ⵜⴰⵎⴻⵍⴷⴰ ⵏ ⵓⵙⴳⴳⵯⴰⵙ ⴰⵎⴰⵢⵏⵓ

ⵉⵙⵙⵉⴳⴳ-ⴷ ⵓⵙⴳⴳⵯⴰⵙ ⴰⵎⴰⵢⵏⵓ ⴼⴼⵉⵔ ⵏ ⵡⴰⵙⵙ ⵏ ⵜⵍⴰⵍⵉⵜ ⵏ ⵓⵎⴻⵢⵙⴰⵔ ⵄⴻⵙⵙⵓ ⵓⵎⴰⵙⵉⵃ ⵙ ⵢⴰⵏ ⵉⵎⴰⵍⴰⵙ.ⵉⴹ ⴰⵎⴻⴳⴳⴰⵔⵓ ⵏ ⵓⵙⴳⴳⵯⴰⵙ ⵉⵣⵔⵉⵢⵏ ⵉⴳⴰ ⵜⵉⵣⵉ ⵏ ⵓⵏⴹⴰⵡ ⵣⴻⴳ ⵢⴰⵏ ⵓⵣⵎⵣ ⵙ ⵡⴰ-ⵢⵢⴰⴹ.ⴰⵣⴳⵏ ⵏ ⵢⵉⴹ -ⴰⴷ ⵉⴳⴰ ⴰⵙⴰⴽⴰ ⵉⵙⵙⴻⵏⴹⴰⵡⵏ ⵙ ⵓⴽⵓⴷ ⴰⵎⴰⵢⵏⵓ.ⵉⵔⵣⵢ ⵢⴰⵏ ⵓⵣⵏⴰⵥ ⵎⴰⵔ ⴰⴷ ⵉⵏⵜⵢ ⵡⴰ-ⵢⵢⴰⴹ.ⵜⵉⵣⵉ ⴷⴷⴻⵖ ⵜⴳⴰ ⴰⵙⴰⴳⵓⵍ (ⵎⴰⵢ ⴷ ⵉⵜⵜⴻⵇⵇⴻⵏ ⵜⵉⵎⴻⵍⵙⵉⵜ) ⵉⵣⴷⵉⵢⵏ ⴳⴻⵔ ⵙⵉⵏ ⵉⵣⵎⴰⵣ ⴰⵣⴰⵢⴽⵓ ⴷ ⵓⵎⴰⵢⵏⵓ.ⴰⵔ ⵙⴼⵓⴳⵍⵓⵏ ⵉⵡⴷⴰⵏ ⵙ ⵉⵎⵛ ⵏⵏⴰ ⵔⴰⵏ ⵙ ⵓⵎⵓⵜⵜⵢ ⵡⴰ-ⵏⵉⵜⵉ .ⵛⴰ ⵉⵙⴳⵓⴳⵔ (ⵉⵛⵏⴰ ⵖⵉⴼ) ⴼ ⵜⴰⴽⴰⵜ ⴰⵔ ⵢⴰⴽⴽⴰ ⵉ ⵓⴷⵉⵙ ⵏⵏⴻⵙ ⵉⴹⴰⵏⴳⴰⵣⵏ (ⵎⴰ ⵙ ⵙⵙⴰⵏ ⵎⴻⴷⴷⴻⵏ) ⵏ ⵉⵇⵉⵛⵎ (ⴰⵎⴰⵏ ⵏ ⵡⴰⴹⵉⵍ ⵉⵜⵜⵓⵙⴽⵔⵏ ⵣⴻⴳ ⵜⵉⵢⵏⵉ), ⵛⵔⴰ ⵉⵏⵙⴰ ⴰⵔ ⵉⵜⵜⴻⵙⴻⵔⴽⴰⴷ ⵙ ⵓⵥⴰⵡⴰⵏ.ⵛⵔⴰ ⵉⴷⴷⴰ ⵙ ⵜⵉⴱⴻⵔⵏⴰⴹ (ⴷⵉ-ⴷⴷⴰ ⵙⵙⴰⵏ ⵉⵡⴷⴰⵏ ⴰⵎⴰⵏ ⵏ ⵡⴰⴹⵉⵍ) ⵎⴰⵔ ⴰⴷ ⵉⴷⴷⴻⵔ ⵢⴰⵜ ⵜⵓⵔⵣⴰ ⵓⵔ ⵉⵍⵉⵏ ⴰⵎⵎ ⵏⴻⵜⵜⴰⵜ,ⴰⵔ ⵉⵜⵜⴻⵚⴹⴰⵍ , ⴰⵔ ⵉⵜⵜⴻⵙⴻⵔⴽⴰⴷ ⴰⵔⴷ ⵉⵜⵜⵓ ⵉⵖⴼ ⵏⵏⴻⵙ , ⴰⵔⴷ ⵓⵔ ⴷⴰ ⵉⵜⵜⴰⵛⵣ ⴰⵙⵓⵜⵢ ⵏⵏⴻⵙ. ⵛⵔⴰ ⵉⵎⵎⵓⴷⴷⴰ ⵙ ⵢⴰⵜ ⵜⵎⴰⵣⵉⵔⵜ ⵓⵔ ⵉⴳⵉⵏ ⵜⵉ-ⵏⵏⴻⵙ ⵜⴰⴼ ⴰⴷ ⵉⵙⴼⵓⴳⵍⵓ. ⴽⵔⴰ ⵉⵇⵇⵉⵎⴰ ⴳ ⵜⴳⴻⵎⵎⵉ ⵏⵏⴻⵙ ⴰⵔ ⵉⵜⵜⴰⵡⵖ ⵉ ⵓⵖⴻⵕⵎⵉⵎ (ⴰⵖⵕⵓⵎ ⵉⵎⵎⵉⵎⵏ) ⴷ ⵜⵓⵍⵎⵉⵎⵜ (ⴰⵢ-ⵏⵏⴰ ⵉⵙⵙⵓⵎⵎ ⵓⵛⵉⵔⵔⵉ) , ⴰⵔ ⵉⵙⵙⴰ ⴰⵥⵎⴰⵎ ⵏ ⵉⴳⵓⵎⵎⴰ ⵏⴻⵖ ⴰⵜⴰⵢ . ⵛⵔⴰ ⴰⵔ ⵉⵜⵜⵉⵖⵉⵍ ⵉⵙ ⴰⵔ ⵉⵜⵜⴻⵎⵎⴻⵙⴰⴼⴰⴹ ⴷ ⵢⴰⵏ ⵓⴽⵓⴷ ⵉⵅⵅⴰⵏ ⵎⴰⵔ ⴰⴷ ⵉⵔⵎⵙ ⵙ ⵓⵥⴰⵢⵜ ⴰⴽⵓⴷ ⵉⵕⵡⴰⵏ.