جريدة العالم الأمازيغي صوت الإنسان الحر
ⵎⵓⵃⴰⵎⵎⴰⴷ ⴼⴰⵔⵉⵙⵉ
ⵓⵎⵉ ⴷⴰⵢⵉ ⴰⵔⵔⵊⵉⵊⵉⵏⵜ ⵜⴰⵏⵛⵓⵛⵉⵏ ⴷⵉ ⵜⵡⴰⵍⴰⵜ ⵜⴰⵎⵣⵡⴰⵔⵓⵜ ⵉ ⴷⵉ ⵖⴰⵔ ⵙⵙⵉⵡⵍⵖ, ⵓⵍⵢⵖ ⵖⴰⵔ ⵓⴷⵔⴰⵔ. ⵍⴰⵖⵉⵖ ⵅⴼ ⵡⴰⴽⵓⵛ, ⵏⵏⵉⵖ ⴰⵙ: ⴰⴽⵓⵛ ⵉⵏⵓ, ⵏⵛⵛ ⴷ ⵉⵙⵎⵖ ⵏⵏⴽ ⴰ, ⵜⵉⵎⵅⵙⴰ ⵏⵏⴽ ⴳ ⵉⴼⴼⴰⵔⵏ ⴷ ⴰⴱⵔⵉⴷ ⵉⵏⵓ ⴷⵉ ⵜⵓⴷⴰⵔⵜ, ⴰⴷ ⵇⵇⵉⵎⵖ ⵍⴱⴷⴰ ⴹⴼⴼⴰⵔⵖ ⵛⴽⴽ ⵡⴰⵔ ⵅⴰⴼⴽ ⵜⵜⵎⵙⴱⴹⵉⵖ.
ⵎⴰⵛⴰ ⵡⴰⵔ ⵅⴰⴼⵉ ⴷ ⵢⴰⵔⵔⵉ ⵛⴰ. ⵉⵄⴷⴰ ⴰⵎ ⵛⴰ ⵏ ⵜⵃⴰⵕⵢⴰⴹⵜ ⵜⵚⴰⵔⵔⴹ ⵎⵉⵏ ⴷ ⴰⵙ ⴷ ⵉⵜⵜⴽⴽⵏ ⵣⵣⴰⵜ ⵏⵏⵙ. ⵅⴰⴼⵙ ⵡⴰⵔ ⵉⵇⵇⵉⵎ ⵉⵜⵎⴰⵏ ⵊⴰⵔ ⵜⵉⵟⵟⴰⵡⵉⵏ ⵉⵏⵓ.
ⵖⴰⵔ ⵡⴰⵔⵏⵉ ⵉⴼⴹ ⵏ ⵉⵙⴳⴳⵯⵓⵙⴰ ⴳⵄⵄⴷⵖ ⵄⴰⵡⴷ ⵖⴰⵔ ⵓⴷⵔⴰⵔ. ⵙⵙⵉⵡⵍⵖ ⵖⴰⵔ ⵡⴰⴽⵓⵛ, ⵏⵏⵉⵖ ⴰⵙ: ⴰ ⴰⴽⵓⵛ ⵉⵏⵓ ⵏⵛⵛ ⴷ ⵉⵛⵜ ⵏ ⵜⵎⴳⴳⴰ ⵏ ⵉⴼⴰⵙⵙⵏ ⵏⵏⴽ, ⵣⴳ ⵓⴽⴰⵍ ⵏ ⵜⵎⵓⵔⵜ ⵜⵊⵊⵉⴷ ⴰⵢⵉ ⴷⵉ ⵜⴼⵔⴰⵙ ⴰ, ⵣⵉ ⴱⵓⵃⴱⵍ ⵏⵏⴽ ⴰⵎⵇⵇⵔⴰⵏ ⵜⵚⵚⵓⴹ ⴷ ⴷⴰⵢⵉ ⵅⵎⴰ ⴰⴷ ⴽⴽⴰⵔⵖ ⴰⴷ ⵓⴳⵓⵔⵖ ⴷⵉ ⵜⵓⴷⴰⵔⵜ ⴰ. ⵙⵓⵢⴰ ⵜⵓⴷⴰⵔⵜ ⵉⵏⵓ ⴰⵎⵏ ⵜⵍⵍⴰ ⵏⵏⴽ ⴰ ⴰⴽⵓⵛ ⵉⵏⵓ.
