جريدة العالم الأمازيغي صوت الإنسان الحر
ⵔⴰⴷ ⵜⴻⵜⵜⵓⵙⵡⴰⵍⴰ/ⵜⴻⵜⵜⵓⵙⵙⵓⵜⵓⵢ ⵜⵙⵓⵜⵍⵜ ⴰⴷ ⵏ ⵓⵙⵙⵉⵍⵖ ⵙⴳ ⴷⴰⵔ ⵓⵎⵙⵙⵓⴼⵖ ⴷ ⵓⵙⵉⵏⴰⵔⵉⵙⵜ ⴷ ⵓⵎⴰⵍⵍⴰⵙ ⵀⵉⵛⴰⵎ ⵍⵄⵙⵔⵉ, ⴳ ⵓⵙⴰⵜⵉ ⵏ ⵡⴰⵏⵏⴰⵍ ⵏ ⵓⵙⴱⵓⵖⵍⵓ ⵏ ⵜⵣⵎⵎⴰⵔ ⴷ ⵜⵙⵏⵉⴳⵉⵜⵉⵏ ⵏ ⵉⵎⴰⵔⴰⵜⵏ ⵏ ⵓⵙⵉⵏⴰⵔⵢⵓ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⴷⵓⵙ ⵏ ⵓⵎⵎⴳⵏⵜ ⵏ ⵓⴼⴰⵔⵙ ⴰⵙⵉⵏⵉⵎⴰⵢ ⴰⵎⴰⵣⵉⵖ.
ⴷ ⵉⵙⵔⵙ ⵓⵙⵉⵏⴰⴳ ⵢⴰⵜ ⵜⵡⵛⴽⵉⵏⵜ ⵏ ⵜⴼⴰⴷⵉⵡⵉⵏ ⵉ ⵓⴼⵍⴰⵥ ⵙⴳ ⵜⵙⵓⵜⵍⵜ ⴰⴷ, ⴳⵉⵙⵏⵜ: ⴰⴷ ⵜⵉⵍⵉ ⴷⴰⵔ ⵓⵎⵏⴽⴰⴷ ⵢⴰⵜ ⵜⵔⵎⵉⵜ ⵜⴰⵎⵣⵡⴰⵔⵜ ⴳ ⵜⵉⵔⵔⴰ ⵏ ⵓⵙⵉⵏⴰⵔⵢⵓ, ⴷ ⴰⴷ ⵉⵙⵎⵓⵜⵜⵓⴳ ⴰⴽⵓⴷⴰⵏⵏ ⵉ ⴽⵔⴰ ⵏ ⵓⵙⵏⴼⴰⵔ ⵏ ⵓⵙⵉⵏⴰⵔⵢⵓ, ⴰⴽⴷ ⵓⵙⵎⵏⵢⵉⴼ ⵉ ⵡⵉⵏⵏⴰ ⵉⵙⵙⵏⵏ ⴰⴷ ⵎⵢⴰⵡⴰⴹⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⴰⵄⵕⴰⴱⵜ ⴷ ⵜⴼⵕⴰⵏⵚⵉⵚⵜ.
ⴷ ⴰⴷ ⵉⵜⵜⵓⵙⵙⵉⵍⵖ ⵓⴼⴰⵢⵍⵓ ⵏ ⵜⵎⵏⴽⴰⴷⵜ ⵙⴳ: ⵢⴰⵜ ⵜⵓⵜⵔⴰ ⵉⵜⵜⵓⵙⵡⴰⵍⴰⵏ ⵖⵔ ⵓⵏⴱⴷⴰⴷ ⵏ ⵓⵙⵉⵏⴰⴳ, ⴷ ⵜⵔⵉⴷⵉⵔⵜ ⵜⴰⵏⵉⵎⴰⵏⵜ (CV), ⴷ ⵜⵓⵏⵖⵉⵍⵜ ⵏ ⵜⴽⴰⵕⴹⴰ ⵏ ⵜⵎⴰⴳⵉⵜ ⵜⴰⵏⴰⵎⵓⵔⵜ, ⴷ ⵢⴰⵜ ⵜⴱⵔⴰⵜ ⵜⴰⵎⴳⵍⵉⵡⵜ, ⴷ ⴰⵡⴷ ⵢⴰⵜ ⵜⴳⴹⵡⵉⵜ ⵏ ⵓⵙⵏⴼⴰⵔ ⵏ ⵓⵙⵉⵏⴰⵔⵢⵓ.
ⴷ ⵉⵙⴷⴷⵉⴷ ⵓⵙⵉⵏⴰⴳ ⵎⴰⵙ ⴷ ⵢⴰⵜ ⵜⵙⵇⵇⵉⵎⵜ ⵜⴰⵎⵥⵍⴰⵢⵜ ⴰ ⵔⴰⴷ ⵏⵏ ⵉⵡⴰⵍⴰ ⵜⴰⵎⵙⵜⴳⴳⴰⵔⵜ ⵏ ⵓⵣⵔⴰⵡ ⵏ ⵉⴼⴰⵢⵍⵓⵜⵏ ⵏ ⵜⵎⵏⴽⴰⴷⵜ, ⴷ ⵓⵍⵖⵓ ⵙ ⵜⵍⴳⴰⵎⵜ ⵏ ⵉⵎⵙⴱⵖⴰⵔⵏ, ⴷ ⵉⵙⴷⴷⵉⴷ ⵎⴰⵙ ⴷ ⵉⴼⴰⵢⵍⵓⵜⵏ ⵏⵏⴰ ⵓⵔ ⵉⵎⵉⴷⵏ ⵔⴰⴷ ⵜⵜⵢⵓⵙⵙⵔⵏ.
ⴷ ⵉⵖⵔⴰ ⵓⵙⵉⵏⴰⴳ ⵉ ⵡⵉⴷⴰ ⵔⴰⵏⵉⵏ ⴰⴷ ⴽⵛⵎⵏ ⴰⴱⴰⵔⴰⵣ ⵏ ⵓⵙⵏⴽⴷ/ⵓⵙⵜⴰⵢ ⴰⴷ ⵙⵔⵙⵏ ⵉⴼⴰⵢⵍⵓⵜⵏ ⵏⵏⵙⵏ ⴳ ⵓⵙⵉⵔⴰ ⵏ ⵓⵣⵎⵎⴻⵎ ⴳ ⵓⵙⵖⵉⵎ ⵏⵏⵙ, ⵏⵖ ⴰⴷ ⵜⵏ ⵙⵙⵉⴼⴹⵏ ⴳ ⵜⵙⴰⵡⴰⵢⵜ ⵖⵔ ⵓⵏⴱⴷⴰⴷ ⵏ ⵓⵙⵉⵏⴰⴳ, ⴷ ⵓⵢⴰⵏⵏ ⴳ ⵢⴰⵜ ⵜⵉⵣⵉ ⵏⵏⴰ ⵎⵉ ⵉⴳⴰ ⵜⵜⵎⵉ ⵏⵏⵙ ⴰⵙⵙ ⵏ 30 ⵉⴱⵔⵉⵔ 2026.
ⵉⵙⵓⵖ ⵜ: ⴰⵏⴰⵙ ⵓⵍⵃⵍⵓ