ⴽⵔⴰ ⴰⵔ ⵉⵜⵜⵉⵖⵉⵍ ⵉⵙ ⴰⵔ ⵉⵙⵎⵓⵜⵜⵓⵢ ⵓⵎⴰⴳⵜⴰⵔ (ⴰⵍⴰⵡⴰⵢ) ⵏ ⵜⵓⴷⴻⵔⵜ ⴰⴱⵔⵉⴷ ⵏⵏⴻⵙ ⵏ ⵡⵓⵣⵓⴹ (ⴰⵢ-ⵏⵏⴰ ⵉⵅⵅⴰⵏ) ⵙ ⵡⵉ-ⵏ ⵓⵄⵍⴰⵣ (ⴰⵢ-ⵏⵏⴰ ⵉⵕⵡⴰⵏ). ⵛⵔⴰ ⵢⵓⵛⵣ ⵉⵙ ⵉⴳⴰ ⵓⴽⵓⴷ ⵢⴰⵜ ⵜⴼⴰⴷⴰ ⵏⵏⴰ ⵙ ⵉⵜⵜⵉⵙⵉⵏ ⵓⴼⴳⴰⵏ ⵎⴰ ⴰⵜⵜⴰ ⵓⵔⵉⵙⵉ (ⴷⵉ-ⴷⴷⴰ ⴳ ⵉⵔⴻⵙ ⵡⴰⵢⵍⴰⵍ) ⵏⵏⴰ ⵢⵉⵡⴹ ⵣⵉ ⵜⵓⴷⴻⵔⵜ ⵏⵏⴻⵙ. ⴰⴽⵓⴷ ⵏⴻⵜⵜⴰ ⵏⴻⵜⵜⴰ ⵉⴳⴰ ⵡⴰⵏ ⵜⵎⵉⵊⵓⵔⵜ (ⴰⵢ-ⵏⵏⴰ ⴷⴰ ⵜⵜⴻⵏⵓⵢⵏ ⵉⵏⴻⵊⴷⴰ ⵣⵉ ⴽⵓⵥ ⴰⵔ ⵙⴻⵎⵎⵓⵙ,ⵉⵍⴰ ⴽⵓⵥ ⵏ ⵜⵍⴰⴽⴰⵜⵉⵏ) ⵉⴳⴻⵔⴱⵏ (ⵉⵙⵔⵔⴰⵏ) ⵖⵉⴼ ⵙⵏⴰⵜ ⵏ ⵜⵍⴰⴽⴰⵜⵉⵏ , ⵢⴰⵜ ⵏ ⵡⵓⵣⵓⴹ , ⵜⴰ-ⵢⵢⴰⴹ ⵏ ⵓⵄⴰⵍⵉⵣ.ⵅⴰⵙ ⵓⴽⴰⵏ ⴳ ⵉⵔⵉⵙⵉ ⴰⵔ ⵉⵙⴼⵓⴳⵍⵓ ⵓⴼⴳⴰⵏ ⵙ ⵓⴳⵯⵓⵍⵓ ⵏⵏⴻⵙ ⵙ ⵢⴰⵜ ⵜⵉⵣⵉ ⴰⵀⴰ ⴰⵔ ⵉⵜⵜⴻⵙⵡⵓⵏⴼⵓ ⵙ ⵉⵎⵛ ⵏⵏⴰ ⵉⵔⴰ. ⵉⵍⵍⴰ ⵎⴰⵢ ⴷ ⵉⵜⵜⴻⴳⴻⵔⴼⴰⵍⵏ (ⴰⵔ ⵉⵜⵜⵓⵔⴰⵔ) ⵢⵉⵍⵉ ⵎⴰⵢ ⴷ ⵉⵜⵜⴻⵊⵖⴰⵖⵏ (ⴰⴷⴷⴰⵢ ⴷⴰ ⵉⵙⴽⴰⵔ ⵛⴰ ⵛⵔⴰ ⵏ ⵓⵙⴽⴽⵉⵔ ⴰⵀⴰ ⵓⵔ ⵉⵅⵎⵎⵉⵎ ⴳ ⵉⴼⵍⴰⵏ ⵏⵏⴻⵙ) , ⵢⵉⵍⵉ ⵎⴰⵢ ⴷ ⵉⵜⵜⴻⵏⵥⴰⵥⵏ (ⴰⵔ ⵉⵙⴽⴰⵔ ⴰⵢ-ⵏⵏⴰ ⵉⵎⵙⴰⵙⴰⵏ ⴷ ⵜⵣⴻⵎⵏⴰ) . ⵉⵍⵍⴰ ⵎⴰ ⴰⵢ ⴷ ⵉⵙⵙⴰⵖⵏ ⵉⵎⵏⴰⵏ (ⵉⵙⴽⴽⵉⵏⵏ ⵏⵏⴰ ⴷⴰ ⵏⴻⵜⵜⴰⵏⵏⴰⵢ ⴳ ⵓⵙⴰⵍⴰⵢ) ⵏⴻⵖ ⵉⵖⵏⴰⴷⵊⴰ (ⵉⵙⴽⴽⵉⵏⵏ ⵉⵍⴰⵏ ⵛⵉⴳⴰⵏ ⵏ ⵓⵜⵉⴳ) ⵏⴻⵖ ⵉⵄⴱⴰⵏⵏ ⵏⴻⵖ ⵉⵙⵓⵏⴰⵔⵏ (ⵎⴰ ⵙ ⴷⴰ ⵜⵜⵓⵔⴰⵔ ⵜⵃⴻⵏⵊⵉⵔⵜ , ⵉⵍⵍⴰ ⴼ ⵓⴷⵎ ⵏ ⵜⴻⵡⵜⵎⵜ) ⵉ ⵜⴰⵔⵡⴰ ⵏⵏⴻⵙ, ⴰⵔ ⵉⵜⵜⴻⵖⴻⴱⵔⴰⵊ (ⴰⵔ ⵉⵜⵜⴻⴼⵓⵃⵔⵔⵓ) ⵙ ⵉⵛⵔⵓⵔⵏ ⵏⵏⴰ ⵢⵓⴳⵍ ⴳ ⵓⴷⵎⵔ ⵏⵏⴻⵙ. ⵜⵉⵔⵡⴰⵢⵉⵏ (ⵜⴰⴼⴰⴳⵍⴰ ⵏ ⵡⴰⵙⵙ ⵏ ⵜⵍⴰⵍⵉⵜ) ⵏ ⵓⵙⴳⴳⵯⴰⵙ ⴰⵎⴰⵢⵏⵓ ⴱⴹⴰⵏⵜ ⴳ ⵓⵣⵎⵣ ⴷ ⵜⵉⵔⵡⴰⵢⵉⵏ ⵏ ⵓⵎⴻⵢⵙⴰⵔ ⵄⴻⵙⵙⵓ ⵓⵎⴰⵙⵉⵃ ⴷ ⵜⵉ-ⵏ ⵡⵉ-ⵢⵢⴰⴹ ⵙ ⵓⵎⴰⵜⴰ ⵎⴰⵛⴰ ⴳⴰⵏⵜ ⵜⴰⴷⵓⴳⴰⵎⵜ ⵏ ⵜⵍⴰⵍⵉⵜ ⵏ ⴽⵓ ⴰⴼⴳⴰⵏ . ⵜⵉⵔⵡⴰⵢⵉⵏ ⴳⴰⵏⵜ ⵢⴰⵜ ⵜⵉⵣⵉ ⵏⵏⴰ ⴳⵉⵙ ⵉⵜⵜⴻⴳⵣⴰⵏ ⴰⵢ-ⵏⵏⴰ ⴰⵙ ⵉⵕⵡⴰⵏ , ⵏⵏⴰ ⴷⵉⵙ ⵉⵜⵜⴻⵥⵓⵥⵓⴹ ⴰⴷ ⵉⵙⵙⴻⵍⴽⵏ ⴰⵣⴰⵜⵉⵍ (ⴰⵢ-ⵏⵏⴰ ⴷⴰ ⵉⴽⴽⴰⵜ ⵛⴰ ⴰⴷⵜ ⵉⵙⵙⴻⵍⴽⵏ ⴳ ⵜⵓⴷⴻⵔⵜ ⵏⵏⴻⵙ) ⵏⵏⴻⵙ,ⵏⵏⴰ ⴳⵉⵙ ⵉⵜⵜⵉⵖⵉⵍ ⵉⵙ ⴰⵔ ⵉⵙⵖⵓⴼⴼⵓⵏ (ⴰⵔ ⵉⵜⵜⴻⵏⴹⴰⵡ) ⵎⴰⵔ ⴰⴷ ⵉⵏⴹⵡ ⵉⵜⵏⴰⵏ (ⴰⵢ-ⵏⵏⴰ ⵉⵜⵜⴻⴱⴷⴰⴷ ⴷⴰⵜ ⵛⴰ ⵜⴰⴼ ⴰⴷ ⵓⵔ ⵉⵜⵜⴻⵍⴽⴰⵎ ⴰⵢ-ⵏⵏⴰ ⵉⵔⴰ) ⵙ ⴷⵉ-ⴷⴷⴰ ⴰⵙ ⵜⴻⵙⵔⵉⵔⵔⵢ ⵜⵓⴷⴻⵔⵜ,ⵏⵏⴰ ⴷⵉⵙ ⵉⴽⵙⵉⵍⵡ (ⴰⵙⴰⴳ ⵉⵎⵖⴰⵏⵏⴰ ⵛⴰ ⴷ ⵛⵔⴰ ⵖⵉⴼ ⵜⵉⵖⵜⵉ ⵏ ⵢⴰⵏ ⵓⵏⴻⵖⵎⵉⵙ ⴰⵀⴰ ⵉⵙⴻⵔⵙ ⴽⵓ ⵢⵓⴽ ⴷⵉⴳⵙⵏ ⵛⴰ ⵏ ⵓⵇⴰⵕⵉⴹ ⵎⴰⵔ ⴰⴷⵜ ⵢⴰⵡⵢ ⵉⵖ ⵉⵖⵥⴰⵏ ) ⴰ ⴷ ⵉⵄⵔⵓⵔⵏ (ⴰⴷ ⵉⵎⵎⴻⵔ ⵛⵉⴳⴰⵏ) , ⴰⴷ ⵉⵏⵏⵉⵔⵙ , ⴰⴷ ⵉⴱⴻⵏⵖⵍ (ⴰⴷⴷⴰⵢ ⵉⴷⴷⴻⵔ ⵛⴰ ⴳ ⵓⴽⵓⴷ ⵏⵏⴰ ⵓⵔ ⴳⵉⵙ ⵍⵍⵉⵏ ⵉⵎⵎⵉⵖⵏ), ⴰⴷⴰⵙ ⵉⵟⵕⵕⴻⵃ ⵡⴰⴹⵓ.ⴽⵔⴰ ⴰⵔ ⵉⵜⵜⵉⵖⵉⵍ ⵉⵙ ⵙ ⵡⵓⴽⵓⵙ ⵏ ⵓⵟⵎⵓ (ⵎⴰ ⵙ ⵉⵜⵜⴻⵇⵇⴻⵏ ⵛⴰ ⵛⵔⴰ ⵏ ⵓⴼⴻⵛⴽⵓ) ⵉ ⵓⵙⴻⵏⴹⵉⵢ (ⴰⴼⴻⵛⴽⵓ ⵉⵅⴰⵜⵔⵏ ⴳ ⵉⵜⵜⵉⵍⵉ ⵓⵣⴰⵜⵉⵎ ⵉⵜⵜⴻⴳⴱⴰⵔⵏ ⵙⴻⵎⵎⵓⵙ ⵏ ⵉⵍⵉⵜⵔⵉⵏ) ⵏ ⵉⵇⵉⵛⵎ ⴰⵔ ⵉⵜⵜⴻⴼⵙⴰⵍ ⴰⵏⵏⴰⵣ ⴰⵎⴰⵢⵏⵓ ⴳ ⵉⵜⵜⴻⵏⵜⴰⵍ ⵡⵓⵣⵓⴹ ⴰⵀⴰ ⵉⵏⵏⴻⴼⵍⵓⵍⴰ ⵓⵄⴰⵍⵉⵣ ⵓⴽⴰⵏ ⵓⵔ ⵉⴼⵔⵉⴽ ⵉⵙ ⴰⵔ ⵉⵜⵜⴻⴽⴽⴻⵙ ⴰⵟⵎⵓ ⵉ ⵜⵛⴻⴱⴱⴰⵡⵡⵓⵜ (ⴰⵢ-ⵏⵏⴰ ⵉⵜⵜⴻⴱⴹⴰⵢⵏ) ⵉⵙⴽⴻⵛⵜⵓⵏ ⴰⵙⴰⴼⴰ (ⴰⵢ-ⵏⵏⴰ ⵉⵜⵜⴰⵣⵣⵍⴰⵏ ⴳ ⵉⵥⵓⵕⴰⵏ ⴰⵀⴰ ⵉⴳⴰ ⴰⵣⴳⴳⵯⴰⵖ) ⵏⵏⴻⵙ ⴳ ⵓⴱⵔⵉⴷ ⵏ ⵜⴰⵍⵍⴻⵙⵜ.ⵎⴻⵛⵜⴰ ⵏ ⵢⵓⴽ ⴰⵔ ⵉⵜⵜⴻⴽⴻⵢⵍⴰⵍ (ⴰⵔ ⵉⵙⵡⵉⵣⵣⵉⴹ) ⵙ ⵓⴽⵓⴷ ⵉⵖⵓⴷⴰⵏ ⵉⴼⴼⴻⵖ ⴰⵙ-ⴷ ⵉⵅⵅⴰ.ⴳ ⵊⴰⵊ ⵏ ⵜⴰⵍⵍⴻⵙⵜ ⴰⵔ ⵉⵍⵙⵙⴰ ⵜⴰⵍⵍⴰⵔⴰ (ⵜⵉⵎⴻⵍⵙⵉⵜ ⵜⵓⵎⵍⵉⵍⵜ ⵏⵏⴰ ⴷⴰ ⵙⵙⴻⵍⵙⴰⵏ ⵉⵡⴷⴰⵏ ⵉ ⵓⵎⵜⵜⵉⵏ). ⵎⴻⵛⵜⴰ ⵏ ⵢⴰⵏ , ⵙ ⵓⵊⵖⴰⵖ ⵏⵏⴻⵙ ⴰⵔ ⵉⵜⵜⴻⴳⴳⴰ ⵉⵡⴷⴰⵏ ⵢⴰⴹⵏ ⴷ ⵉⵙⴻⴼⵍⴰⵏ (ⴰⵢ-ⵏⵏⴰ ⵎⵉ ⴷⴰ ⵉⵖⵕⵕⴻⵚ ⵛⴰ) ⵏ ⵜⴼⴰⴳⵍⴰ .