ⵡⴰⵔ ⵅⴰⴼⵉ ⴷ ⵢⴰⵔⵔⵉ ⵛⴰ. ⴰⵎ ⵉⴼⴹ ⵏ ⵡⴰⴼⵔⵉⵡⵏ ⵉⵟⵟⴰⵡⵏ, ⵉⵥⵡⴰ ⴰⵢⵉ ⵡⴰⵔ ⴷⴰⵢⵉ ⴷ ⵉⵜⵜⵉⵡⵡⵉ.
ⵖⴰⵔ ⵡⴰⵔⵏⵉ ⵉⴼⴹ ⵉⵙⴳⴳⵯⵓⵙⴰ, ⵓⵍⵢⵖ ⵖⴰⵔ ⵓⴷⵔⴰⵔ ⵉ ⴽⵕⴰⴹ ⵏ ⵜⵡⴰⵍⴰⵜⵉⵏ, ⵏⵏⵉⵖ ⴰⵙ:
ⴰ ⵜⴱⴰⴱⴰⵜ ⵉⵏⵓ ⴰⵇⵓⴷⴷⵓⵙ, ⵏⵛⵛ ⴷ ⵎⴻⵎⵎⵉⴽ ⵉ ⵜⵅⵙⴷ. ⵙ ⵜⴰⵢⵔⵉ ⴷ ⵜⵓⵃⵏⵉⵏⵜ ⵏⵏⵛ ⵜⵊⵊⵉⴷ ⴰⵢⵉ ⴷ, ⵓ ⵙ ⵜⵥⴰⵍⵍⵉⵜ ⴽⵙⵉⵖ ⵉⵎⴰⵏ ⵏⵏⴽ ⴷⴳ ⵓⵍ ⵉⵏⵓ.
ⵎⴰⵛⴰ ⵡⴰⵔ ⵅⴰⴼⵉ ⴷ ⵢⴰⵔⵔⵉ. ⴰⵎ ⵜⴰⴳⴳⵓⵢⵜ ⵉⵜⵜⴼⴼⴰⵔⵏ ⵉⴷⵓⵎⴰⵔ, ⵉⴳⴳⵯⵊ ⵅⴼ ⵜⵉⵟⵟⴰⵡⵉⵏ ⵉⵏⵓ.
ⵖⴰⵔ ⵡⴰⵔⵏⵉ ⵉⴼⴹ ⵏ ⵉⵙⴳⴳⵯⵓⵙⴰ, ⵓⵍⵢⵖ ⵉ ⵜⵡⴰⵍⴰⵜ ⵜⵉⵙⵙ ⴽⵓⵥⵜ ⵖⴰⵔ ⵓⴷⵔⴰⵔ. ⵙⵙⵉⵡⵍⵖ ⵖⴰⵔ ⵡⴰⴽⵓⵛ, ⵏⵏⵉⵖ ⴰⵙ: ⴰ ⴰⴽⵓⵛ ⵉⵏⵓ, ⴰ ⵡⵏⵏⵉ ⵉⵙⵙⵏⴻⵏ ⵎⵉⵏ ⵡⴰⵔ ⵙⵙⵉⵏⵖ, ⵡⵏⵏⵉ ⴷⴰⵢⵉ ⵉⵙⵙⵛⴰⵏⴰⵏ ⴰⴱⵔⵉⴷ ⴳ ⵉⴼⴼⴰⵔⵏ. ⵏⵛⵛ ⴷ ⵉⵥⵡⵕⴰⵏ ⵏⵏⵛ ⴷⵉ ⵜⴰⵍⵍⵙⵜ ⵏ ⵜⵎⵓⵔⵜ, ⵛⴽⴽ ⴷ ⵜⵉⵏⵡⵡⴰⵛⵉⵏ ⵉⵏⵓ ⴷⵉ ⵜⴼⴰⵡⵉⵏ ⵏ ⵓⵊⵏⵏⴰ. ⵏⵛⵛ ⴷ ⵛⵛⴽ ⵏⴳⵎⵎⴰ ⴷ ⵣⵣⴰⵜ ⵉ ⵓⴷⵎ ⵏ
ⵜⴼⵓⴽⵜ.
