جريدة العالم الأمازيغي صوت الإنسان الحر
ⵢⵓⵙⴰ ⴷ ⵓⵙⵏⵎⴰⵍⴰ ⵏ ⵜⵎⵙⴰⵔⵜ ⴰⴷ ⵜⴰⵏⴰⵥⵓⵕⵜ ⵙ ⵡⴰⵏⵏⴰⵍ ⵏ ⵜⵎⴰⵡⴰⵙⵜ ⵏ ⵜⵄⵄⵓⵔⵎⴰ, ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ – ⵉⴳⵔ ⵏ ⵜⴷⵍⵙⴰ, ⴷ ⵜⴷⵔⴰⵡⵜ ⴰⴽⴷ ⵜⴳⵔⴰⵡⵜ ⵏ ⴱⵉⵢⴳⵯⵔⴰ ⴷ ⵡⴰⵎⵎⴰⵙ ⵏ ⵙⵓⵙ ⵎⴰⵙⵜ ⵉ ⵜⴳⵎⵉ ⴷ ⵜⴷⵍⵙⴰ, ⵙ ⵓⵣⴷⴷⵓⵢ ⴰⴽⴷ ⵜⵎⵙⵙⵓⴳⵓⵔⵜ ⵏ ⵡⴰⵎⵎⴰⵙ ⴰⴷⵍⵙⴰⵏ, ⴳ ⵓⵙⴰⵜⵉ ⵏ ⵜⴷⵉⵏⴰⵎⵉⵜ ⵉⵣⴷⵉⵏ ⵏ ⵜⵏⴽⵔⴰ ⵙ ⵓⵎⵣⴳⵓⵏ ⴰⵎⴰⵣⵉⵖ ⴷ ⵓⵙⴱⵖⵙ ⴷ ⵓⵙⵙⵔⵇⴱ ⵏ ⵜⵔⵎⵉⵜⵉⵏ ⵜⵉⵎⵙⵏⴼⵍⵓⵍⵉⵏ ⵜⵉⵎⵜⵜⴰⵖⴰⵍⵉⵏ.
ⵜⴽⴽⴰ ⵜⵜ ⵏⵏ ⵜⵎⵣⴳⵓⵏⵜ ⵏ “ⵉⵖⵓⴷ” ⵜⵣⵎⵎⴻⵎ ⴰⴷⵍⵍⵉ ⵢⴰⵏ ⵓⵎⵓⵔⵙ ⵉⴼⴰⵡⵏ ⴳ ⵜⵏⵢⵓⴷⴷⵓⵜ ⵏⵏⵙ ⵜⴰⵏⴰⵎⵓⵔⵜ, ⵍⵍⵉⴳ ⵜⵔⵣⴼ ⵜⵓⴳⴷⵜ ⵏ ⵜⵎⴷⵉⵏⵉⵏ ⵜⵉⵎⵖⵔⴰⴱⵉⵏ, ⴷ ⵜⵓⵎⵥ ⴰⵡⴷ ⴰⵙⵓⵜⴳ ⵏ ⵓⴳⴷⵓⴷ ⴷ ⵉⵎⵣⵖⴰⵏⵏ, ⵙ ⵓⵙⵔⴰⴳ ⵏ ⵜⵎⵢⴰⴷⴰⵙⵜ ⵏⵏⵙ ⵜⴰⵏⴰⵥⵓⵕⵜ ⵜⴰⵏⴽⴼⵓⵔⵜ ⴷ ⵓⵙⵎⴽⵍ ⵏⵏⵙ ⵉ ⵜⵎⵓⴽⵔⵉⵙⵉⵏ ⵜⵉⵏⴰⵎⵓⵏⵉⵏ ⴷ ⵜⵏⴼⴳⴰⵏⵉⵏ ⵉⴷⵔⴰⵏ.
ⵜⴽⵛⵎ ⵜⵡⵓⵔⵉ ⴰⴷ ⴳ ⵉⴼⴰⵔⵙⵏ ⵏ “ⴰⵙⴰⵡⵔ ⵏ ⵓⴳⴰⴷⵉⵔ ⵉ ⵜⵥⵓⵕⵉⵡⵉⵏ”, ⵏⵏⴰ ⵏⵏ ⵉⵙⵔⵓⵙⵏ ⵜⴰⴼⵍⵙⵜ ⵏⵏⵙ ⵖⴼ ⵓⵙⵎⵏⵉⴷ ⵏ ⵜⵡⵓⵔⵉⵡⵉⵏ ⵜⵉⵏⵎⵣⴳⵓⵏⵉⵏ ⵏⵏⴰ ⵏⵏ ⵉⵜⵜⴳⴳⵔⵏ ⵉ ⵜⵎⵙⴰⵔⵉⵏ ⵜⵉⵎⴳⴷⴰⵍⵉⵏ ⵙ ⵢⴰⵜ ⵜⵎⴰⵎⴽⵜ ⵜⴰⵏⴰⵥⵓⵕⵜ ⵜⴰⵎⵟⵏⴰⵥⵜ, ⵍⵍⵉⴳ ⵔⴰⴷ ⵜⵙⵙⵎⵔⵙ ⵜⵉⵜⵉⵇⵏⵉⵢⵉⵏ ⵜⵉⵏⵎⵣⴳⵓⵏⵉⵏ ⵜⵉⵜⵔⴰⵔⵉⵏ ⴳ ⵢⴰⵏ ⵓⵎⵏⵉⴷ ⴰⵎⵙⵏⴼⵍⵓⵍ ⵉⵜⵜⵓⵙⵎⴰⵢⵏⵓⵏ.
ⴷ ⴰⵔ ⵜⵙⵙⵎⵏⵉⴷ ⵜⵎⵣⴳⵓⵏⵜ ⴰⴷ ⵢⴰⵏ ⵓⴼⵙⴰⵔ ⴰⵀⴰⵏⴰⵢ ⵉⵙⵎⵎⵔⴽⴰⵙⵏ ⴳⵔ ⵜⴽⵓⵎⵉⴷⵉⵜ ⵜⴰⴱⵔⴽⴰⵏⵜ, ⴷ ⵓⵣⵓⵍⴰⵍ ⴷ ⵓⵙⵎⵎⴹⵕⵏ ⴰⴼⵍⵙⴰⴼ, ⵍⵍⵉⴳ ⴷⴰ ⵜⵥⵥⴰⴹ ⵢⴰⵜ ⵜⵏⵢⵓⴷⴷⵓⵜ ⴳ ⴳⵔ ⵡⴰⴽⵓⴷ ⵏⵏⴰ ⵉⵙⵔⵓⵙⵏ ⵉⵣⵔⵉ ⵎⵏⵉⴷ ⵏ ⵓⵎⵉⵍⴰⵏ, ⵜⵣⵓⵣⵣⴼ ⵖⴼ ⵜⵎⵏⴳⵍⵉⵡⵉⵏ ⵏ ⵡⴰⵎⵓⵏ ⴷ ⵉⵎⵓⵜⵜⵉⵢⵏ ⵏ ⵓⵏⴳⵔⴰⵡ ⵏ ⵉⵣⴰⵍⵉⵡⵏ. ⵎⴽⵍⵍⵉ ⵙ ⴷⴰ ⵜⵙⵙⵎⵔⴰⵙ ⵜⴰⵟⵏⴰⵥⵜ ⴰⵎ ⵢⴰⵏ ⵢⵉⵎⵉⵙ ⴰⵏⴼⵔⴰⵏ ⵉ ⵓⵙⵔⵓⵙ ⵏ ⵉⵙⵇⵙⵉⵜⵏ ⵉⵏⵉⵍⵍⵉⵜⵏ ⵉⵣⴷⵉⵏ ⴷ ⵓⵙⴰⵍⴰ, ⴷ ⵓⵏⴰⵎⴽ ⴷ ⵡⵓⵎⵎⵍ, ⴳ ⵢⴰⵏ ⵓⵙⴰⵜⵉ ⵉⵙⵎⵓⵏⵏ ⴳⵔ ⵓⵙⵓⵔⴰⵔ ⴷ ⵓⵙⵙⵏⴽⵔ ⵏ ⵓⵙⵡⵉⵏⴳⵎ.