ⵎⴻⵛⵜⴰ ⵏ ⵓⵎⴻⵃⵔⴰⵢ ⵉⵚⴹⴻⵍⵏ ⴰⵔ ⴰⵙ ⵜⵜⴻⵛⵛⴻⴹ ⵜⵊⵉⴽⴰⵏⵜ (ⵎⴰ ⵙ ⴷⴰ ⵉⵃⵔⵔⴻⵢ ⵓⵎⴻⵏⴷⴰⵀ ⴰⵣⵍⴰⵍⴰⵎ ⵏⴻⵖ ⴰⵙⵓⴷⴼ , ⵏⴻⵖ …) ⴰⵀⴰ ⵉⴷⴷⵓ ⴳ ⵜⵏⵉⵍⴰ ⵏ ⵜⵇⵉⵙⵓⵙⵜ (ⴰⵙⴰⵔ ⵉⵙⵙⴻⵏⴳⴰⵥⵏ ) ⴽⵓⴷ ⵉⵔⴰ ⴰⴷ ⵉⴷⴷⵓ ⵙ ⵜⵏⵉⵍⴰ ⵏ ⵜⵓⴷⴻⵔⵜ ⵜⴰⵍⴻⵖⴷⴰⴷⴰⵢⵜ (ⵜⵓⴷⴻⵔⵜ ⵉⵕⵡⴰⵏ). ⵎⴻⵛⵜⴰ ⵏ ⵉⵊ , ⵉⴷⴷⴻⵖ ⵓⵔ ⵉⵏⵏⴻⴱⵉⴹ ⴳ ⵓⴼⵓⵙ ⵡⴰⵍⴰ ⴳ ⵉⵍⵙ ⵏⵏⴻⵙ ⴰⵔ ⵉⴽⴽⴰⵜ ⵓⴷⵎ ⵏⵏⴻⵙ ⴰⵀⴰ ⵓⵔ ⵉⵙ ⵢⵓⵛⵉ. ⵎⴻⵛⵜⴰ ⵏ ⵉⴷⵊ ⴰⵔ ⵉⵙⵙⵉⵖⵉ ⴰⴱⵓⵔⴷⵓ (ⵜⴰⴽⴰⵜ ⵉ ⵓⵙⴼⵓⴳⵍⵓ) ⵏ ⵜⴼⴰⴳⵍⴰ ⴰⵀⴰ ⴰⵔ ⵉⵜⵜⴻⴽⵎⴰⴹ ⵙ ⵉⵃⵎⵓⴷⵊⴰ ⵏⵏⴻⵙ ⵉⴷⴷⴻⵖ ⴰⵔⵜ ⵉⵜⵜⴻⵙⵓⴹ ⵙ ⵓⵣⵡⵓ ⴰⵀⴰ ⵉⴳⴻⵔ ⴷⵉⵙ ⵉⵣⵓⵢⴰⵢ (ⵉⵙⵓⵏⴰⵔ ⵉⵜⵜⵓⵙⴽⵔⵏ ⵣⴻⴳ ⵡⴰⵍⵉⵎ). ⵜⵓⵔⵣⴰ ⵏ ⵜⵓⵎⴻⵔⵜ ⴰⵔ ⵜⵜⴻⵇⵍⵓⵍⵍⵓⵢ ⵙ ⵜⵉ-ⵏ ⵓⵙⴽⵓⵏⵥ (ⵉⵖⵉⵍⴼ, ⴰⵏⵉⵔⵢ , ⴰⵢ-ⵏⵏⴰ ⵙ ⵉⵜⵜⴰⵛⵢ ⵡⴰ-ⵏⵏⴰ ⵎⵉ ⵉⵎⵜⵏ ⵛⵔⴰ ⵏ ⵓⵎⵉⵍⴳ) ⴷⴰⵔ ⵉⵜⵙⵏ . ⵜⴰⴽⵓⴱⴱⵉⵔⵜ ⵏⵏⴰ ⵉⴽⴽⴰ ⴰⵔ ⵉⵙ ⵉⵜⵜⴻⵡⴰⵔⴳⴰ ⵜⴻⴷⵡⵍ ⴷ ⵜⵓⵏⴰⵏⵜ ⵖⵓⵕ ⵉⴷⵙⵏ. ⴰⵛⴽⵓ ⵓⵔ ⵙⵙⵉⵏ ⵉⵙ ⵉⵍⴰ ⵓⵙⴼⵓⴳⵍⵓ ⵉⵡⵜⵜⴰ ⵏⵏⴻⵙ.ⵎⴻⵇⵇⴰⵕ ⵓⵢ-ⴰ ⴰⵔ ⵉⵜⵜⴻⵡⴰⵔⴳⴰ ⵓⴼⴳⴰⵏ ⴰⴷ ⵉⵔⵔⵓ ⵓⵄⴰⵍⵉⵣ ⵓⵣⵓⴹ ⴳ ⵢⴰⵜ ⵜⵉⴽⴽⴻⵍⵜ., ⴰⵔ ⵉⵙⵙⴰⵔⴰⵎ ⴰⴷ ⵉⴷⴷⴻⵔ ⴳ ⵓⵃⴻⴹⵕⵏ (ⴰⴷⴷⴰⵢ ⵓⵔ ⵉⵍⵍⵉ ⵓⵎⴻⵏⵖⵉ) , ⴳ ⵜⴰⵍⵇⵇⵉ ⵏ ⵜⵓⴷⴻⵔⵜ . ⴰⵔ ⵉⵜⵜⴻⴷⵎⵓ ⵉⵙ ⴰⵔ ⵉⵜⵜⴻⴷⴷⵓ ⴳ ⵓⴱⵔⵉⴷ ⵏ ⵓⵄⵔⴰⵏ , ⵉⵙ ⵢⵓⵜⵎ ⵉ ⵡⵉ-ⵏ ⵜⴳⴻⵛⵛⴰ (ⴰⵢ-ⵏⵏ ⵓⵔ ⵉⴳⵉⵏ ⴰⵄⵔⴰⵏ ), ⴰⵔ ⵉⵜⵜⴻⴽⴻⵢⵍⴰⵍ ⵙ ⵓⴷⵉⵎⴰⵍ (ⵉⵎⴰⵍ) ⵙ ⵡⴰⵍⵍⴻⵏ ⵉⵔⵣⵓⵣⵣⴻⵖⵏ (ⵉⵏⵏⴰⵕⵥⵎⵏ) , ⵙ ⴰⴷ ⵉⵣⵖⵓⴱⴱⴻⵢ ⵜⴰⵖⴻⵔⴷⴰⵎⵎⵓⵜ (ⴰⵢ-ⵏⵏⴰ ⴷⴰ ⵉⵙⵙⴰ ⵛⵔⴰ ⴰⵀⴰ ⵉⴷⵔⵓ ⵜ ⴷ ⵉⵎⴷⵓⴽⴽⵯⴰⵍ ⵏⵏⴻⵙ ⵙ ⵜⵎⴻⵍⴷⴰ ⵏ ⵜⴼⴳⵍⴰ ⵏ ⵜⵍⴰⵍⵉⵜ ⵏⵏⴻⵙ ), ⴰⴷⵜ ⵉⵛⵛⵓⵔ ⴷ ⵉⵙⵎⵓⵏ ⵏ ⵓⵖⴰⵔⴰⵙ ⵏⵏⴻⵙ ⵉⵜⵜⴰⵡⵉⵢⵏ ⵙ ⵓⵎⴰⴳⵍⴰⵍ.