ⵉⵕⴹⴱ ⵓⵍ ⵏⵏⵙ, ⵍⵅⴷⵏⵏⵉ ⵢⵓⴷⴰⵔ ⴷ ⵖⴰⵔⵉ, ⵉⵙⵙⵉⵡⵍ ⴰⵢⵉ ⴷ ⴷⴳ ⵓⵎⵥⵥⵓⵖ ⵙ ⵛⴰ ⵏ ⵜⴰⵡⴰⵍⵉⵏ ⵜⵓⴷⵓⵎⵏⵜ ⵙ ⵜⴰⵥⵢⵓⴹⵉ ⴷ ⵜⵛⵓⵏⵉ. ⵓ ⴰⵎⵏ ⵉⴷⴷⴰⵔⵔⴰⵄ ⵉⵍⴻⵍ ⵉ ⵢⵖⵣⴰⵔ ⵅⵎⵉⵏⵏⵉ ⵅⴰⴼⵙ ⴷ ⵉⵙⵙⴼⴰⵢ, ⵉⴷⴰⵔⵔⵄ ⴰⵢⵉ ⵖⴰⵔ ⵔⴰⵍⵍⴰⵖ ⵏⵏⵙ.
ⵓⵎⵉ ⴷ ⵀⵡⵉⵖ ⵖⴰⵔ ⵍⵡⴹⴰ ⴷ ⵉⵖⵣⵔⴰⵏ ⵜⵓⵖⴰ ⴰⴽⵓⵛ ⴰⵇⴰ ⵜ ⵓⵍⴰ ⴷⵉⵏⵉ.
Jabran Xalil Jabran 2 : Akuc
Muḥammad Farisi
Umi dayi arrjijint tancucin di twalat tamezwarut i di ɣar ssiwleɣ, ulyeɣ ɣar wedrar.
Laɣiɣ xef wakuc, nniɣ as :
Necc d ismeɣ nnec a akuc inu, timexsa nnec g iffaren d abrid inu di tudart, ad qqimeɣ lebda ḍeffareɣ cekk war xafek ttemsebḍiɣ.
Maca war xafi d yarri ca. Iԑda am ca n tḥaṛyaḍt tṣarreḍ min d as d ittekken zzat nnes.
Xafes war iqqim itman jar tiṭṭawin inu.
Ɣar warni ifeḍ (mille) n iseggʷusa geԑԑdeɣ ԑawed ɣar udrar. Ssiwleɣ ɣar wakuc, nniɣ as:
A akuc inu necc d ict n tmegga n ifassen nnec, zeg ukal n tmurt tejjid ayi di tefras a, zi buḥbel nnec ameqqran teṣṣuḍ d dayi xma ad kkareɣ ad uyureɣ di tudart a. Suya tudart inu amen tella nnec a akuc inu.
War xafi d yarri ca. Am ifeḍ n wafriwen iṭṭawen, iẓwa ayi war dayi d ittiwwi.
Ɣar warni ifeḍ iseggʷusa, ulyeɣ ɣar wedrar i kṛaḍ n twalatin, nniɣ as:
A tbabat inu aquddus, necc d memmic i texsed. s tayri d tuḥnint nnec tejjid ayi d, u s tẓallit ksiɣ iman nnec deg ul inu.
Maca war xafi d yarri. Am tayyut itteffaren idumar, iggʷej xef tiṭṭawin inu.
Ɣar warni ifeḍ n iseggʷusa, ulyeɣ i twalat tiss kuẓt ɣar wedrar. Ssiwleɣ ɣar wakuc, nniɣ as:
A akuc inu, a wenni issnen min war ssineɣ, wenni dayi isscanan abrid g iffaren. Necc d iẓewṛan nnec di tallest n tmurt, cekk d tinewwacin inu di tfawin n ujenna. Necc d ccek nyemma d zzat i udem n tfukt.
Iṛḍeb ul nnes, lexdenni yudar d ɣari, issiwl ayi d deg umeẓẓuɣ s ca n tawalin tudument s taẓyuḍi d tcuni. U amen iddarraԑ ilel i yeɣzar xminni xafes d issfay, idarrԑ ayi ɣar rallaɣ nnes.
Umi d hwiɣ ɣar lewḍa d iɣezran tuɣa akuc aqa t ula dini.
