵣⴳⵉⵜ .
ⵉⵙⴻⵔⵙ ⴷⴰⵜⴰⵙ ⵜⵓⵏⴻⵖⵜ ⵏ ⵓⵏⵣⵉⵖ ⴷ ⵜⵉ-ⵏ ⵓⵎⴽⵓⵥ :
– ⵙⵙⵉⴹⵏ ⴷⵖⵉ ⵉⵖⴻⵣⴷⵉⵙⴰⵏ ⵏ ⴽⵓ ⴰⵙⴰⵏⴰⵣ.
– ⴽⵓ ⵢⵓⴽ ⵉⵍⴰ ⴽⵓⵥ ⵏ ⵉⵖⴻⵣⴷⵉⵙⴰⵏ.
– ⵙⵙⵉⴹⵏ ⵜⵉⵖⴻⵎⵕⵉⵏ ⵏ ⴽⵓ ⵓⴷⵎ.
– ⴽⵓ ⵓⴷⵎ ⵉⵍⴰ ⴽⵓⵥⵜ ⵏ ⵜⵖⴻⵎⵕⵉⵏ.
– ⵣⴻⵏⵏⴻⵎⵣⵍ ⴳⴻⵔ ⵜⵖⴻⵎⵕⵉⵏ.
– ⵎⵎⴻⵔⵡⴰⵙⵏⵜ .
– ⵣⴻⵏⵏⴻⵎⵣⵍ ⴳⴻⵔ ⵉⵖⴻⵣⴷⵉⵙⴰⵏ ⵏ ⵓⵎⴽⵓⵥ.
– ⴰⴽⵙⵓⵍⵏ.
– ⴷ ⵡⵉ-ⵏ ⵓⵏⵣⵉⵖ.
– ⵎⵣⴰⵔⴰⵢⵏ .
– ⵉⴷ ⵓⵔ ⵍⵍⵉⵏ ⵡⵉ-ⵏⵏⴰ ⴰⴽⵙⵓⵍⵏ ?
– ⵍⵍⴰⵏ ⵄⵄⴰⴷ.
– ⵎⴰ ⴰⵜⵜⴰ ⵏⵉⵜⵏⵉ?
– ⵡⴰ ⵢⴰⴽⵙⵓⵍ ⴷ ⵡⴰ ⴷ ⵡⴰ ⵢⴰⴽⵙⵓⵍ ⴷ ⵡⴰ.
– ⵉⵖⵓⴷⴰ.ⵎⴰ ⵙ ⵉⵎⵣⴰⵔⴰⵢ ⵓⵎⴽⵓⵥ ⴷ ⵓⵏⵣⵉⵖ ?
– ⴰⵎⴽⵓⵥ ⵉⵍⴰ ⴽⵓⵥ ⵏ ⵉⵖⴻⵣⴷⵉⵙⴰⵏ ⵉⵎⵎⴻⵢⴰⴽⵙⴰⵍⵏ.ⵉⴷⴷ ⵓⵏⵣⵉⵖ ⵉⵍⴰ ⵙⵉⵏ ⵎⵢⴰⴽⵙⴰⵍⵏ ⴷ ⵙⵉⵏ ⵢⴰⴹⵏⵉⵏ ⵉⵎⵢⴰⴽⵙⴰⵍⵏ.
– ⴰⵙⵢ ⵜⴰⵖⴷⴰ ⴰⵀⴰ ⵙⵖⴻⵍ ⵉⵖⴻⵣⴷⵉⵙⴰⵏ ⵏ ⵓⵏⵣⵉⵖ .
ⵢⵓⵙⵢ ⵜⴰⵖⴷⴰ ⵏ ⵡⵓⵣⵣⴰⵍ ⵉⵥⵥⴰⵢⵏ ⴰⵔ ⵉⵜⵜⴻⵙⵖⴰⵍ.
– ⵎⴰ ⴰⵢ ⴷ ⵜⵓⴼⵉⴷ ?
– ⵓⴼⵉⵖ ⵉⵙ ⵉⵍⴰ ⵓⵎⴽⵓⵥ ⴽⵓⵥ ⵉⵖⴻⵣⴷⵉⵙⴰⵏ ⵉⵎⵎⴻⵢⴰⴽⵙⴰⵍⵏ ⵉⴷⴷ ⵓⵏⵣⵉⵖ ⵉⵍⴰ ⵉⵖⴻⵣⴷⵉⵙⴰⵏ ⵉⵎⵣⴰⵔⴰⵢⵏ ⴽⵓ ⵙⵉⵏ ⵎⵢⴰⴽⵙⴰⵍⵏ.