ⵣⴻⴳ ⵡⴰⵥⵢ ⵏⵏⴻⵙ ⴰⵔ ⵉⵙⴼⵓⴳⵍⵓ ⵓⵏⴻⵙⵍⴰⵎ ⵙ ⵓⵏⵜⴰ ⵏ ⵓⵙⴳⴳⵯⴰⵙ ⴰⵣⵓⴳⴰⴳ ⵉⴷⴷⴻⵖ ⴰⵔ ⵉⵙⵙⴻⴷⵢⴰⵏ (ⵉⴳⴰ ⵜ ⴷ ⴰⴷⴰⵢⵉⵏ) ⵜⴰⵣⵓⴳⵉ ⵏ ⵓⵎⴰⵣⴰⵏ ⵏ ⵡⴰⵍⵍⴰⵀ ⵣⴻⴳ ⵎⴻⴽⴽⴰ ⵙ ⵢⴰⵜⵔⵉⴱ . ⴰⵢ-ⵏⵏⴰ ⵉⵙⵏⴰⴱⴰⵏ ⵜⴰⵍⴰⵍⵉⵜ ⵏ ⵓⵎⵓⵀⴷ ⴰⵙⴻⵍⵎⴰⵏ ⵏⵏⴰ ⵉⴼⵙⴻⵍⵏ (ⵉⵕⵥⵎ) ⵢⴰⵏ ⵡⴰⵏⵏⴰⵣ ⴰⵎⴰⵢⵏⵓ ⴳ ⵡⴰⵎⵓⵏ ⴰⵄⵕⴰⴱ ⴷ ⵡⴰⵎⵓⵏⵏ ⵏⵏⴰ ⵥⴰⵕⵙⵏ ⵢⵓⴷⴼ. ⴰⵔ ⵙⴼⵓⴳⵍⵓⵏ ⵉⵏⴻⵙⵍⴰⵎⵏ ⴰⵙⵍ ⵏ ⵡⴰⴷ ⵙⵡⵉⵏ ⵉⵇⵉⵛⵎ , ⵏ ⵡⴰⴷ ⴳⴻⵔⴼⵍⵏ . ⴳ ⵡⴰⵙⵙ ⵏ ⵜⴼⴰⴳⵍⴰ ⴰⵔ ⵙⵙⴰⵖⵏ ⵉ ⵡⴰⵔⵔⴰⵡ ⵏⵙⴻⵏ ⵎⴰ ⵙ ⵜⵜⵓⵔⴰⵔⵏ . ⴰⵃⵏⵓ ⵏ ⵓⵙⴼⵓⴳⵍⵓ ⵙ ⵉⴷⴰⵎⵎⴰⵏ ⴷⴷⴻⵖ ⵉⴳⴰ ⵜ ⴰⴷ ⵉⵃⴰⴷⵣ (ⴰⴷⴰⵙ ⵉⵏⵎⵉⵍⵉ) ⵓⵏⴻⵙⵍⴰⵎ ⵙ ⵉⵎⴻⵖⵏⵉ ⵏⵏⴻⵙ, ⴰⵔⴰⵙ ⵉⵜⵜⴻⴳⴻⵢⵏⴰⵏ (ⵉⴷⴽⵍ ⵉⴼⴰⵙⵙⵏ ⴰⵔⴰⵙ ⵉⵜⴻⵜⵜⴻⵔ) ⵎⴰⵔ ⴰⴷ ⵉⵍⴻⴽ ⵙ ⵓⵎⴰⴳⵍⴰⵍ (ⵓⵔⵜⵉ ⵉⴼⵓⵍⴽⵉⵢⵏ)

ⵣⴻⴳ ⵡⴰⵥⵢ ⵏ ⵉⵎⴰⵣⵉⵖⵏ ⴷ ⵉⵎⴻⵣⴷⴰⵖ ⵏ ⵓⴳⴰⴼⴰ ⵏ ⵓⴼⴰⵔⴰⴽ ⴰⵔ ⵉⵜⵜⴻⵎⵢⴰⵡⴰⵢ ⵡⴰⵏⵜⴰ ⵏ ⵓⵙⴳⴳⵯⴰⵙ ⴰⵎⴰⵢⵏⵓ ⴷ ⵉⴷⴰⵎⵎⴰⵏ (ⴰⵢ-ⵏⵏⴰ ⵢⴰⵖⵏ) ⵓⴷⵢⵉⵏⵏ ⵉⵜⵜⵉⵏⵉⵏ ⵉⵙ ⵉⴽⴽⴰ ⵢⴰⵏ ⵓⴳⵍⵍⵉⴷ ⴰⵎⴰⵣⵉⵖ ⵉⵜⵜⴻⵢⴰⵙⵙⵏ ⵙ ⵓⵛⵉⵛⵓⵏⴳ ⵉⵔⵔⴰ ⵙ ⵓⴷⴻⴼⵔⵉⵔ (ⵜⴰⴳⵔⵓⵎⵎⴰ ⵏ ⵉⵙⴻⵔⴷⴰⵙⵏ) ⵏⵏⴻⵙ ⵡⵉ-ⵏ ⵓⴼⴻⵔⵄⵓⵏ ⴰⵀⴰ ⵉⵏⵏⴻⴱⴹ ⴳ ⵓⵡⴰⵏⵉⴽ ⵏⵏⴻⵙ ⴰⵀⴰ ⵉⵎⵢⴰⵡⴰⵢ ⴷⵉⵖ ⴷ ⵓⵏⵜⴰ ⵏ ⵓⵙⴻⵎⵀⵓⵢ ⴰⴼⴻⵙⴳⴰⵔⴰⵏ (ⴰⴽⵯⴼⴰⵙ ⵏ ⵉⴳⵔⴰⵏ) . ⴳ ⵜⵓⵎⵢⵉⵔⵉⵏ ⴷ ⵜⵓⵏⵙⵉⵢⵉⵏ ⵏ ⵉⵎⴻⵣⴷⴰⵖ ⵏ ⵜⵎⴰⵣⵖⴰ ⵓⵔ ⵉⵍⵍⵉ ⵅⴰⵙ ⵎⴰⵢ ⴷ ⵉⵣⴷⵉⵢⵏ ⵙ ⵓⴼⴻⵙⴳⵔ.