ⴷ ⴰⵔ ⵉⴷⵔⵔⵓ ⴳ ⵓⵙⵎⴷⵢⴰ ⴷ ⵡⴰⴽⴰⵣ ⵏ ⵜⵎⵣⴳⵓⵏⵜ ⴰⴷ: ⵃⴰⵎⵉⴷ ⴰⵛⵜⵓⴽ, ⴽⴰⴱⵉⵔⴰ ⵍⴱⵔⴷⴰⵡⵣ, ⵃⴰⵙⴰⵏ ⵄⵍⵉⵡⵉ, ⴷ ⵅⴰⴷⵉⵊⴰ ⴰⵎⵏⵜⴰⴳ. ⵜⴰⵡⵓⵔⵉ ⵜⴳⴰ ⵜⵉⵏ ⵓⵎⴳⴰⵢ ⵙⵓⴼⵢⴰⵏ ⵏⴰⵄⵓⵎ, ⴷ ⵓⵙⵓⴼⵖ ⵏ ⵕⴰⵛⵉⴷ ⵍⵀⵣⵎⵉⵔ, ⴷ ⵜⵉⵔⴰⵎⵓⵖⵍⵉⵜ/ⵜⴰⵡⵏⵖⴰⵎⵓⵖⵍⵉⵜ ⵏ ⵀⵉⵛⴰⵎ ⴷⴷⵀⴱⵉ ⴷ ⵜⵎⵍⵙⵉⵜ: ⵎⴰⵍⵉⴽⴰ ⵎⵓⴹ, ⴷ ⵓⵥⴰⵡⴰⵏ: ⵀⵉⵛⴰⵎ ⵎⴰⵙⵉⵏ, ⴷ ⵡⴰⵙⵉⴷⴷ: ⵅⴰⵍⵉⴷ ⵍⴽⵜⵉⴼ ⴷ ⴰⵡⴷ ⵜⴰⵏⵟⵟⵓⴼⵜ/ⵜⴰⵙⵃⴹⴰⵡⵜ ⵜⴰⵎⴰⵜⴰⵢⵜ ⵏⵏⴰ ⵖⴼ ⵉⴱⴷⴷ ⵃⴰⵙⴰⵏ ⵃⵏⵉⵛ, ⴷ ⵓⵙⵡⵓⴷⴷⵓ ⵏ ⵓⴼⴰⵔⵙ: ⵃⴰⵙⴰⵏ ⴰⴷⵏⴰⵔⵓⵔ, ⴷ ⴰⵡⴷ ⴳ ⵜⵉⵣⵉ ⵏⵏⴰ ⴳ ⵉⴱⴷⴷ ⵎⵓⵏⵜⴰⵚⵉⵕ ⵉⵜⵔⵉ ⵖⴼ ⵓⵙⵏⵖⵎⵙ ⴷ ⵓⵎⵢⴰⵡⴰⴹ.
ⴷⴰ ⵉⵜⵜⵓⴹⴽⴰⴹ ⴰⴷ ⵉⴳ ⵓⴼⵙⴰⵔ ⴰⴷ ⵢⴰⵏ ⵓⵏⵎⵓⵇⵇⴰⵔ ⴰⵏⴰⵥⵓⵕ ⵓⵙⵍⵉⴷ ⴷ ⵉⵥⵍⵉⵏ ⵉ ⵉⵎⴰⵔⴰⵢⵏ ⵏ ⵓⵎⵣⴳⵓⵏ, ⴷ ⵢⴰⵜ ⵜⵎⵍⴷⴰ ⵉ ⵡⴰⴽⴰⵣ ⴷ ⵓⵙⴼⵓⴽⴽⵔ ⵏ ⵢⴰⵜ ⵜⵔⵎⵉⵜ ⵜⴰⵏⵎⵣⴳⵓⵏⵜ ⵜⴰⵎⴰⵣⵉⵖⵜ ⵉⵙⵎⴰⵏⵏ ⴳⵔ ⵜⵔⵔⵓⴳⵣⴰ ⵜⴰⵏⴰⵥⵓⵕⵜ ⴷ ⵜⵖⴱⵉ ⵏ ⵓⵙⵎⵏⵉⴷ.
ⵉⵙⵓⵖⵍ ⵜ: ⴰⵏⴰⵙ ⵓⵍⵃⵍⵓ