– ⵉⵙ ⵜⵓⵛⴻⵣⴷ ⴷⵖⵉ ⵎⴰ ⵙ ⵉⵏⴳⴰⵔⴰ ⵓⵎⴽⵓⵥ ⴷ ⵓⵏⵣⵉⵖ ?
– ⵢⴰⵀ.
– ⴰⵔⴰ-ⴷ ⴷⵖⵉ ⴰⴷ ⵏⵉⵙⵉⵏ ⵜⴰⵏⵉⵍⴰ.ⵎⴰ ⵙ ⴷⴰ ⵜⵜⵓⵔⵓⴷ?
ⵉⵎⵍⴰ ⴰⵙ ⴰⴼⵓⵙ ⵏⵏⴻⵙ ⴰⵢⴼⴼⴰⵙ.
– ⵎⴰ ⴰⵏⵉ ⴰⵢⴼⴼⴰⵙ ⵏⵏⴻⵛ .
ⵉⵎⵍⴰ ⴰⵙ ⴰⴼⵓⵙ ⴰⴼⴰⵙⵉⵢ.
– ⵎⴰ ⴰⵏⵉ ⴰⵣⴻⵍⵎⴰⴹ ⵏⵏⴻⵛ.
ⵉⵣⵣⵉⴽⵏ ⴰⵙ ⵉⴷⵉⴽⵍ ⵏⵏⴻⵙ ⴰⵣⴻⵍⵎⴰⴹ :
– ⵀⴰⵜⵉ.
– ⵎⴻⵛ ⴰⵛ ⵉⵜⵜⴻⵔ ⵛⵔⴰ ⴰⴷ ⵜⵜⴻⴷⴷⵓⴷ ⴳ ⵓⴱⵔⵉⴷ ⴼ ⵓⴼⴰⵙⵉⵢ ⵎⴰ ⴰⵢ ⵜⴻⵙⴽⴰⵔⴷ ?
– ⴰⴷ ⵎⵓⵏⵖ ⴷ ⵜⵏⵉⵍⴰ ⵉⵍⵍⴰⵏ ⴼ ⵓⴼⵓⵙ ⵉⵏⵓ ⴰⵢⴼⴼⴰⵙ.
– ⵉⵖ ⴰⵛ ⵉⵜⵜⴻⵔ ⵛⴰ ⴰⴷ ⵜⵜⴻⴷⴷⵓⴷ ⵖ ⵓⵖⴰⵔⴰⵙ ⴼ ⵓⵣⴻⵍⵎⴰⴹ ⵎⴰ ⴰⵢ ⵜⵜⴻⴳⴳⴰⴷ ?
– ⴰⴷ ⴽⴽⴻⵖ ⴷⵉ-ⵏⵏⴰ ⵉⵍⵍⴰ ⵓⴼⵓⵙ ⵉⵏⵓ ⴰⵣⴻⵍⵎⴰⴹ.
ⵉⵙⴻⵔⵙ ⴷⴰⵜⴰⵙ ⵜⵓⵛⴳⵉⵔⵜ ⵏ ⵜⵎⴰⵣⵉⵔⵜ :
– ⴰⴷ ⵏⴻⵛⵔⵢ ⵉⵙ ⵏⴻⵍⵍⴰ ⴳ ⵎⵕⵕⴰⴽⵯⵛ ⵙⴽⴻⵏ ⵉ ⴷⵖⵉ ⵎⴰ ⴰⴷⴷⴰⵢ- ⵏ ⵉⵍⵍⴰ ⵓⵙⴼⵉ .
– ⵉⵍⵍⴰ ⴳ ⵓⵜⴰⵔⴰⵎ.
– ⵉ ⵓⴳⴻⵔⵙⵉⴼ ?
– ⵖ ⵓⴳⵎⵓⴹ.
– ⵉ ⵎⴰ ⵜⵉⵏⴳⴳⵉ ?
– ⵅ ⵓⴳⴰⴼⴰ.
– ⵉ ⵜⵓⴳⵡⵉⵕⵜ ?
– ⴳ ⵓⴳⴰⵍⴰ.
– ⵎⴰ ⴰⵜⵜⴰ ⵓⵎⴻⵏⵣⴰⵡ ⴰ ⴳ ⵜⴻⵍⵍⴰ ⵜⵎⴰⵣⵉⵔⵜ ⵏⵏⴻⵖ.
– ⵖ ⵓⴼⵔⵉⴽⵢⴰ.