ⵓⵔ ⴰⵔ ⵏⴻⵜⵜⴰⵏⵏⴰⵢ ⵛⵔⴰ ⵏ ⵓⵙⴻⵔⴽⴷ (ⴰⵎⵓⵙⵙⵓ ⴰⵎⵎ ⵓⵃⴻⵢⴷⵓⵙ ⴷ ⵓⵃⵡⴰⵛ) ⴰⵙⴻⵔⴷⴰⵙⴰⵏ ⵉⴳⴰⵏ ⵜⴰⵎⴰⵜⴰⵔⵜ ⵏ ⵜⵓⵔⵔⵓⵜ. ⴰⵔ ⵉⵙⵙⴰⵖ ⵓⵎⴰⵣⵉⵖ ⴰⴼⵓⵍⵍⵓⵙ ⵉⴳⵎⴰⵏ ⴳ ⵓⴳⴰⵎⴰ ⵉ ⴽⵓ ⴰⴼⴻⵔⴷⴰⵙ ⵏ ⵜⴻⵖⵢⴰⵎⵜ (ⵜⴰⵡⵊⴰ) ⵎⴰⵔ ⴰⴷ ⵜⴻⵙⵙⴻⵎⵔ ⵜⵎⴻⵔⵛⵉⵍⵜ (ⵜⴰⵙⴷⴻⵏⵜ ⵏⵏⴰ ⵢⵉⵡⵍ) ⵏⵏⴻⵙ ⵉ ⵉⵎⵏⵙⵉ ⵏ ⵢⵉⴹ ⵏ ⵓⵙⴳⴳⵯⴰⵙ ⴰⵎⴰⵢⵏⵓ ⵏⴻⵖ ⵉⵖⴼ ⵏⵏⴻⵙ . ⴰⵔ ⵉⵜⵜⵉⵖⵉⵍ ⵉⵙ ⵓ-ⵏⵏⴰ ⵓⵔ ⵉⴷⵊⵉⵡⵉⵏ ⵓⵔ ⵙⴰⵔ ⵉⴷⵊⵉⵡⵏ . ⴰⵔ ⵜⴻⵙⵙⴻⵏⵡⴰ ⵜⵎⴻⵔⵛⵉⵍⵜ ⵙⴻⴽⵙⵓ ⵉⵎⴰⵏ ⴷ ⵉⵛⴽⴰⵏ ⴷ ⵓⴽⵙⵓⵎ ⵏ ⵓⴼⵓⵍⵍⵓⵙ . ⴰⵔ ⵜⵜⴰⴷⵊⴰ ⴰⵎⵓⵔ ⵏ ⵓⴼⴻⵔⴷⴰⵙ ⵓⵔ ⵉⵎⴻⵏⴳⵉⵜⵏ (ⵓⵔ ⵉⵍⵍⵉⵏ ⴳ ⵡⴰⵏⵙⴰ) . ⴰⵔ ⵉⵜⵜⴻⴳⵯⴷⴰⵍ ⵓⵎⴰⵣⵉⵖ ⵖⵉⴼ ⵜⴰⵔⵡⴰ ⵏⵏⴻⵙ ⴰⵙⵓⴽⴽⴼ ⵏ ⵉⵃⴻⵍⴼⴰⵙ (ⵜⵓⴳⴰ) , ⴰⵔ ⵉⵜⵜⴻⵥⴱⴰⵕ ⵉⵙⴻⴽⵯⵍⴰ ⴷ ⵡⴰⴷⴷⴰⴳⵏ , ⴰⵔ ⵉⵙⴳⵓⵔⵔⵓⵎ ⴰⵣⵣⴰⵔ ⵏ ⵜⵙⴻⵍⵎⵢⴰ ⵏⵏⴻⵙ ⵎⴻⵛ ⵜⴻⵍⵍⴰ. ⵎⴻⵛ ⵢⵓⴼⴰ ⵡⴰⵙⵙ ⴷⴷⴻⵖ ⴰⵎⴻⵣⵡⴰⵔⵓ ⵜⴰⵎⴻⵔⵛⵉⵍⵜ ⵓⵔ ⵜⴰ ⵜⴱⴱⵉ ⴰⵙⵟⵟⴰ ⵓⵔ ⵜⵜⵓⵢⴰⵇⵇⵉⵍ ⴰⴷⵜ ⵉ ⵜⴻⵙⵔⵢ ⵉⴷⴷⴻⵖ ⴽⴽⴰⵏ ⵉⵎⴰⵣⵉⵖⵏ ⴷⴰ ⵜⵜⵉⵖⵉⵍⵏ ⵉⵙ ⴷⴰ ⵖⵓⵕⵙⵏ ⵜⵜⴻⴽⴽⴰⵏ ⵉⵎⴰⵍⴳⵏ (ⵡⵉ-ⵏⵏⴰ ⴰⵙⵏ ⵉⵏⵎⴰⵍⴰⵏ) ⵏⵙⴻⵏ ⵉⴳⴰⵏ ⵉⵎⵜⵜⵉⵏⵏ ⴰⵀⴰ ⴰⵔ ⵉⵜⵜⴰⵏⵢ (ⴰⴷⴷⴰⵢ ⴷ ⵉⵜⵜⴰⴷⴼ ⵢⴰⵏ ⵓⵙⴽⴽⵉⵏ ⴳ ⵡⴰ-ⵢⵢⴰⴹ) ⵓⵏⴼⴼⵓ (ⵉⵎⴰⵏ) ⵏⵏⴻⵙ ⴳ ⵓⵙⵜⵓ .ⴰⵔ ⵜⵜⴻⴼⵕⴰⴹ ⵜⵎⴻⵔⵛⵉⵍⵜ ⵜⵉⴳⵎⵎⵉ ⵏⵏⴻⵙ ⵜⴰⴼ ⴰⴷ ⵜⴻⵙⴼⵓⴳⵍⵓ ⵙ ⵓⵙⴳⴳⵯⴰⵙ ⴰⵎⴰⵢⵏⵓ.ⵍⵍⴰⵏ ⴳ ⵉⵎⴰⵣⵉⵖⵏ ⵡⵉ-ⴷⴷⴰ ⵉⵙⵙⴻⵏⵙⴰⵏ ⵜⴰⴳⴻⵍⴹⵉⵎⵜ (ⴰⵢ-ⵏⵏⴰ ⵉⵜⵜⴰⵙⵢ ⵉⴷⵉⴽⵍ ⵎⴰⵔ ⴰⴷⵜ ⵉⴳⵔ ⴳ ⵉⵎⵉ) ⵏ ⵙⴻⴽⵙⵓ ⴳ ⵓⵣⵓⵔ ⵏ ⵓⵣⴷⴷⵓⵖ ⵉⴹ ⵎⴰⵢ ⴷ ⵉⵍⴰ . ⵓⴽⴰⵏ ⴰⵔ ⵉⵜⵜⴰⵖ ⴰⵢ-ⵏⵏⴰ ⵓⴼⴰⵏ ⴷⵉⵙ. ⵡⴰⵇⵉⵍⴰ ⵉⴳⴰ ⵢⴰⵏ ⵉⵎⵛ ⵎⴰ ⵙ ⴷⴰ ⵜⵜⵉⵙⵉⵏⵏ ⵉⵙ ⵇⴻⵏⵏⴰ ⵉⵕⵡⵓ ⵓⵙⴳⴳⵯⴰⵙ ⴰⴼⴻⵙⴳⴰⵔⴰⵏ . ⵙ ⵓⵙⴰⴱⵉⵔ ⴷⴷⴻⵖ ⴰⵔ ⵜⵜⴻⴳⵣⴰⵏⵏ ⵙ ⵡⴰⵔⵉⴷⵏ.ⴰⵢ-ⴰ ⴰⵔ ⵉⵎⵎⴰⵍ ⵉⵙ ⴰⵙⴼⵓⴳⵍⵓ ⵏ ⵉⵎⴰⵣⵉⵖⵏ ⴷ ⵉⵎⴻⵣⴷⴰⵖ ⵏ ⵜⵎⴰⵣⵖⴰ ⵉⵍⴰ ⴰⵊⴰⵡⵉⵍ ⴷ ⵓⵍⴰⵎⵓⵚ ⵏ ⵓⵙⴼⵓⴳⵍⵓ ⵙ ⵓⵙⴳⴳⵯⴰⵙ ⴰⵎⴰⵣⵉⵖ ⴰⴼⴻⵙⴳⴰⵔⴰⵏ . ⵉⴷⴷⴻⵖ ⴳⴳⵓⴷⵉⵢⵏⵜ ⵜⵉⵔⴰⵎ ⵏⵏⴰ ⵎⵉ ⴷⴰ ⵙⵙⴻⵎⵔⴰⵏ ⵀⴰ ⵜⴰⴳⵯⵍⵍⴰ ⵀⴰ ⴱⴰⴷⴷⴰⵣ (ⵙⴻⴽⵙⵓ ⵏ ⵓⵎⴻⵣⴳⵓⵔ , ⵏ ⵓⵙⴻⵏⴳⴰⵔ) ⵀⴰ ⴰⵎⵍⵓ ⵀⴰ ⴰⴼⴹⴹⵓⵥ (ⵙⴻⴽⵙⵓ ⵏ ⵜⵓⵎⵥⵉⵏ) ⵓⴽⴰⵏ ⴰⵔ ⵜⵜⴻⴼⴼⴻⵔⵏ ⴰⵎⵎⴰⵙ ⵏ ⵓⴷⵓⵙⴽⵓ (ⴰⴼⴻⵛⴽⵓ ⵉⵜⵜⴰⵙⵉⵢⵏ ⵜⵉⵔⵎⵜ) ⵢⵓⵙⵉⵢⵏ ⵜⵉⵔⵎⵜ ⵢⴰⵏ ⵓⵖⴻⵕⵎⵉ ⵏⴻⵖ ⵓⵖⵢⴰⵢ , ⵏⴻⵖ ⵢⴰⵏ ⵓⵍⵓⵎⴰⵙ (ⴰⵖⴻⵕⵎⵉ ⵏ ⵡⴰⵔⴰⴳⴰⵏ), ⵏⴻⵢ ⵢⴰⵏ ⵓⴱⴰⵔⵉⴽ (ⴰⵖⴻⵕⵎⵉ) ⵏ ⵜⵉⵛⵉⵟ, ⵏⴻⵖ ⵏ ⵉⵡⵣⵣⴰⵏ (ⴰⵖⴻⵕⵎⵉ ⵏ ⵜⴰⵣⴰⵔⵜ) ⵏⴻⵖ ⵛⵔⴰ ⵏ ⵓⵅⵛⴰⵛ (ⵉⵖⴻⵚⵚ ⵏ ⵓⴳⵓⵎⵎⵓ) ⴰⴽⴽⵯ ⵎⴰ.ⵓ-ⵏⵏⴰ ⵏⴻⵖ ⵜⴰ-ⵏⵏⴰ ⵜ ⵢⵓⴼⴰⵏ ⴰⴷ ⵢⴰⵎⵥ/ⴰⴷ ⵜⴰⵎⵥ ⵜⴰⵙⴰⵔⵓⵜ ⵏ ⵜⴱⴰⵢⵏⵓⵜ ⵏⴻⵖ ⵏ ⵜⴰⵔⵎⴰ (ⴰⵃⴰⵏⵓ ⵏ ⵉⵎⴻⵏⴷⵉ) ⵉⵍⵍⴰⵏ ⵊⴰⵊ ⵏ ⵜⴳⴻⵎⵎⵉ ⴰⵀⴰ ⵉⵙⵙⴻⵏⵢⵓⴷⴷⵓ /ⵜⴻⵙⵙⴻⵏⵢⵓⴷⴷⵓ ⵉⵡⵥⵍⴰ ⵏ ⵜⴻⵖⵢⴰⵎⵜ.

ⴰⵙⴼⵓⴳⵍⵓ ⵙ ⵡⴰⵙⵙ ⴰⵎⴻⵣⵡⴰⵔⵓ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ ⵢⵓⴽⵍⴰⵍ ⴰⴷ ⵉⴳ ⴰⵙⵙ ⵏ ⵜⴼⴰⴳⵍⴰ ⵜⵓⵖⵍⵉⵏⵜ ⵜⵓⵎⵔⵉⵙⵜ ⵏⵏⴰ ⴳⵉⵙ ⵜⵜⴻⵙⵡⵓⵏⴼⵓⵏ ⵉⵙⴻⵎⵊⵉⵍⵏ ⴷ ⵜⵙⴻⵎⵊⵉⵍⵉⵏ ⵉⵍⴰⵏ ⵜⴰⵡⵓⵔⵉ ⴳ ⵓⵛⴱⴰⵢⵢⵓ ⵓⵏⴱⵉⵣ ⴷ ⵓⵙⵍⵉⴳ ⵎⴰⵔ ⴰⴷ ⵛⵜⵉⵢⵏ ⵉⴷⵓⴳⵉⵎ (ⴰⵢ-ⵏⵏⴰ ⵎⵉ ⵉⵎⵔⴰⵢ ⴰⴷ ⵢⵉⵙⵉⵏ ⵛⵔⴰ ⴰⵏⴰⴱⴰ ⵏⵏⴻⵙ) ⵏ ⵜⴼⴰⴳⵍⴰ ⴷⴷⴻⵖ ⵉⵍⴰⵏ ⴰⵍⴰⵎⵓⵚ ⴰⴼⴻⵙⴳⴰⵔⴰⵏ , ⵏⵏⴰ ⴳⵉⵙ ⵙⵙⴰⵔⴰⵎⵏ ⵉⵎⴻⵣⴷⴰⵖ ⵏ ⵜⵎⴰⵣⵖⴰ ⴰⴷ ⵉⵙⵙⴻⴱⵍⵓⵍⵙ ⵓⵏⵥⴰⵕ ⵜⵉⵔⵔⴻⵙⵜ (ⴰⵛⴰⵍ ⵉⵖⵓⴷⴰⵏ ⵉ ⵓⵛⵔⴰⵣ) ⵜⴰⴼ ⴰⴷ ⵉⴳⴳⴰⴷⵢ ⵡⴰⵎⵓⴷ , ⴰⵀⴰ ⵙⵙⵉⵖⵏ ⴰⵙⵉⵍ ⴷ ⵓⵙⴰⴼⵓ ⵏ ⵓⵎⴰⵢⵏⵓ .ⵢⵓⴽⵍⴰⵍ ⵡⴰⵙⵙ ⵡⴰ-ⵏⵉⵜⵉ ⴰⴷ ⵉⴳ ⴰⵙⵙ ⵏ ⵜⵉⴳⴳⴰ ⵙ ⵜⵉⴼⴼⵉⵔⵜ ⵜⵓⵎⵊⵉⵍⵜ (ⴰⵙⵙ ⵡⴰⵔ ⵜⵡⵓⵔⵉ ⵙ ⵜⵉⵖⵕⴰⴹ ⵉⴼⵔⴰⵏ).