– ⵉⴷ ⵅ ⵓⴳⴰⴼⴰ ⵏⵏⴻⵙ ⵎⵉⴷ ⵖ ⵓⴳⴰⵍⴰ ?
– ⴳ ⵓⴳⴰⴼⴰ ⴷ ⵓⵜⴰⵔⴰⵎ ⵏⵏⴻⵙ.
– ⵉⴷ ⵏⴳⴰ ⵉⵎⴻⵣⴷⴰⵖ ⵏ ⵓⴼⵔⵉⴽⵢⴰ ⵎⵉⴷ ⵏ ⴰⵙⵢⴰ?
– ⵏ ⵓⴼⵔⵉⴽⵢⴰ.
– ⵎⴰ ⴰⴷⴷⴰⵢ-ⵏ ⵜⴻⵍⵍⴰ ⵍⵉⴱⵢⴰ ?ⵉⴷ ⴳ ⵓⵜⴰⵔⴰⵎ ⵏⴻⵖ ⵅ ⵓⴳⵎⵓⴹ ⵏ ⵜⵎⴰⵣⵉⵔⵜ ⵏⵏⴻⵖ.
ⵉⵙⵙⴰⵔⴰ ⴼ ⵡⴰⴽⴽⴰⵜ ⵏ ⵍⵉⴱⵢⴰ ⴳ ⵜⵓⵛⴳⵉⵔⵜ ⴰⵍⵍⴻⵢ ⵜ ⵢⵓⴼⴰ.ⵉⵛⵜⵉⴱⴱⵢ :
– ⴰⵜ… ⵓⵀⵓ ⴰⴳⵎⵓⴹ.
– ⴰⴷ ⵏⴻⵎⵎⵓⵜⵜⵢ ⵙ ⵓⵙⵉⴹⵏ :
– ⵢⴰⵏ ⵔⵏⵓ ⵢⴰⵏ ⵢⴰⴽⵙⵓⵍ ⴷ ?
– ⵙⵉⵏ.
– ⵙⵉⵏ ⴽⴽⴻⵙ ⵢⴰⵏ ⵢⴰⴽⵙⵓⵍ ⴷ ?
– ⵢⴰⵏ.
– ⵢⴰⵏ ⴽⴼⴻⴷ ⵢⴰⵏ ⵢⴰⴽⵙⵓⵍ ⴷ ?
– ⵢⴰⵏ.
– ⵢⴰⵏ ⴱⴹⵓ ⵢⴰⵏ ⵢⴰⴽⵙⵓⵍ ⴷ ?
– ⵢⴰⵏ.
– ⵙⴻⵎⵎⵓⵙ ⴱⴹⵓ ⵙⵉⵏ ⵢⴰⴽⵙⵓⵍ ⴷ ?
– ⵙⵉⵏ.
– ⵉⴷ ⵓⵔ ⵉⵍⵍⵉ ⵛⵔⴰ ⵏ ⵓⵏⵣⵓ ?
– ⵉⵛⴰⵢⴹ ⵢⴰⵏ.
– ⵢⴰⵏ ⵔⵏⵓ ⵢⴰⵏ ⵢⴰⴽⵙⵓⵍ ⴷ ⵛⵕⴰⴹ.
ⵉⵣⴳⴼ ⵓⵔⴱⴰ :
– ⵓⵀⵓⵢ.
ⵉⵣⵎⵓⵎⵎⵢ ⵉⴱⴱⴰ-ⴰⵙⴻⵍⵎⴰⴷ :
– ⴰⵢ-ⴰ ⵉⴳⴰ ⵓⵎⴳⵉⵏ.ⵜⴰⵎⴰⵣⵉⵔⵜ ⵏⵏⴻⵖ ⵜⴻⵍⵍⴰ ⴳ ⵓⴼⵔⵉⴽⵢⴰ ⵢⴰⵛ ?
– ⵢⴰⵀ.
– ⵏⴻⴽ ⴷ ⵛⴻⵢ ⵏⴳⴰ ⵉⵎⴻⵖⵕⴰⴱⵉⵢⵏ ⵢⴰⵛ ?
– ⵢⴰⵀ.
– ⵀⴻⵢⵢⴰ ⵏⴳⴰ.
– ⵉⴼⴰⵔⵉⴽⵏ.
– ⴰⵢ-ⴰ ⵉⴳⴰ ⵓⵎⴳⵉⵏ.ⵜⴰⵎⴰⵣⵉⵔⵜ ⵏⵏⴻⵖ ⵜⴳⴰ ⵢⴰⵏ ⵓⵙⴻⴽⵏⴰⴼ ⵏ ⵓⵣⵉⵣⴰⵔ ⴰⵄⵕⴰⴱ ⵢⴰⵛ?