ⵓ-ⵏⵏⴰ ⵉⵜⵜⵉⵏⵉⵏ ⵉⵙ ⵉⴳⴰ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ ⴰⵙⴽⴻⵔⴽⵙ ⴰⵀⴰ ⵉⴱⴰⵀⵔ (ⴰⴷⴷⴰⵢ ⵓⵔ ⵉⴼⵍⵉⵙ ⵛⵔⴰ ⴳ ⵎⴰⵢ ⴷ ⵉⵏⵏⴰ ⵡⴰ-ⵢⵢⴰⴹ) ⴰⵡⴰⵏⵉⴽ ⵉⴱⵓⵥⵥⵏⵏ (ⵉⵍⴽⴰⵏ) ⵙ ⵜⴼⴰⴳⵍⴰ ⵜⵓⵎⵔⵉⵙⵜ ⵜⵓⵖⵍⵉⵏⵜ ⵙ ⵜⵉⴼⴼⵉⵔⵜ ⵜⵓⵎⵊⵉⵍⵜ , ⴷ ⵉⵎⴻⵣⴷⴰⵖ ⵏ ⵜⵎⴰⵣⵖⴰ ⵉⵙⴼⵓⴳⵍⵓⵏ ⵙ ⵡⴰⵙⵙ ⴷⴷⴻⵖ ⴰⵙⵍ ⵏ ⵡⴰⴷ ⵉⵙⵉⵏⵏ ⴰⵏⴰⴱⴰ ⵀⴰⵜ ⵏⴻⵜⵜⴰ ⴰⵢ ⴷ ⵉⴳⴰⵏ ⴰⵙⴽⴰⵔⴽⴰⵙ ⵉⴷⴷⴻⵖ ⵉⴼⴻⵙⵜⴰ ⴰⵍⵍⴻⵢ ⴰⵔ ⵙⵙⵓⵜⵓⵔⵏ ⵉⵎⴻⵖⵕⴰⴱⵉⵢⵏ ⴰⴱⵓⵥⵥⵏ ⵙ ⵜⴼⴰⴳⵍⴰ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ ⵙ ⵡⴰⵖⴰⴷ ⵓⵎⵔⵉⵙ ⴷ ⵓⵖⵍⵉⵏ ⴰⵀⴰ ⵉⵕⵥⵎ ⵉ ⵉⵎⵉ ⵏⵏⴻⵙ ⴰⵙⵍ ⵏ ⵓⴽⵔⵓⴽⴹ.

ⵜⵉⴷⴷⵓⴳⵎⴰ ⵏ ⵡⴰⵙⵙ ⴰⵎⴻⵣⵡⴰⵔⵓ ⴳ ⵓⵙⴳⴳⵯⴰⵙ ⴰⴼⴻⵙⴳⴰⵔⴰⵏ ⴰⵎⴰⵣⵉⵖ ⵉⵣⴷⵢ ⴷ ⵜⵖⴻⵕⵎⴰ ⵏ ⵉⵎⴰⵣⵉⵖⵏ ⴷ ⵜⵏⴻⵜⵜⵉⵜ ⵏⵙⴻⵏ . ⵉⴳⴰ ⴰⵙⵙ ⵙ ⵙⴼⵓⴳⵍⵓⵏ ⵉⵎⴻⵣⴷⴰⵖ ⵏ ⵜⵎⴰⵣⵖⴰ ⵙ ⵓⵖⵔⵉⴽ ⵏ ⵜⴻⵃⴳⵓⵣⵜ .ⵎⴻⵛ ⵉⴱⵓⵥⵥⵏ ⵓⵡⴰⵏⵉⴽ ⴰⵎⴻⵖⵕⴰⴱⵉⵢ ⵙ ⵜⴼⴰⴳⵍⴰ ⴷⴷⴻⵖ ⵀⴰⵜ ⵉⴷⵔⴰ ⴳ ⵜⴼⴰⴳⵍⴰ ⵏⵏⴰ ⴳ ⵉⵛⴱⴱⴻⵔ ⵓⵖⵔⴼ ⴰⵎⴻⵖⵕⴰⴱⵉⵢ ⴷ ⵉⵖⴻⵔⴼⴰⵏ ⵏ ⵜⵎⴰⵣⵖⴰ ⴰⵀⴰ ⵉⵙⴻⵎⴷⵔ ⵏ ⵜⵖⵓⵕⵉ ⵏⵏⴻⵙⵏ ⵙ ⵉⵎⴻⵔⵛⵉⴷⴰⵏ (ⵜⴰⴼⴰⴳⵍⴰ ⵉⵅⴰⵜⵔⵏ) ⵉⴳⴰⵏ ⴰⵙⴻⴽⵜⵓⵜⵜⴻⵔ (ⴰⴷ ⵉⵣⴷⵢ ⵛⴰ ⵙⵉⵏ ⵉⵙⴽⴽⵉⵏⵏ) ⴳⴻⵔ ⵓⵡⴰⵏⵉⴽ ⴷ ⵓⵖⵔⴼ ⵏⵏⴻⵙ. ⵉⵎⴻⵔⵛⵉⴷⴰⵏ ⴳ ⵉⵍⵍⴰ ⵓⵙⴰⵢⴰ ⴰⵙⵍ ⵏ ⵡⴰⴷ ⵢⵉⵍⵉ ⵉⵇⵉⵛⵎ. ⵉⵎⴻⵔⵛⵉⴷⴰⵏ ⴳ ⵍⵍⴰⵏⵜ ⵜⵉⵔⴰⵎ ⵜⵓⵎⵎⵉⵏⵉⵏ ⵏⵏⴰ ⵙ ⵙⵙⴻⵔⵣⴰⵖⵏ (ⴰⵙⴰⴳ ⵉⴳⴳⵓⵏⴻⵢ ⵛ ⵙ ⵎⴰⵢ ⴷ ⵉⵕⵡⴰⵏ) ⵉⵎⴻⵣⴷⴰⵖ ⵏ ⵓⴳⴰⴼⴰ ⵏ ⵓⴼⴰⵔⴰⴽ.ⵣⵓⵏⴷ ⵉⵖⴻⵔⴼⴰⵏ ⵏ ⵓⵎⴰⴹⴰⵍ ⵍⴰⵏ ⵉⵔⵓⵣⵉⵖ ⵏⵙⴻⵏ .

06-01-2018/2967
ⴰⵖⴰⵣⴰⴼ ⵎⵓⵃⵎⵎⴰⴷ