– ⵢⴰⵀ.
– ⵏⴻⴽ ⴷ ⵛⴻⵢ ⴷ ⵉⵎⴻⵣⴷⴰⵖ ⴰⴽⴽⵯ ⵏ ⵜⵎⴰⵣⵉⵔⵜ ⵏⵏⴻⵖ ⵏⴳⴰ ⵉⵎⴻⵖⵕⴰⴱⵉⵢⵏ ⵢⴰⵛ ?
– ⵢⴰⵀ.
– ⵀⴻⵢⵢⴰ ….
ⵉⵔⴽⴽⴻⴽ ⵓⵔⴱⴰ ⴰⵔ ⵉⵙⵡⵉⵏⴳⵉⵎ :
– ⵎⴰ ⴰⵛ ⵢⴰⵖⵏ ⵉⵙ ⴰⵛ ⵉⴱⴱⴻⵢ ⵛⵔⴰ ⴰⵊⴻⵄⴱⵓⴹ ⵏ ⵜⵡⴻⵏⴳⵉⵎⵜ ?
ⵓⵔ ⵉⵙⴰⵡⵉⵍ :
– ⵎⴰ ⴰⵏⵣⴰ ⴰⵎⴰⴳⵉⵏ ⵉⵙ ⵜⵉ ⵜⴻⵣⵍⵉⴷ ?ⴰⴼⵍⵓ ⵓⵎⴳⵉⵏ ⵉⴳⴰ ⵜ ⴰⴷ ⵜⵉⵏⵉⴷ ⵏⴳⴰ ⵉⵄⵕⴰⴱⵏ.
– ⵓⵀⵓⵢ ,ⵓⵀⵓⵢ ⵍⵍⴰⵏ ⵉⵎⴰⵣⵉⵖⵏ .ⵉⵎⴰⵣⵉⵖⵏ ⵓⵔ ⴳⵉⵏ ⵉⵄⵕⴰⴱⵏ.ⵉⵎⴻⵖⵕⴰⴱⵉⵢⵏ ⵓⵔ ⴳⵉⵏ ⵉⵄⵕⴰⴱⵏ.
ⵖⵎⴰⵏⵜ ⵜⵡⴻⵕⵖⵉⵡⵉⵏ ⵓⴷⵎ ⵏ ⵉⴱⴱⴰ ,ⴰⵔⴰⵙ ⵜⵜⴻⵃⵎⵉⵎⵉⴹⵏ ⵉⵣⴻⵏⵣⵉⴼⵏ.ⵉⴽⴻⵔⵣⵓⵥⵥⴼ ,ⵢⵓⵙⵢ ⵜⴰⵖⴷⴰ ⵏ ⵡⵓⵣⵣⴰⵍ ⵉⵡⵡⴻⵜ ⵜ ⴼ ⵓⵢⵔⵔⵉ ⵏⵏⴻⵙ.ⵉⴱⴱⵓⵏⴱⵢ ⵓⵔⴱⴰ.ⵉⵙⵙⴻⴱⵍⵓⵍⵍⵖ ⵓⵙⴻⵍⵎⴰⴷ ⴰⵍⵍⵏ ,ⵉⵣⵍⴰ ⵜⵎⵉⵊⴰ ⵏⵏⴻⵙ.ⴰⵔ ⵉⵙⵔⵉⴷⴷⵉⵎ ⵓⵙⴰⴼⴰ ⵏ ⵡⴰⵣⵣⴰⵏ.ⵉⴳⴻⵔ ⵓⵙⴻⵍⵎⴰⴷ ⵉⵖⴼ ⵏⵏⴻⵙ ⵣⴻⴳ ⵜⵎⴰⵍⴰⵍⵜ ⵏ ⵜⴳⴻⵎⵎⵉ.ⵜⴻⵙⵖⵓⵢⵢ ⵜⵎⴻⵔⵛⵉⵍⵜ ⴰⵔ ⵜⴻⴽⴽⴰⵜ ⴰⴳⴻⵊⴷⵓⵔ .ⵜⴻⵣⵍⴰ ⴳ ⵢⴰⵜ ⵜⵉⴽⴽⴻⵍⵜ ⴰⵔⴱⴰ ⵏⵏⴻⵙ ⴷ ⵓⵎⴻⵔⵛⴰⵍ.
ⴰⵖⴰⵣⴰⴼ ⵎⵓⵃⵎⵎⴰⴷ ⵜⴰⴼⵙⵓⵜ ⵏ 2968
